CHUNGH 21
Ung Cho Chungh
Toenk uhjyung xiklyis Dawi lvkhyank dvyang
1 Yhensain eh, nvng hwankti lhyi yombos nhang lha nyang gaus nyeis;
nvng nyang lyis ung cho kuot dyei las nyang gauslaus nyeis!
2 Nvng, nyang lyis nyah ehnyet omes zis dyei goeus,
nyang dung cho lhyi ma he tyamp. (Selah)
3 Nvng, nyang lyis gis dah shvmanh yah zes yoeus las
nyah uhloms mas xing gyingh buismuk tsungh dyei.
4 Nyang kang dung las
nvng, nyang lyis kang xing cho dyei toh.
5 Nvng pangh yvmvyah nyah phunk kuhxing joq;
nvng nyang lyis nyings hoeuh cho yahge phunk nyoqnho ngelang dyei toh.
6 Nvng gas nyang lyis vcaiq vto ngelhoq nhang lha,
nvng nyeis zis sohseq zis yah gaus nhang.
7 Hwankti ka Maukhung Jesphung Yhensain lhyi loms;
Nyhang Thank Soeu dah mathank magons jyetdap gvng mas nyang ma lop ma loeh das.
8 Hwankti ka nyah jeswus dvnganh lyis nyhik das;
nyang lyis hoeng bang lyis nyah loqyos loq yah nyhik das.
9 Nvng thuq los uhlyis
nvng nyamoq lyis ngeh dah nyi teh mhont das:
Yhensain ka nyah nhaiqyo yvmas nyamoq lyis nyhau tyamp das;
nyi eq nyamoq lyis ngeh jom das.
10 Nvng nyeisjvng thoq masyah nyamoq mas yaus lyih bang lyis mhont das;
cangsoeu lo jens masyah nyamoq dah vnyau vshih lyis mhont das.
11 Nyamoq gas nvng yah tyi dah lhung cho kuot mes las
khaujeini laus eq ma ung das.
12 Nvng nah lyei thung lha nyamoq lyis nyo yah baiq lyis
nyamoq nungs phuk las phang loh das.
13 Yhensain eh, nah yom lyis chunghtoq zis xauh bas jungh;
ngamoq nah yomsoq lyis chunghthwe kat las chungh das.