CHUNGH 19
Mangso Gvnkhanh Phunk
1 Maukhung ka Mangso dah phunk lyis kyoh.
Maunyaus zoh gas nyah loqmuh lyis dede chixoeuq nyeis.
2 Dvnyeih dvnyeih dang taiq hoeuh las,
dvnyens dvnyens seq cho phank xoeuq nyeis.
3 Dang taiq zis ma bos, nyingh eq ma bos,
hauh thwe ma xauhgyo laus eq
4 nyamoq dah thwe ka mungkvn gonh nyings las,Ref 19.4: Rom 10.18
nyamoq dah dang gas nyeisjvng goms shoq jweh goeus.
Nyang houmha buislom xiklyis zvng dvkoeuq kuot toh.
5 Hauh zis gas, nyah yvp masyah thuq los dah loloeu saiq yahge
wuih khyank goh das loyangh teh goh thuq los.
6 Nyah cho ka maukhung dvthang mhayah thuq los las
gohtoeu dvthang jweh shoq lhain nyeis las:
hau buis gywes mhayah yoh luiq zis cha ma bos.
Yhensain Lyi
7 Yhensain dah lyi gas dyinghjet las, ehnyet yombos los.
Yhensain dah kanghjyoeng dang gas jyoeng lha
nhaiq ma bos bang lyis joeui bos nhang.
8 Yhensain dah lyi thungh gas zungh las, nhaiqlom lyis gauslaus nhang.
Yhensain tyingtoh dang gas gyingh las
ehnyet phank dyei zis yah seqgyo nhang.
9 Yhensain lhyi gyukwoms cho gyingh las vcaiq vto joq.
Yhensain dah soetuon cho ka jus las dan joq.
10 Hauh zis gas xing yahge xing gyingh thoq lyis zes phauhdap,
dyoyhei yahge dyotvp thoq lyis zes chau.
11 Hauh zis gas ngos nah jyeidwis lyis seq cho dyei.
Ngos hauh yvlyis chank kuot yvmvyah, phauh shangh zainsmuh yoh.
12 Vsainnyang shuot cho vsainnyang hank yoh nyvng lah?
Ma nyvng dah yobos masyah ngos lyis lhuiq dyei aq.
13 Pa-i kuot dah yaunos eq lhuiq dyei aq, hauh zis ngos lyis ma nghop bas jungh:
Ma gis dah yaunos masyah luiq nhang aq, housoeh lyis ngos dyinghjet das.
14 Ngah khaugus, ngah khyuot yoeus soeu Yhensain eh,
ngah nhuot mas dang yahge, ngah ehnyet mas nghamh cho ka, nah nyoqlvtjvng mas nhaiqdoeus zis bweh bas jungh.