CHUNGH 148
Mungkvn Gonh Chungh goh
Yhensain lhyi chungh geh! Nyhang thank thoq mas nyeis bang eh,
Yhensain lhyi maukhung mhayah chungh geh.
Nyah loeuswons bang dvnganh, maukhung jesphung jens
dvnganh nyang lyis chungh geh.
 
Buislom Lhamhmuh eh, nyang lyis chungh geh;
bvng dah kyi jens eh, nyang lyis chungh geh.
Nyhang thank maukhung jens eh, maukhung nyhang mha dah jeis jens eh,
nyang lyis chungh geh.
 
Nyamoq dvnganhmoq Yhensain nyings lyis chungh bas jungh.
Nyang zaudang khyoq lyis hauh zis dvnganh gvnkhanh toh goeus.
Nyah vmingh yah hauh vyhang jens gas nyah joqyos mas vcaiq vto joq goeus.
Nyamoq domsyos ma gyo ma yoh kuot.
 
Thomh mas mvnjung jens yahge noq dah nvmukdra jens
nyeisjvng masyah Yhensain lhyi chungh geh.
Maunyoq, gyutomp, gyu yahge jyommauh,
nyah vmingh lyis gyo dah lyeis than, Yhensain lhyi chungh geh.
 
Boms jens jing jens,
shihzains yahge saiq khyam jens dvnganh;
10 yewus yahge gaunyhauq, shweh loh ja yahge
maudang nghoq dvnganh, nyang lyis chungh geh.
 
11 Hwankti jens yahge dius jens dvnganh,
zau jens yahge gohtoeu guon bang dvnganh;
12 loloeu lonyi jens, lokhoq jens yahge
loshang jens Yhensain lhyi chungh geh.
 
13 Dvnganhmoq Yhensain nyings lyis chungh bas jungh;
Nyah nyings gas gohtoeu dvnganh thoq lyis zes kuhxing joq.
Nyah phunk gas maukhung nyeisjvng thoq lyis zes.
14 Nyang nyah dius nyau jens lyis yombos nhang,
housoeh las nyah dius jens dvnganh nyang lyis chungh.
Israel dius jens nyang lyis jyet.
 
Yhensain lhyi chungh!