CHUNGH 143
Pangh aq, Ge Dung
1 Yhensain eh, ngos shvmanh dung lyis gyo yoeus dyei aq;
nah dan cho mha ngos dung dang lyis kamp gyo dyei aq.
Nah wontang cho mha ngos lyis toeuh dyei aq.
2 Nah xikkhonh mas hank eq ma dan yvmvyah,Ref 143.2: Rom 3.20; Gal 2.16
ngos nah jyeidwis lyis soe vtuon.
3 Ngah jeswus jens ngos lyis chank khat las ngos somh loh.
Nyamoq ngos lyis mauchuotdwang thung mha lhunk toh las,
ngos gas gohlhain shei loh goeus bang teh nghuot nyeis.
4 Housoeh yvmvyah ngos somh loh bah ge,
ngah nhaiqlom khau mha yomgyau nyeis.
5 Ngos lai loh goeus buisnyeis lyis soh.
Nah muh dvnganh lyis nghamh yoeuh, nah loqmuh lyis nghamh suon yoeuh.
6 Ngos ngah loq toeu lha nvng lyis shvmanh dung;
tsoh kyuk yos teh ngah dyos nvng lyis jeis soeh shet nyeis. (Selah)
7 Yhensain eh,
ngos nghamhloms cho thank goeus, ngos lyis gvshih toeuh dyei aq.
Ngos gas shei mau mas gyoh soeu teh nghuot das las nvng ngos lyis vtamh.
8 Ngos nvng lyis loms yvmvyah,
ngos lyis nah mathank magons jyetdap cho lhyi nvp yau nvp soh nhang aq.
Ngos shvmanh dung dang nah jyank mas jweh los; ngos suh chah cho lhyi tuonhshet aq.
9 Yhensain eh, ngos lyis gos das nyhenshang ngos nah jyank mas los,
ngah jeswus masyah lhuiq kat aq.
10 Nvng ngah Mangso nghuot; ngos lyis nah ehnyet chank das cho jyauh aq.
Ngos lyis jyehjuh kuot zis yah jesshoh ma bos cho chank shwih loh aq.
11 Yhensain eh, nah dangthoengh yah dvyhangteh ngos lyis khyuot kat aq.
Nah gis cho mha ngos lyis ngah chiqjyen masyah khyuot yoeus aq.
12 Nvng ngos lyis jyetdap yvmvyah ngah jeswus lyis sat dyei aq.
Ngos gas nah jyeidwis nghuot yvmvyah, ngos lyis zaiq bang dvnganh lyis mhont dyei aq.