CHUNGH 140
Gos Dyei aq Ge Dung
1 Yhensain eh, ngos lyis
ma gis bang masyah khyuot yoeus aq.
Bat goh sat goh bang masyah jesluiq shohluiq gomh kat aq.
2 Nyamoq gas vjangh ma gis zis lhaink,
vjangh dyoqgoh cho lhoeu thuq.
3 Nyamoq dah lhyo shei nhang dah lhangnyis teh nghuot.Ref 140.3: Rom 3.13
Nyamoq dang gas lhangnyis duk yah doeusgoh. (Selah)
4 Yhensain eh,
ngos lyis lhung bang yomsoq masyah gos toh dyei aq;
Ngah khyei nyih bas jungh ge lhaink dah lhuotzo bang masyah gomh dyei aq,
5 Khwank bang ngos lyis lhyik thung toh;
nyamoq ngos lyis twih khyoq toh; ngos loh dah cho chank yah
ngos lyis lhyik thung toh. (Selah)
6 Ngos Yhensain lhyi, Nvng ngah Mangso nghuot:
Yhensain eh, ngos nvng pangh das cho dung yvlyis gyo yoeus dyei aq, oen.
7 Ngah Yomzains Yhensain, yombos dah ngah khyuot yoeus soeu,
moengzan yvmas nvng ngos lyis gos toh dyei.
8 Yhensain eh, lhung bang nyamoq omes yvlyis vdyei;
nyamoq lhaink cho lhyi v ung nhang. (Selah)
9 Ngah jeswus lyis ung cho vdyei;
nyamoq ngos lyis tyi lha kyuk cho ka nyamoq thoq mas gyoh bas jungh.
10 Nyigywe nyamoq thoq mas gyoh bas jungh.
Nyamoq gas dwang mas khyoq zis xauh las khanhamp eq ma yoh toq lo bas jungh.
11 Gohyuk lyis ma jus khyvlyis kauq bang ma ung bas jungh.
Ma gis cho ka lhuotzo bang lyis duons las nyamoq lyis mhont tyamp bas jungh.
12 Yhensain ka nvng shohjyen bang dah soe lhyi,
nyungs bang dah toeuh lyis khomp dyei das yvlyis ngos seq.
13 Dan bang gas nvng lyis jyoengh chungh das;
nyamoq nah xikkhonh mas nyeis das.