CHUNGH 115
Nyang gas Jyoeng Mangso
1 Ngamoq lyis ma nghuot, Yhensain eh, ngamoq lyis ma nghuot:
nah mathank magons jyetdap cho yahge nah wontang cho gvng mas
nvng lyis kyingh nyoqnho ngelang dyei chah.
2 Dius nyau jens chamus,
Nah Mangso khalhye nyeis lah, ge sang das lah.
3 Ngamoq Mangso ka maukhung mha nyeis;
nyang o zis dvnganh nyang kuot nyeis.
4 Nyamoq dah phvra gas ngwis yahge xing yah kuot toh,Ref 115.4-8: Chd 135.15-18; Nyoq 9.20
dius loq yah dvkuot.
5 Nyamoq nhuot dap laus eq ma yoh taiq,
nyoqjeih dap laus eq ma yoh nyvng.
6 No dap laus eq ma xauhgyo,
nho dap laus eq ma yoh nam.
7 Nyamoq loq dap laus eq ma zwi,
khyei dap laus eq ma yoh suh:
nyamoq thwe ma yoh thuq.
8 Hauh yvlyis kuot toh bang yahge,
hauh yvlyis loms bang dvnganh gas phvra teh bweh bas jungh.
9 Israel dius jens eh, Yhensain lhyi loms geh,
nyang namoq lyis pangh dyei, gos dyei.
10 Mangso dah phudyei bang eh, Yhensain lhyi loms geh.
Nyang gas namoq lyis pangh dyei, gos dyei.
11 Yhensain lhyi paiq bang dvnganhmoq eh, nyang lyis loms geh.
Nyang gas namoq lyis pangh dyei, gos dyei.
12 Yhensain ka yang lyis soh las shvmanh dyei das;
nyang gas Israel dius jens yahge
Mangso dah phudyei bang dvnganhmoq lyis shvmanh dyei das.
13 Nyang gas Yhensain lhyi phauh nyang bang yuk khanghmuh,Ref 115.13: Nyoq 11.18, 19.5
ngislo kuhlo lyis dvyih shvmanh dyei das.
14 Yhensain ka namoq lyis lo jens dyei bas jungh;
namoq yahge namoq dah lo jens lyis je los nhang bas jungh.
15 Nvng gas maukhung yahge nyeisjvng lyis kuot dah Yhensain yah
shvmanh dyei zis xauh bas jungh.
16 Maukhung ka Yhensain yah kyingh dvsen,
nghuot laus eq nyang nyeisjvng gas dius lyis dyei toh.
17 Shei bang yahge tsingtsam mau mas gyoh loh bang gas
Yhensain lhyi yoh chungh zis ma nghuot.
18 Nghuot laus eq yang kang dwis nyeis bang gas
Yhensain lhyi gvshih masyah vcaiq caiq nhaiqshoqlang chungh goh.
Yhensain lhyi chungh!