CHUNGH 113
Yhensain dah Gis Cho Chungh
1 Yhensain lhyi chungh!
Yhensain dah jyeidwis jens eh,
nyah nyings lyis chungh geh.
2 Yhensain nyings gas gvshih eq
vcaiq vto eq chungh zis xauh bas jungh.
3 Buisthuq masyah buiswvng jweh shoq
Yhensain nyings lyis chungh geh!
4 Yhensain ka dius nyau dvnganh thoq mas guon nyeis.
Nyah phunk maukhung thoq mas nghuot.
5 Ngamoq dah Yhensain Mangso teh zis hank ma bos.
Nyang gas nyhang thank thoq mas nyeis.
6 Nyang gas maukhung yahge nyeisjvng lyis yoeuh das ge,
nyang gop gyoh los.
7 Nyang gas shohjyen bang lyis pangh,
nyungs bang lyis pangh las nyamoq dah kang dwis cho lhyi nyhang nhang.
8 Zau jens dah dyenschangh duot nhang,
nyah dius jens dah zau jens yah toh.
9 Nyah yhen mha lo ma bos dah yhensain nyhiq lyis nyoqnho ngelang toeu dyei;
nyang lyis loshang jens dyei zis yah pyo nhang.
Yhensain lhyi chungh!