CHUNGH 107
OENG VBUK
Mangso dah gis Cho xiklyis
Yhensain ka gis yvmvyah, nyang lyis nhaiqshoqlang sang geh.Ref 107.1: 1Ss 16.34; 2Ss 5.13, 7.3; Ezr 3.11; Chd 100.5, 106.1, 118.1, 136.1; Yer 33.11
Nyah jyetdap cho vcaiq vto joq.
Yhensain yah khyuot yoeus toh bang dvnganh eh,
nyang lyis chungh yvmas haih dang doms taiq taiq kuot geh.
Nyamoq lyis nyamoq dah jeswus masyah khyuot kat.
Nyang namoq lyis lvbaus mau masyah,
Buisthuq, buiswvng, mautsung, mautyi mau masyah shwih los.
 
Dvyhamh gas mhanhdyvp chokhyoh ma bos yvmas suh whang loh,
nyeis das wus pheh loh cho ma xo nyvng.
Nyamoq yuot shet las
nyamoq nghamhloms cho dvnganh dyuk loh.
Hauh thang lhyi nyamoq yaukyenh las Yhensain lhyi lui,
housoeh nyang nyamoq lyis nyamoq dah shanghsenh masyah khyuot yoeus.
Nyang nyamoq lyis, nyamoq nyeis das wus mas cho
dan cho yah choshe los.
Nyamoq gas Yhensain dah mathank magons jyetdap cho yahge,
nyamoq lyis kuot dyei dah mauhphoh muh nyhenshang nyang lyis nhaiqshoqlang sang gis.
Nyang gas zosyuot jeisshet bang lyis
gis zis yah jo nhang zis yah nhaiqtap nhang.
 
10 Dvyhamh gas nhaiqkuk zis yah mauchuotdwang mas nyeis,
thung lungh bang eq shamjvng twih zis xauh.
11 Khasoeh ge lyis nyamoq gas Yomzains Mangso dah tyingtoh dang lyis
gomloeus toq, nyang shet toh cho lhyi peq tyamp.
12 Nyamoq gas muh changh las nyungdaus,
nyamoq lains lyis hank ma toeu.
13 Hauh thang lhyi nyamoq yaukyenh las Yhensain lhyi lui,
housoeh nyang nyamoq lyis nyamoq dah shanghsenh masyah khyuot yoeus.
14 Nyang nyamoq lyis nhaiqkuk cho mauchuotdwang masyah shwih thuq los,
nyamoq dah shamjvng lyis vdoeus doeus thyet tyamp dyei.
15 Nyamoq gas Yhensain dah mathank magons jyetdap cho yahge
nyamoq lyis kuot dyei dah mauhphoh muh nyhenshang nyang lyis nhaiqshoqlang sang gis.
16 Nyang gas thunk khomh jens lyis khyauh tyamp las,
thyeq khomhkyank lyis eq vdoeus doeus thyet tyamp dyei.
 
17 Koh bang gas, nyamoq yaunos kuot,
ma gis zis kuot yvmvyah yobos xauh kham.
18 Nyamoq zonoms lyis nghoengh las
shei bah ge loh.
19 Hauh thang lhyi nyamoq yaukyenh las Yhensain lhyi lui,
housoeh nyang nyamoq lyis nyamoq dah shanghsenh masyah khyuot yoeus.
20 Nyang nyamoq lyis nyah vmingh yah gis los nhang,
nyamoq lyis shei masyah khyuot yoeus.
21 Nyamoq gas Yhensain dah mathank magons jyetdap cho yahge
nyamoq lyis kuot dyei dah mauhphoh muh nyhenshang nyang lyis nhaiqshoqlang sang gis.
22 Phudyei zis yah jyehjuh chungh gis,
nyang kuot dyei goeus cho dvnganh lyis gauslaus chunghthwe taiq kyoh gis.
 
23 Dvyhamh gas sangpho cho yah nvmukdra pheh goeu loh zis yah
thomh thoq mas kang khoeu.
24 Nyamoq gas thomh thoq mas Yhensain
nyah mauhphoh muh cha yoh kuot zis tsain nyvng.
25 Nyang vmingh dyei lyis lyeismuh jyang muot los las
jeisphauq lyis lhoeu toq kat.
26 Sangpho ka lyeis mas nyhang shoq toq kat lho lha
thomh khau mha doms duon pyeh wvng loh.
Housoeh mus yvmvyah dius jens womh cho ma bos lo.
27 Nyamoq yhei yet soeu teh vtyi vkamh thungh dwes lains loh las,
nyamoq dah lyes cho vkom dvnghuot lo.
28 Hauh thang lhyi nyamoq yaukyenh las Yhensain lhyi lui,
housoeh nyang nyamoq lyis nyamoq dah shanghsenh masyah khyuot yoeus.
29 Nyang hau lyeisjyang lhyi tam nhang lha,
thomh mas jeisphauq eq sam tyamp.
30 Hau jeisphauq sam loh yvmvyah nyamoq gaus.
Housoeh nyang nyamoq lyis nyamoq omes dah goeukhanh mas jesluiq shohluiq shwih jweh loh.
31 Nyamoq gas Yhensain dah mathank magons jyetdap cho yahge
nyamoq lyis kuot dyei dah mauhphoh muh nyhenshang nyang lyis nhaiqshoqlang sang gis.
32 Nyamoq gas dius huom mha nyah kuhxing cho lhyi taiq hoeuh gis,
uhshe bang dah huom xik mas nyang lyis chungh gis.
 
33  Yhensain ka jeislvng jens dvnganh kyuk kyuk kuot,
jeisthuq dwang jens lyis eq jeis yaus zoh doms nhang.
34 Nyang gas jenh tsoh yos lyis coh ngvm dah nyeisgyih yos bweh nhang:
khasoeh ge lyis houmha lhung bang nyeis.
35 Nyang gas sihsho yos lyis eq jeisthomh thaiq tyamp dyei,
nyeiskyuk yos lyis eq jeisthuq dwang jeis yaus nhang.
36 Nyang yuot shet bang lyis houmha nyeis nhang lha
nyamoq nyeis das wus tsain kuot.
37 Nyamoq yos mas zvbiq tsungh las
vboms vbeq xauh yhomh yoeus.
38 Nyang nyah dius jens lyis shvmanh dyei las nyamoq nyoshoq jebais los.
Nyamoq dah noeu kyunk ma yoms loh nhang.
 
39 Mangso dah dius jens gas lhoeng bang zaiq zis xauh las
somh zis yah xoqphuh cho xauh kham nyeis lyis,
40 Nyang nyamoq lyis zaiq bang lyis hoeng cho chixoeuq zisyah mhanhdyvp,
cho ma bos yvmas whang yenh nhang.
41 Nghuot laus eq nyang nyungs bang lyis nyamoq khamzo nyeis masyah khyuot kat.
Nyamoq dah yhenbang lyis yvng phung jens lyis teh jebais los nhang.
42 Dan bang haih zis nyvng las gaus.
Nghuot laus eq lhung bang dvnganh gas samlo nyeis.
 
43 Joeui bos bang gas haih cho lhyi tsain nghamh yoeuh bas jungh;
nyamoq gas Yhensain dah mathank magons jyetdap cho lhyi nghamh suon yoeuh bas jungh.