CHUNGH 101
Hwankti Dangthoengh
Ngah chunghthwe ka lyi jus cho yahge dang jyoeng cho nghuot.
Yhensain eh, hauh zis yah ngos nvng lyis chunghthwe kat das.
Ngos yobos ma bos khyvlyis kang dwis nyeis das.
Nvng ngah jyank mas khanhamp los das lah?
 
Ngos ngah yhen mha lhoqshang khyvlyis kang dwis nyeis das.
Ngos ma gis muh lyis khanhamp eq ma lhom yoeus das;
ngos Mangso jyank masyah nungs doms loh bang dah muh lyis hoeng;
nyamoq ngos yah ma yoh dapgoh.
Ngos guih cho cha ma kuot das; ma gis cho lhyi ma kuot das.
Ngos gohyuk dah ma gis cho loeusmus soeu lhyi thyuk tyamp das.
Khwank las lhoq lhoq teh kuot soeu lhyi ngos ma thoq jhen.
 
Ngos Mangso lhyi lomluk bang lyis kyink das,
hauh bang lyis ngah hwankti yhen mha nyeis nhang das.
Lomluk bang lyis gas ngos lyis phuqsoe das toeuh dyei das.
 
Seq hwah soeu ka, ngah hwankti yhen mha ma yoh nyeis.
Gis guons seq kuot soeu eq ngah xikkhonh mas ma yoh doengs.
Ngos, yah mau mas lhung bang lyis dvnyeih dvnyeih mhont das.
Ma gis bang dvnganh lyis Yhensain dah wus masyah shank shoq ngos nvp yau nvp khat tyamp das.