CHUNGH DANG
(THE PSALMS)
Haih lomsnoq cho dah maussauh gas nyoshoq ja nghuot. Mangso lhyi paiq, chungh chunghthwe, khyuot yoeus cho, gos, pangh das xiklyis vkyuh dung dang, yobos khyuot dyei das xiklyis dung dang yahge Mangso shvmanh jyehjuh xiklyis dung dang tsain nghuot.
Haih vkyuh dung dang gas dvyuk xiklyis eq nghuot, dvmau gonh xiklyis eq nghuot. Dvyhamh gas dvyuk dah nhaiq mas loh thank kham zo cho chixoeuq toh. Gohtoeu dvkhamh gas Mangso dah dius jens dvnganh mas chah cho, kham zo cho phui kyoh toh.
Haih Chungh Dang lyis Yesu yhung, Thanghchvp saiq lhaih bang eq yhung. Haih Chungh Dang buk gas cangxeih Khristan phung vkyuh dung uhlyis yhung, phauhdap buk bweh los.
CHUNGH 1
DAS VBUK
Jyoeng dah Pyo Cho
1 Lhung bang dah xam yvmas ma suh ma e,
yaunos dap bang cho mha ma yap,
jwangh bang dah huom mha
ma bos tsung soeu ka ngelhoq.
2 Nyang gas Yhensain dah lyi mas xihhonh pyo lha
nyah lyi lyis nyeih nyenh nghamh yoeuh soeu nghuot.
3 Hauh soeu ka jeisyvm mas tsungh toh,Ref 1.3: Yer 17.8
nyah shishenh yah nyang vshih shih las
vhuq eq ma nyhauh dah saiqzains teh nghuot.
Nyang kuot zis dvnganh kuhxing jebais los das.
4 Lhung bang gas housoeh ma nghuot;
lyeis yah muot tangh dah phihsan teh dvnghuot.
5 Housoeh las lhung bang gas soetuon buisnyeis lyis joeng zis xauh das,
yaunos dap bang gas dan bang dah huom mha ma yoh yap das.
6 Khasoeh ge lyis dan bang dah cho lhyi Yhensain seq.
Lhung bang dah cho ka dyoqbis tyamp das.