8
Joeui lhyi Chungh aq
Gyo aq, joeui ka kaiq nyeis,Ref 8.1-3: Sod 1.20-21
seqgyo cho ka nyah thwe zvn nhang.
Nyang gas choyvm jing nyhang thoq mas,
chotsom choyvm mas yap joq.
Dius jens wus vkhau mha wvng loh dah
wus khomh yvm mas eq, nyang kaiq las,
Dius jens eh, ngos namoq lyis lui nyeis;
ngah thwe ka cangsoeu dius jens lyis khyoeuq nyeis.
Joeui ma bos bang eh, zaih cho lhyi seq geh,
koh bang eh, seqgyo ehnyet bos geh.
Gyo geh, khasoeh ge lyis ngos gis thank zis taiq bah,
ngah nhuotkuk haq las jus cho taiq das.
Ngah nhuot gas jyoeng dang taiq,
ngah nhuotkuk gas lhung cho lhyi choqh.
Ngah nhuot mas dang dvnganh gas lyi jus.
Houmha guih cho, vphanh vphuk ma bos.
Seq cho bos das xiklyis houka jus,
seqgyo soeu xiklyis houka bvng bvng nghuot.
10 Ngwis thoq lyis ngos taiq shet cho,
gis thank xing thoq lyis seq cho lhyi lhom yoeus aq.
 
11 Khasoeh ge lyis ngos Joeui ka pvtvmya thoq lyis phauhdap.
Ngos lyis nvng o ja cha yah eq ma yoh byi, ge.
12 Nyang doms taiq: Ngos, Joeui ka jyoeng zaih cho yah dvgeh nyeis las,
seq cho yahge seq nghamh suon yoeuh cho yoh.
13  Yhensain lhyi gyukwoms cho ka ma gis cho lhyi hoeng.
Khwank, lhoq lhoq teh, ma gis cho yahge
hwah lungs nhuot lyis ngos hoeng.
14 Ngos joeui da las hauh zis kuot thuq kat.
Ngos mas seqgyo cho bos. Ngos mas yomsoq bos.
15 Ngos pangh zis yah hwankti jens guon nyeis.
Ngos pangh zis yah guon bang gas jus dah lyi tsain toh.
16 Ngos pangh zis yah zaulo jens,
xamchangh jens, jyoeng dah soetuon bang dvnganh yoh guon.
17 Ngos lyis jyet bang lyis ngos jyet.
Ngos lyis tungh xo bang ngos lyis nyvng.
18 Dis cho yahge nyoqnho ngelang,
goeng dah zisyos yahge nyeisgis yaplhoq cho ngos mas bos.
19 Ngah jyungshuk gas xing, xing gyingh thoq lyis,
ngah jyank masyah yoh zis gas, ngwis gyingh thoq lyis gis.
20 Ngos gas dan cho chank suh,
lyi jus cho chank suh.
21 Ngos lyis jyet bang lyis dis dah vso vlho dyei las
nyamoq dah ziskwi lhyi dyingh nhang, ge.
 
22 Joeui taiq zis gas, Yhensain ka gohlhain dah nyah muh ma kuot shih lyis,Ref 8.22: Nyoq 3.14
nyang cha eq ma kuot shih lyis ngos gas nyang yah dvgeh nghuot.
23 Nyeisjvng ma joq shih lyis,
cangxeih yoq, vcaiq vto masyah ngos lyis toeuq toh.
24 Noq thank thomh jens ma joq shih,
nghuot ya jeis yah dyingh dah jeisthuq dwang jens ma joq shih lyis ngos khoeu los goeus.
25 Boms jens jing jens ma joq shih lyis
ngos khoeu los goeus.
26  Yhensain ka nyeisjvng, pazoe ma kuot shih,
cangxeih dah tsohmop yangh ma kuot shih lyis ngos khoeu los.
27 Nyang maukhung lhyi toh uhlyis ngos houmha bos.
Nyang noq thank thomh mas maunyaus zoh toh uhlyis,
28 Nyang maukhung mha jyommauh toh,
noq thank mas dah jeisthuq dwang lyis goeng nhang uhlyis,
29 Thomh kyo ma lai das cho jeisphauq lyis taiq toh uhlyis,
nyeisjvng vpom xi kuot uhlyis ngos houmha bos.
30 Ngos gas loqmuh dap svra teh nyah vyvm mas nyeis goeus,
nyang gas ngah gvng mas nyeih khanghmuh gaus goeus.
Ngos eq nyah xikkhonh mas vjangh pyo nyeis.
31 Ngos nyang kuot toh mungkvn mas pyo lha
cangsoeu lo jens yah nhaiqdoeus nyeis, ge.
 
32 Housoeh las gvshih ngah lo jens eh, gvshih ngah dang gyo geh.
Ngah cho chank bang gas ngelhoq.
33 Ngos jyauh cho lhyi gyo yoeus las joeui bos geh.
Hauh yvlyis vtyamp.
34 Nyeih khanghmuh ngah yhen khomhbungs mas langh las,
khyam khomh mas zungh zis yah
ngah dang gyo yoeus soeu ka ngelhoq.
35 Ngos lyis xo nyvng soeu hank laus eq kang lhyi xo nyvng.
Yhensain dah nyoqzons doeus zis xauh.
36 Ngos lyis ma xo nyvng soeu hank laus eq nyang nyang dvnos loh.
Ngos lyis hoeng bang dvnganh gas shei zis lyis ngwis, ge.