1 Ngah lo eh, ngah dang lyis tsomh aq, ngos tyingtoh dang nah vkhau mha yung toh aq. 2 Ngos tyingtoh dang chank kuot lyis kang dwis das. Ngos jyauh yvlyis nah nyoqlom lyis teh gomh aq. 3 Ngos jyauh dang lyis soh aq, nah nhaiqlom khau mha lhaih toh aq. 4 Joeui lhyi nhamhmuh lyis teh jyet aq, seqgyo cho lhyi, Nvng ngah buisnoms kau, oen lui aq. 5 Housoeh lyis nyamoq gas nvng lyis wotwu ma gis vmesbih masyah eq, dang yah mhuih chungh dah lvbaus nyhiq masyah eq zungh dyei das.

6 Dvnyeih gas ngah yhen khomhbaiq masyah yoeuh kat lyis, 7 nhaiq ma bos loyvm jens lyis nyvng. Houmha seqgyo cho ma bos dah loyvm dvyuk lyis comh toh. 8 Hauh soeu ka, vmesbih dvyuk dah yhen cho chank loh las cho thunk vmesbih dvyuk dah yhen pheh loh. 9 Houka nyenhthang chotshomp, nyenh soeng soeng noq los yoq nghuot. 10 Nghe nyhiq gungs shunk las mhuih jyomh mes ehnyet bos dah vmesbih dvyuk nyang lyis lvnyap los zes. 11 Nyang gas ma daq xoq ma daq gyuk. Nyah khyei yhen mha ma doengs. 12 Nyang gas vjangh wus talhoeu mha, kaih jang mas nyeis, chothunk khanghmuh gauh langh nyeis. 13 Housoeh nyang gas hau yukgis lyis bvlot nyhik tanh las ma seq xoq dah nyoqnho yah nyang lyis, 14 Khvnyhik ngos nyenstap jyungshuk dyei. Khvnyhik ngos nyhen toh zis gyuot goeus. 15 Housoeh las ngos nvng lyis zes das zis thuq los. Nvng lyis tungh xo lha nyvng goeus. 16 Ngah yhetyos lyis Egutu misyhwiq khohkat mvlhyoeuq yah shunk toh. 17 Ngah yhetyos lyis mura, vjyo, maza xanghshom nhamp toh. 18 Los aq, nvpyo jweh shoq pyo goh, jyet goh goh. 19 Ngah yhensain phoq yhen mha ma nyeis. Nyang gyung xing suh loh goeus. 20 Nyang ngwis thung dyingh dyingh chi loh, lhamhmuh lainh lyis dvjweh los das, ge. 21 Housoeh las nyang lyis dang chau yah, jyoeuq dah nhuotkuk yah mhuih las los nhang goeus. 22 Nyang gas sat das yvmas she loh noeulu teh, twih khyoq yvmas nyhih dah cvt gas nyo nyah jinghloms mas zangh teh dvlhain dvm lyis nyah thang mha chank loh. 23 Nghoq gas shei das zis ma seq lhyik mas lvnyap loh teh, dius eq nyah kang thyet das zis nyang ma seq hauh vmesbih thang mha lvnyap chank loh.

24 Housoeh las, ngah lo jens eh, gvshih ngah dang gyo yoeus geh. Ngah nhuot mas dang lyis kamp gyo geh. 25 Nah nhaiqlom lyis nyah cho pheh vlhaiq loh nhang. Nyah cho pheh vwhang loh nhang. 26 Khasoeh ge lyis nyang gas nyoshoq lyis dvmtap lhain goeus. Nyang sat zis gas moqphung zainsmuh nghuot. 27 Nyah yhen cho ka lopdungs pheh loh, houka shei cho pheh dan jweh loh.