6
Zoehsoe Nhang
Ngah lo eh, nvng gas nah yhenkyoh xiklyis jyen cap das oen yvwons yoeus las dangthoengh toh lyis, nvng nvnyang nhuot mas dang yah lhyik mas nyih das. Nah dangthoengh yah nvng gas nyhik zis xauh das. Nvng nah yhenkyoh loq khau mha jweh goeus ya, o mha gyoh las nah yhenkyoh lyis loh khyoeuq aq. Ngah lo eh, housoeh kuot las nvnyang khyuot yoeus zo aq. Nah nyoqjeih lyis vyhet nhang, nyoqkuk lyis vchenh nhang. Shoh khat soeu loq mas dah cvt teh, nghoq twih khyoq soeu loq mas dah nghoq teh nvnyang luiq los aq.
Lan soeu eh, lvyet jyank mas e aq. Nyah cho lhyi nghamh yoeuh las joeui bos aq. Houka uhjyung ma bos, uhshe soeu ma bos, guon soeu ma bos laus eq, buis gywes nyos lyis nyah wom yahge jyo yhomh nyos lyis nyah zonoms xo tsainh yung toh. Lan soeu eh, nvng khanyhank jweh shoq yhet joq das lah? Yhet masyah khanhamp toq das lah? 10 Nvng housoeh taiq lyis dvsoq yhet, dvsoq muih, loqlom las dvsoq lhain no nyeis shih lyis,Ref 6.10-11: Sod 24.33-34 11 nah shohjyen cho ka khyanktau teh, nyungs cho ka jesgungs chi soeu teh jweh los das.
Lhung Soeu
12 Phauh ma dap dius, lhung soeu ka hwah lungs nhuot yah suh yenh. 13 Nyah nyoq nyik, khyei thoenk, loqnyhauh tuonh zis yah nvng lyis mhuih nyeis. 14 Guih ehnyet bos las, ma gis joeui vjangh da dyei zis yah, dius changh lyis dvyos dvsanh bweh nhang. 15 Housoeh yvmvyah nyah xiklyis yaukyenh shanghsenh cho nyetlos nyettant jweh los das. Nyang gas ma yoh yhoh lo shoq nyetlos nyettant dyoqbis tyamp das.
16  Yhensain hoeng lha choqh zis nyhet ja nghuot.
17 Khwank dah nyoqnho,
hwah dah lhyo, yobos ma bos dah suih huot loq,
18 Lhung cho nghamh toeuq dah nhaiqlom,
ma gis yvmas lvnyap wuih dah khyei,
19 Hwah taiq dah ma ying kanghjyoeng,
boekyis mas gang lvn cho bweh nhang soeu tsain nghuot.
Nyi Shuot Cho Zoehsoe
20 Ngah lo eh, nah uwus taiq dang chank kuot aq. Nah ungwes jyauh cho lhyi eq vtyamp. 21 Nah nhaiqlom mas vjangh twih toh aq; nah lainzain mas wuot toh aq. 22 Nvng suh e lhyi hauh zis nvng lyis choshe das, yhet lyis nvng lyis zungh das, soh los lyis nvng yah jisgoh das. 23 Khasoeh ge lyis hai tyingtoh dang gas nyibung, hai jyauh cho ka bvng zis nghuot. Yobos tuonhshet las jyauh zis gas kang dwis cho nghuot. 24 Hai tyingtoh dang yahge jyauh cho ka ma gis dah vmesbih yahge mhuih chungh dah soeu nyi dah lhyo mhayah zungh dyei das. 25 Nah nhaiqlom mas nyang yungh zis lyis nyetnau cho vbos. Nyah nyoqkuk yah nvng lyis vnyih nhang. 26 Vbusbih gas nghe nyhiq nghoh das xiklyis ohlhyoq dvlhyoq phauh yah yoh nghoh laus eq nyi shuot zis gas nyah phauhdap kang dyuk loh.
27 Nvng gas dyimis ma ngeh shoq nah sainhkhonh mas nyi yoh chi los das lah. 28 Khyei ma ngeh shoq nyigywe mas yoh nang das lah. 29 Yhenkyoh dah yhensain nyhiq yah yhet soeu ka houyah dvyhangteh nghuot. Nyang lyis tanh soeu hank laus eq joeng zis jyoengh xauh das. 30 Khauh soeu ka ngvn las nyang nhaiqtap shoq khauh zo lyis dius jens nyang lyis diusngis ma khyoq. 31 Nghuot laus eq nyang lyis nyvng goeus ya, nyang nyhet huon cap chah. Nyah yhen mha joq vyhang dvnganh dyei tyamp chah. 32 Nyi shuot soeu hank laus eq seqgyo cho ma bos. Housoeh kuot soeu ka nyah dyos lyis mhont nyeis. 33 Dvm yahge nyoqnho ngelang pyaih zis xauh das. Nyang xauh dah xoqphuh cho ma yoh buot tyamp. 34 Khasoeh ge lyis noh cho ka yhensain phoq dah nhaiqlom tsoeu lha, lvto phuk nyeih lyis nyang nhaiq ma nyen das. 35 Yaukhyauh zis cha eq ma lhom yoeus, nvng jyungshuk nyoshoq dyei laus eq nyang nhaiqyo ma bi das.