30
Agur dah Dang
1 Heika Yake lo Agur dah noq dah tyingtoh dang nghuot.
Mangso ka ngos yah dvgeh ma nghuot.
Mangso ngos yah dvgeh ma nghuot yvmvyah ngos sainh khauq changh ma bos mus. Hwangh nyeis.
2 Ngos gas dius thoq lyis gaunyhauq teh zes doeus.
Dius mas bos vvng dah seq cho ngos mas ma bos.
3 Ngos gas khanhamp eq chah joeui ma xuq ku,
Ngos Mangso yah sen cho cha eq ma seq.
4 Maukhung yah sen dah seq cho joeui lhyi top hank yoh seq lah?
Lyeis lyis loq mas hank tsop toh ku?
Jeis lyis misseh yah hank koek toh ku?
Nyeisjvng vkyo lhyi hank kyoq toh?
Nyang hank nghuot? Nyah lo gas hank nghuot? Jyoengh nvng seq.
5 Mangso ka nyang toh dah dangthoengh khanghmuh lyis dang jings nhang. Nyang gas nyang gomh cho mha khau nges gus xo bang dvnganh xiklyis gos teh nghuot.
6 Nyang khanhamp eq ma taiq ku dah cho dvja lyis, nyang taiq goeus oen top taiq lyis gas, nvng hwah soeu nghuot yvlyis nyang tuonh shet las nvng lyis nyho lha jyauh das.
Gohtoeu Sodang
7 Mangso eh, ngos ma shei shih lyis ngos dung zis aiq ja dyei aq.
8 Ngos lyis hwah dang taiq yvmvyah we loh nhang aq. Dis cho yahge nyungs cho eq ngos mas ma bos bas jungh. Housoeh las ngos mas chah nyeis dah wom lyis dvdyei aq.
9 Ngos hauh thoq lyis zes las yoh los lyis, Ngos nvng lyis ma o oen zangh sang das. Nghuot laus eq ngos shohjyen nyeis lyis gas, ngos khauh las ngah Mangso lhyi vxoq vcaiq kuot das.
10 Yhensain xikkhonh mas nyah jyeidwis lyis khanhamp eq yobos huon dang loeus vmus. Housoeh kuot lyis nvng nhoengh zis xauh las hauh yvlyis xauh kham das.
11 Uwus moq lyis nhoengh las ungwes lyis eq phauhtap cho ma seq chixoeuq bang bos.
12 Nyamoq gas loh thank vchoqh vlhauq bweh nyeis lyis lhoqshang nyeis ge nghamh zo bang bos.
13 Nyamoq gas, nyamoq kha iq gis! Nyamoq gas svsoh gis ge nghamhzo bang eq bos.
14 Shohjyen bang yahge nyungs bang lyis nhaiq ma seq nyen joeui yah zaiq zo bang bos. Housoeh kuot zis gas nyamoq dah womdau khoeu muh nghuot.
15 Huot mas lonyi aiq doeu yoh; hauh aiq doeu dah nyings gas, Ngos lyis dyei aq ge zis tsain nghuot.
Nhaiq ma yoh tap zis nyei ja bos,
16 Shei mau,
Dyeithonh,
mau ma wus, kyuk dah maunyeis yahge
ma yoh sat dah dainhjeis nyi tsain nghuot.
17 Nyah uwus lyis xih, nyenhkyi bos dah nyah ungwes dang lyis nyhap soeu hank lyis laus eq ye dah kvnhoq gas nyah nyoqjeih lyis chweh phuk dyei las, lvngda eq nyah mvng zo tyamp dyei das zis mon.
18 Ngah xiklyis ma thoq seq dah mauhphoh zis nyei ja eq bos.
19 Maukhung mha dang dah zonsmuh,
luktyoq mas loh nyeis dah lhangnyis,
thomh mas nyah cho chank loh nyeis dah sangpho,
ngwis goh dah vbusbih yahge vmesbih cho tsain nghuot.
20 Heika dang ma jings dah yhensain nyhiq dah wotwu tsain nghuot. Nyang gas lvng shuot lho lha gungs cheih thang lhyi, Ngos cha ma shuot, ge taiq nyeis.
21 Nyeisjvng nyang ma yoh jhen zis nyei ja bos. Houka,
22 Hwankti bweh los dah jons,
jo jo xauh zo dah koh soeu,
23 Jyetdap ehnyet ma kham yoeus dah phoengh wvng vmesbih,
yhensain nyih dah joqyos mas xauh sain yoeus dah jyeidwis nyelo, tsain nghuot.
24 Nyeisjvng thoq mas ngis laus eq joeui svsoh bos dah gaunyhauq nyei ja bos.
25 Houka, yom ma bos laus eq, gywes nyos lyis nyamoq zo das xiklyis
zonoms seq cvvq toh dah lvyet;
26 Yom nyoshoq ma bos laus eq, lukkhyung mha nyamoq xiklyis yhen seq kuot dah lukkhyung gyuqxauh;
27 Hwankti ma bos laus eq nyamoq dvnganh dvgeh seq duon loh dah janghgyik;
28 nah loq yah yoh zwi toh laus eq hwankti yhen mha nyeis dah zvngkyuk tsain nghuot.
29 Nyamoq suh los lyis gohtseq yoeuh tsuk toh gis zis nyei ja eq bos.
30 Houka, yewus dvnganh mas yom bos thank nghuot las hank lyis eq ma gyuk dah khangkhyi;
31 Shvbeq;
yomzuk zuk suh yenh dah gyoq phoq yahge,
Dius jens xikkhonh mas yap joq dah hwankti tsain nghuot.
32 Nvng lhoq lhoq teh ehnyet nyhang lha koh zis yah ma gis dah muh lyis kuot das zis nghamh toeuq nghuot lyis, hauh yvlyis no toh las nghamh yoeuh aq.
33 Nvng noeu nauh lyis bat lyis nauhcoeu thuq, dvyuk dah nho lhyi chwiq lyis suih thuq. Nvng nhaiqyo cho lhyi thauh pau lhyi yaukyenh shanghsenh cho xauh nyeis.