27
Dvsoq lyis yangh cha bweh das zis nvng ma seq yvmvyah phvnaq nyeihyo xiklyis khanhamp eq vmoengs.Ref 27.1: Yak 4.13-16
Gohyuk nvng lyis chungh bas jungh, nvng nah nhuot yah nvnyang vchungh zo. Gohyuk yah nvng lyis chungh bas jungh; nah nhuotkuk yah nvnyang vphau zo, lvbaus yah nvng lyis chungh bas jungh.
Luk gas lyei, sihsho eq jvngnyoq nang. Nghuot laus eq koh soeu lhoeu thuq kat dah soe ka hau aiq ja thoq lyis zes lyei.
Nhaiqyo zis gas lhoeng lha yoh thyoqpi laus eq, noh cho dah thyoqpi zis gas ma yoh byi shoq zes xunghxent.
Dvyuk yuk lyis bvng bvng soq dyei zis gas, Haih soeu ngah thoq mas gis dah ehnyet cha ma bos, ge nghamh nhang das thoq lyis zes gis.
Buisnoms gas nvng lyis nos nhang laus eq nah thoq mas gis ehnyet bos. Nghuot laus eq jeswus nah kvtoq loq gaiq lyis hauh yvlyis zaih aq.
Nvng zos jo joq lyis dyoyhei lyis yangh ma mes yoeuh laus eq, yuot los lyis khoh dah zonoms yangh chau joq.
Yhen mhayah we pheh gyung suh loh soeu ka, nyah sot masyah dang thuq loh dah nghoq teh nghuot.
Xangh coeu yahge xangh shom ka nvng lyis ehnyet yoh pyo nhang laus eq, yaukyenh shanghsenh cho ka nah ehnyet nyenstap cho lhyi thyoq tyamp dyei.
10 Nah buisnoms yahge nah uwus dah buisnoms jens lyis vtohnyhik. Nvng yaukyenh zis xauh lyis nvng lyis pangh das xiklyis nah vmang vnoeuh jyank mas vloh sang. Ni nvm mas dah nah yhenkyoh gas we nyeis dah nah vmang vnoeuh thoq lyis zes yoh pangh.
11 Lo eh, joeui bos aq; housoeh lyis ngos yoh gaus das. Ngos lyis yobos xo soeu hank lyis laus eq ngos yoh phuk taiq das.
12 Dolhain bang gas jweh los das yaukyenh cho lhyi uhlhomh seq las jhank loh laus eq. Joeui ma bos soeu ka houmha wvng loh las thang pheh dvauhuiq.
13 Lvbaus xiklyis jyen kham soeu hank laus eq, nhaiq ma bos las jyen doms yoh cap das nyhenshang nyang yoh vyhang lhyi tank toh nhang gis.
14 Nvpsangh noq yah nah dyenschangh lyis kaiq jeshuh zis yah nhauh toq zis gas nyang lyis nhoengh zis yah dvyhangteh dvnghuot.
15 Lop las zoeu dah yhensain nyhiq gas, mau gis wus nyeih lyis ma dyet lo gyoh dah mau teh nghuot. 16 Nvng, nyang lyis khasoeh yoh sam nhang das lah? Nvng gas lyeis lyis tomp toh ku lah? Nghuot ya coeu lyis tsop toh das zis yomkat ku lah?
17 Thyeq lyis thyeq yah yoh swih teh, dius dah seq cho lhyi nyang changh nyang masyah yoh xuq goh.
18 Maiphang zains dyangh kat aq, housoeh lyis maiphang shih xauh zo das. Nyah yhensain lhyi zungh dah jyeidwis gis gas nyoqnho dyei zis xauh das.
19 Jeis mas nvng nyvng siyet gas nah nyoqnho nghuot; nah ehnyet mas nvng yoh nyvng dah siyet gas nvnyang nghuot.
20 Dius dah omes cho ka shei mau teh nghuot las, houmha vjangh yah wvng shih das joqyos nyoshoq bos.
21 Ngwis yahge xing lhyi nyi yah kyink teh, dius lyis gas chungh dah dang yah kyink yoeuh.
22 Nvng koh soeu lhyi shei das shoq bat laus eq nyah dah koh ehnyet lyis ma yoh bat thuq tyamp dyei.
23 Nah yvng yahge gaunyhauq phung jens dah cho vlhomuh seq toh aq. Nvng hauh yvlyis zaih lha nyhoeu tsoh aq. 24 Khasoeh ge lyis zisyos gas vjangh ma yoh joq. Dius nyau jens yangh vcaiq vto ma yoh goeng joq. 25 Nvng noeu mhanh dye yet thang lhyi, mhanh vsaiq doms yuk los nyeis lyis langlyamh mas dah mhanh yet yoeus. 26 Nvng nah yvng jens masyah yvng mauh yah dyimis yoh kuot yoeus; nah shvbeq dvkhamh ungh dah ngwis yah maunyeis xauh wis yoeus. 27 Nyet dah shvbeq masyah nvng yahge nah yhenbang, nah jyeidwis nyhiq jens xiklyis beq nauh dyei das.