18
1 Gohyuk yah ma dapgoh soeu ka nyah ehnyet o zis kyingh xo lha yuk khanghmuh seq zis jus ge cho lhyi xam ma xonh das.
2 Koh soeu ka seqgyo cho mha nhaiq ma wvng, nyang nghamh zis kyingh dvtaiq kyoh nyeis.
3 Dius dvyuk lhung cho dvja ja kuot lyis dius jens nyang lyis dius goes yoeuh. Dius dvyuk xoqphuh cho dvja ja kuot lyis dius jens nyang lyis jwangh.
4 Dius dvyuk dah nhuot mas dang gas nauh dah jeis nghuot. Joeui bos soeu dang gas yaus nyeis dah jeislvng teh cingh cingh nghuot.
5 Soetuon cho mha dan soeu somh shoq yobos bos soeu lhyi nyoqnho dyei zis gas ma jus.
6 Koh soeu dah nhuotkuk gas jaus seq xo, nyah nhuot gas wuseh dung nyeis.
7 Koh soeu ka nyah dang yah thyoqpi nyeis; nyang gas nyah dang dah lhyik mas nyih.
8 Nhuotsot sot dang gas nghamh dah zonoms teh nghuot; dius jens gas loeusmus lyis pyo jyoeng.
9 Nyah muh mas lan zis gas, dvyuk yuk yau cho zainsmuh kuot teh ma gis zis nghuot.
10 Yhensain dah nyings gas goeng dah tyoeuq zvm teh nghuot. Dan bang houmha wuih loh lyis gau joq.
11 Dis bang nghamh zis gas, nyamoq dah zisyos gas goeng dah wus teh nghuot, hauh zis gas nyamoq lyis gos dyei dah wusciank nyhang nghuot, ge.
12 Dius dvyuk gas khwank lyis nyang dyoqbis loh das; nghuot laus eq nyang nyhen mha gyoh lyis nyoqnho ngelang yoh das.
13 Ma gyo yoeuh shih lyis dang phuk zis gas koh, nyang xoqphuh das.
14 Nosthyoh uhlyis nvng kang dwis mes ehnyet gas nvng lyis yoh thuk toh, nghuot laus eq nvng ehnyet thank lyis gas kang ma yoh dwis.
15 Yik soeu ehnyet gas seq cho lhyi yung toh. Joeui bos soeu no gas seq cho lhyi chank xo nyeis.
16 Dius dvyuk dah jyungshuk gas nyah xiklyis diuszains jens jyank mas shwih wvng das cho khomh phank zis nghuot.
17 Soe cangxeih los taiq soeu ka nyang lyis kauq soeu ma los nyeigyo shih lyis gas jus teh nghuot joq.
18 Doeugoh zis gas taiq nyinghnyo goh cho lhyi yoh sam nhang, yombos dah kauqgoh bang jo mas eq yoh thyet dyei.
19 Goeng dah wus lyis zan yoeus das thoq lyis cu goh dah dyenschangh yah nyenstap goh das zis zes yau. Taiq nyinghnyo goh zis gas dyenschangh lyis thyeq khomhkyanknote 18.19 Thyeq khomhkyank ge zis Hebre mas ma bvng. kyank teh kangh dyei.
20 Dius jens gas nyamoq taiq zis yah dvyhangteh phauh shangh zis xauh das.
21 Lhyo mha shei nhang yomsoq yahge kang dwis nhang yomsoq bos. Hauh yvlyis jyet bang gas nyah vshih xauh zo das.
22 Yhensain nyhiq xo nyvng soeu ka zisyos xo nyvng soeu nghuot. Nyang gas Yhensain jyank masyah yoh dah jyungshuk nghuot.
23 Nyungs soeu ka nhaiqnyen aq ge khyoeuq nyeis, dis soeu ka nhant las dvphuk taiq.
24 Dyenschangh dvyhamh gas ma doengs; nghuot laus eq vmang vnoeuh thoq lyis zes dapgoh dah dyenschangh eq bos.