11
1 Yhensain xiklyis ma jus dah jvng gas vchoqh vlhauq nghuot. Nyang jus dah jvng lyis nhaiqdoeus.
2 Khwank bang lvnyap xoqphuh das. Ehnyet nyhen mha gyoh soeu ka joeui bos.
3 Dan bang dah dang jings cho ka nyamoq lyis shwih uhshe dyei. Nghuot laus eq lom ma luk bang dah ehnyet guih cho ka nyamoq lyis dyoqbis nhang.
4 Soetuon buisnyeis lyis dis cho ka vkyuh ma dyei. Nghuot laus eq dan cho ka shei masyah khyuot yoeus.
5 Dius gis dah dan cho ka nyang lyis shwih uhshe dyei. Lhung bang gas nyamoq nyang dah lhung cho mha dvlains loh.
6 Ehnyet zungh bang dah dan cho ka nyamoq lyis khyuot kat. Lom ma luk bang dah nyetnau cho mha nyamoq nyang dvnyih.
7 Lhung soeu shei lhyi nyah dah nghamhloms cho dyoq tyamp; Nyah yomsoq masyah nghamhloms toh cho dvnganh vkom bweh.
8 Dan soeu ka yaukyenh cho mhayah khyuot zis xauh las nyah gungsthaiq lhung soeu xauh kham zo das.
9 Mangso ma bos soeu dah nhuot gas nyah yhenkyoh lyis dyoqbis nhang. Nghuot laus eq dan soeu ka seq cho yah luiq los das.
10 Dan bang nyeisgis yaplhoq lyis wus gonh gauslaus nyeis. Lhung soeu dyoqbis loh lyis houmha kaiq gaus nyeis.
11 Ehnyet dan soeu shvmanh yoh gvng mas wus gas chunghtoq zis xauh. Lhung soeu dah nhuot masyah gas hauh yvlyis dvtoeu mhuk tyamp.
12 Joeui ma bos soeu ka nyah yhenkyoh lyis ma gis zis taiq. Yik soeu ka samlo dvnyeis.
13 Loeusmus yenh soeu ka zauh toh cho taiq thuq kat. Nghuot laus eq yoh loms soeu ka zauh toh cho lhyi ma taiq thuq.
14 Joeui yoh dyei bang ma bos lyis dius nyau somh loh. Nghuot laus eq joeui da bang nyo lyis jesluiq.
15 Lvbaus xiklyis kham soeu ka hauh nyhenshang shanghsenh top nyang xauh das. Nghuot laus eq housoeh teh kham yvlyis hoeng soeu ka jes ma bos.
16 Nhaiqbos vmesbih gas nyoqnho ngelang yoh, nhaiq ma seq nyen soeu ka dis cho kyingh dvyoh.
17 Nhaiq seq nyen soeu ka nyah gungs lyis vkyuh dyei. Lhoeng soeu ka nyah gungs lyis yau dvdyei los.
18 Lhung soeu ka uhkung phauh cha ma yoh das. Nghuot laus eq dan cho dah jyo khyoq soeu ka goengtoenk joq dah phauh shangh zis xauh yhomh das.
19 Dan jyoeng soeu ka kang yoh. Ma gis cho chank xo soeu ka shei cho pheh dvloh.
20 Yhensain ka ehnyet guih bang lyis choqh. Yobos huon dais ma bos cho chank bang lyis nyang nhaiqdoeus.
21 Lhung bang gas yobos ma xauh ma mus das. Nghuot laus eq dan bang dah vnyau vshih gas luiq das.
22 Yungh laus eq wot ma wons dah vmesbih gas wuq nho mas lhangh dah xing khwank teh dvnghuot.
23 Dan bang dah omes cho dah vthang ka gis cho kyingh nghuot. Lhung bang dah nghamhloms cho dah vthang ka nhaiqyo chonote 11.23 Nhaiqyo cho, nghuot ya Mangso nyamoq lyis joeng, ge zis nghuot. dvnghuot.
24 Dius dvyuk gas dyei tyamp laus eq zes yoh los; gohtoeu dvyuk gas soeu lhyi ma gvm, xungh nyeis laus eq shohjyen loh.
25 Nyoshoq dyei gvm soeu ka dis los das, gohyuk lyis pangh soeu ka nyang eq pangh zis xauh das.
26 Jyo lhyi phauh nyo nyo yah ungh das ge zwizains toh soeu ka nhoengh xauh das. Nghuot laus eq chah uhlyis jyo ungh dyei soeu ka shvmanh zis xauh das.
27 Gis yvlyis kuot soeu ka nyoqnho yoh das: Ma gis yvlyis kuot soeu ka yaukyenh zis dvxauh das.
28 Nyah zisyos lyis loms soeu ka lains das. Nghuot laus eq dan bang gas nyaus dah saiqhuq teh jebais los das.
29 Nyah yhenbang lyis lhoeu yau soeu ka vthang chon mha cha eq ma nghuot lo. Koh soeu ka joeui bos soeu dah jyeidwis duot das.
30 Dan cho ka kang dyei. Dius dah kang lhyi yoh khyuot yoeus soeu ka joeui bos.
31 Dan bang nyeisjvng mas phauh shangh zis xauh lyis gas lhung bang yahge yaunos wons bang gas joeng zis jyoengh xauh das. Ref 11.31: 1Pt 4.18