36
Yhenloh vmesbih jens dah Vso
1 Yosep lo Manase nyeilo Makhir lo Gilead vhuh yhenbang dah uhjyung jens gas, Moshe yahge gohtoeu uhshe bang jyank mas loh.
2 Nyamoq taiq zis gas, doeugoh zis yah Israel jens lyis hau vso maunyeis gvm dyei das cho, Yhensain tying toh. Ngamoq dah boek Zelophehad xiklyis vso maunyeis, nyah lonyi jens lyis dyei das cho eq Yhensain nvng lyis tying toh.Ref 36.2: Gyu 27.7
3 Nghuot laus eq nyamoq gas gohtoeu vkoq yah phoengh wvng lyis nyamoq dah vso maunyeis gas hauh vkoq yah sen loh das. Housoeh ngamoq lyis dyei toh dah maunyeis gas yoms loh das zis soh aq.
4 Jubili zvn jweh lyis eq, ungh goeus dah vyhang dvnganh gas nyah yhensain cauh jyank mas tauh dyei chah las Zelophehad lonyi jens dah vso maunyeis gas, nyamoq phoengh wvng dah vkoq mas lung doengs joq lo das las, ngamoq vkoq mas zis dyuk loh das, ge.
5 Housoeh las Moshe ka Israel jens lyis, Yhensain jyank masyah tying dang o mha dyei toh. Nyang taiq, Manase vkoq taiq zis jus.
6 Housoeh las Yhensain taiq zis gas, Zelophehad lonyi jens gas nyamoq o mes bang hank jyank mas laus eq gis loh; nghuot laus eq, nyamoq vkoq mas kyingh dvgis loh.
7 Israel yuk khanghmuh dah vso maunyeis gas nyah vkoq yah sen yvmas joq das.
8 Israel vkoq mas vso maunyeis yoh dah vmesbih yuk khanghmuh gas hauh vkoq yah sen dah vbusbih yah phoengh wvng chah. Heisoeh khyvlyis Israel dvnganh gas nyamoq dah phauh thyeih vso maunyeis yoh sain das.
9 Hauh vso maunyeis eq dvkoq masyah gohtoeu dvkoq mas ma thot lvng das. Nyang koq nyang vso yoh tsoq sain das, ge.
10-11 Housoeh las Yhensain Moshe lhyi taiq vgus, Zelophehad lonyi jens Mala, Tirza, Hogla, Milkha, Noa moq gas nyamoq phvthank phvlvt moq dah lo jens yah phoengh wvng.
12 Housoeh Yosep lo Manase vkoq mas dah vhuh bang yah phoengh wvng las nyamoq dah vso maunyeis gas nyamoq uwus moq vkoq mas yoh doengs joq.
13 Heika Yerikho masyah Yodan lvng thyitvp, Moab pa mha Yhensain Moshe lhyi yah Israel jens lyis dyei toh dah lyi yahge tyingtoh dang nghuot.