24
Gvshih Balam gas nyang Israel jens lyis shvmanh dyei das zis Yhensain o yvlyis seq lyis, nyang xik pheh teh vlho xo das xiklyis ma loh lo. Nyang mhanhdyvp pheh xoeu toh. Nyang Israel jens nyang koq nyang dvp thoeng toh yvlyis nyvng. Housoeh Mangso dah Dyos nyang lyis joeu las, Nyang hai pe cho thuq kat.
Beor lo Balam dah loeus, De de yoh nyvng soeu dang nghuot.note 24.3 De de yoh nyvng soeu, nghuot ya nyah nyoq chenh toh soeu.
Mangso cha taiq nyeis yvlyis hank yoh xauhgyo,
ngos nyoqjeih yoeuh tsuk toh las muis loh lyis,
Maukhung Jesphung Mangso jyank masyah nyoqnyvng mas xauhgyo.
Israel dah zvng jens gas yungh joq!
Houka dyoms zains jens, jeislvng yvm mas khyam,
Yhensain xoh toh mvza zains,
jeisyvm mas dah arit zains teh tsain nghuot.
Nyamoq lyis mau nyoshoq wus dyei das,
nyamoq dah jyo jeis gis yvmas khyoq das.
Nyamoq hwankti ka Agag thoq lyis kuhxing das,
nyamoq dah munghdan svsoh lvm das.note 24.7 Haih sonzoh Hebre mas bvng bvng ma nghuot.
Mangso ka nyamoq lyis Egutu masyah shwih thuq los las,
nyamoq xiklyis noeuphuk teh zan dyei.
Nyamoq gas nyamoq dah jeswus lyis nyhau tyamp,
Nyamoq shohyau lyis khyauh tyamp;
nyamoq nyo lyis vdyis vmons kuot tyamp.
Hauh dius nyau gas yombos khangkhyi teh nghuot.Ref 24.9: Vpm 12.3, 49.9
Hauh zis yhet joq lyis nyang lyis hank eq ma womh nhauh.
Israel lyis shvmanh dyei soeu ka shvmanh zis xauh bas jungh;
Israel lyis nhoengh soeu eq nhoengh zis xauh bas jungh, ge.
10 Balak gas nhaiqyo las nyah loq tsop zis yah Balam lyis taiq, Ngos nvng lyis ngah jeswus lyis nhoengh dyei aq oen dvkhi lhyi, gvshih nvng hauh gungsthaiq somh lhain shilo nyamoq lyis shvmanh dyei. 11 Gvshih nah yhen pheh loh lo aq: Ngos nvng lyis phauh shangh das oen dangthoengh toh. Nghuot laus eq Yhensain ka nvng phauh shangh zis yoh das cho kyamp toh, ge.
12 Balam toeuh zis gas, Ngos nvng nhang dah loeuskyoh bang lyis taiq goeus: 13 Namoq dah hwankti yhen mha dah ngwis xing dvnganh ngos lyis dyei lyis yangh, ngah ehnyet yah dvja ja kuot zis yah Yhensain tying dang domsyos ma gyo ma yoh kuot: Yhensain ngos lyis taiq nhang zis kyingh dvtaiq das.
Balam Thang thank Pe
14 Balam gas Balak lyis taiq: Gvshih gas ngos ngvnyang dius jens jyank pheh tauh loh lo das. Nghuot laus eq ngos ma loh shih lyis thang pheh Israel dius jens gas nah dius jens lyis Khasoeh kuot das zis ngos nvng lyis zaih nhang, ge. 15 Housoeh nyang haih pe dang thuq los:
Beor lo Balam dah loeus, dede yoh nyvng soeu dah dang nghuot.note 24.15 De de yoh nyvng soeu, nghuot yah nyah nyoq chenh toh soeu.
16 Mangso taiq nyeis zis yoh xauhgyo soeu,
Nyhang thank soeu jyank masyah seq cho lhom yoeus soeu,
ngos nyoqjeih yoeuh tsuk toh las muis loh lyis,
Maukhung Jesphung Mangso jyank masyah nyoqnyvng nyvng.
17 Ngos jweh los das shishenh lyis yoeuh kat lyis Israel dius nyau lyis nyvng,
hauh dius nyau mas bvng dah kyi teh dah hwankti thuq los das.
Nyang gas Israel masyah hauh kyi teh thuq los das.
Nyang gas Moab uhshe bang lyis zan das,
Shet dius jensnote 24.17 Nyamoq gas khwank las thyoq zo bang nghuot. dvnganh lyis bat khyoq das.
18 Nyang Edom mas nyah jeswus lyis ung das.
Nyamoq dah mau lyis nyah zisyos kuot das.
Hauh gyo lyis Israel gas tsoq las ung das.
19 Israel dius nyau gas nyamoq lyis nang nheh das,
dvyuk eq ma nyet lo shoq mhont das, ge.
20 Hauh thang lhyi Balam gas nyah nyoqnyvng mas Amalek jens lyis nyvng las hai pe cho thuq kat:
Amalek dius nyau gas dvnganh mas yomsoq bos thank soeu nghuot.
Nghuot laus eq thang thank lyis nyamoq vcaiq vto dyoq dyuk das, ge.
21 Nyang nyoqnyvng mas Ken jens lyis nyvng las hai pe cho thuq kat.
Nvng nyeis jang jesluiq.
Nyhang dah luktyoq mas joq dah sot teh jesluiq.
22 Nghuot laus eq nvng Ken ka monh loh das.
Asiria yah nvng lyis shwih jons loh das,note 24.22 Haih sonzoh Hebre mas bvng bvng ma nghuot. ge.
23 Balam pe cho thuq kat shih. Mautsung pheh huom nyeis dah dius jens gas hank nghuot lah?
24 Kupru masyah sangpho ji las nyhenh wvng los das bang nghuot.
Nyamoq Asiria yahge Eber mau lyis ung das laus eq,
nyamoq vcaiq vto dyoqbis das, ge.
25 Hauh thang lhyi Balam gas sont las yhen pheh tauh loh; Balak eq nyah cho pheh loh.