18
Phudyei bang, Lewi jens Yvwons
Yhensain Aron lyis taiq zis gas, Nvng, nah lo jens yahge Lewi jens gas ngah xikkhonh Zvng mas phuqsoe cho yah sen dah yobos kham chah; Phudyei muh yah sen lha phuqsoe yvmas dah yobos gas nvng yahge nah lo jens kyingh kham chah. Nvng yahge nah lo jens Zvng mas phuqsoe uhlyis namoq lyis pangh las namoq yah dvgeh zwi das zis Lewi vkoq mas dah boekyis jens lyis shwih los aq. Nyamoq gas nah loq o mha nyamoq dah yvwons yoeus das. Zvng xiklyis eq nyamoq dah yvwons yoeus das. Nghuot laus eq gyingshang joqyos mas dah vyhang, nghuot ya phon mha ma gis thungh tanh. Nyamoq thungh tanh lyis nyamoq eq, namoq eq sat zis xauh das. Nyamoq gas nvng yah dvgeh Zvng mas phuqsoe chah dah nyamoq yvwons lyis wons wuq das. Nghuot laus eq toeuq toh zis ma nghuot bang nvng yah ma gis zwi. Nvng yahge nah loloeu jens kyingh hau Gyingshang joqyos yahge phon xiklyis yvwons yoeus las kuot chah. Housoeh lyis Israel dius jens thoq mas ngah nhaiqyo zis ma jweh das. Ngos gas nah boekyis Lewi jens lyis Israel jens masyah khyen lha namoq lyis jyungshuk khyvlyis dyei soeu nghuot. Nyamoq lyis ngah jyank mas kyauh toh las nyamoq Zvng mas nyamoq dah yvwons muh yoh wons wuq. Nghuot laus eq nvng yahge nah loloeu jens kyingh phon yahge gyingshang thank joqyos yah sen dah phudyei muh yvwons dvnganh wons wuq chah; Ngos namoq lyis phudyei muh jyungshuk dyei toh yvmvyah houka namoq yvwons nghuot. Ma toeuq toh soeu hank eq gyingshang vyhang mha ni loh lyis sat zis xauh das, ge.
Phudyei bang Gvmboms
Yhensain Aron lyis taiq, Lomhxangh khyvlyis ma ngheq, ngos lyis lhyenwhei dyei dah vlu dvnganh gas ngos nvng lyis dyei yvlyis soh aq. Hauh zis nvng yahge nah vshih jens lyis vcaiq vto gvmboms khyvlyis kyauh goeus. Phon mha ma ngheq, gyingshang thank o mha taiq dah jyungshuk gas namoq yah sen. Houka zonoms jyungshuk, yaunos jyungshuk yahge yobos khyuot jyungshuk tsain nghuot. Gyingshang jyungshuk khyvlyis ngos lyis dyei zis dvnganh nvng yahge nah loloeu jens yah sen. 10 Namoq hauh yvlyis gyingshang joqyos mas zo chah. Hauh zis yukgis lo jens kyingh dvgis zo; hauh zis gyingshang oen nghamh chah.
11 Hauh thoq lyis Israel jens ngos lyis dyei dah gohtoeu lhyenwhei vlu eq namoq zis nghuot das. Ngos hauh zis nvng yahge nah loloeu lonyi jens lyis jweh los dah shishenh dvnganh mas dyei toh. Nah yhenbang mas gyingshang bang dvnganh gis zo.
12 Dvzvn dvzvn Israel jens ngos lyis dyei dah cangxeih thuq los, gis thank tsanlun coeu, zvbiq yahge zonoms dvnganh ngos nvng lyis dyei. 13 Hau dvnganh nvng yah sen. Nah yhenbang mas lhoqshang bang yuk khanghmuh gis zo.
14 Israel jens ngos lyis kyauh zis dyingh dyingh dvnganh eq namoq yah sen.Ref 18.14: Lew 27.28
15 Israel jens ngah jyank mas chi los dah loxeih, nghuot ya gaunyhauq suot xeih gas namoq yah sen. Nghuot laus eq loxeih lyis doms khyuot nhang chah. Ma lhoq ma shang dah gaunyhauq vxeih lyis eq doms khyuot nhang chah. 16 Loshang jens lyis lhamhmuh dvkhyvp bos lyis gyingshang joqyos mas thyet dah kya yah dvyhangteh ngwis kyvp oeng koeuq yah doms khyuot das. 17 Nghuot laus eq noeu, yvng, shvbeq vxeih gas ma gis khyuot, houka ngos yah sen lha phudyei chah. Nyamoq dah suih phon mha doeuh gyon thang lhyi nyamoq dah coeu lhyi zonoms jyungshuk xangh khyvlyis ngos lyis nhaiqdoeus nhang das xiklyis ngheq dyei chah. 18 Lhyenwhei jyungshuk sainhkhonh yahge loqyos bungssan teh hauh shoh gas nvng yah sen.
19 Israel jens ngah jyank mas chi los, lhyenwhei vlu dvnganh, jweh los das shishenh dvnganh mas ngos nvng lyis eq, nah loloeu jens, lonyi jens lyis eq dyei toh. Heika nvng yahge nah vshih jens yah kuot toh, ma dyoq loh dah thanghchvp nghuot, ge.
20  Yhensain Aron lyis taiq, Israel jens sain dah mau mas, nvng sain das zisyos cha eq ma xauh yoeus das. Vso maunyeis eq ma toeuq dyei das. Ngos Yhensain ka nvng mas chah nyeis zis dvnganh nghuot.
Lewi jens Gvmboms
21  Yhensain taiq, Israel jens ngos lyis dyei dah ciboms dvboms ngos Lewi jens lyis dyei goeus. Heika nyamoq ngah xikkhonh Zvng muh lyis loqzamh zwi las wons wuq dah xiklyis dyei zis nghuot.Ref 18.21: Lew 27.30-33; Lyi 14.22-29 22 Gohtoeu Israel jens gas Zvng mas ma gis ni loh. Housoeh ni loh lyis nyamoq nyang shei dah yobos zangh das cho dvshe los. 23 Gvshih masyah Lewi jens kyingh Zvng lyis loqzamh zwi las hauh yvlyis yvwons vlhomuh yoeus chah. Heika vjangh joq dah lyi nghuot. Nyah vshih jens lyis eq toeuq zis nghuot. Lewi jens gas Israel mas vjangh sain dah zisyos ma yoh. 24 Khasoeh ge lyis Israel jens ngos lyis lhyenwhei vlu khyvlyis dyei dah ciboms dvboms ngos nyamoq lyis nyamoq dah vso zisyos khyvlyis dyei toh. Housoeh las ngos nyamoq lyis Israel jens mas vjangh sain toh dah vso zisyos ma yoh oen taiq goeus, ge.
Lewi jens dah Ciboms Dvboms
25  Yhensain Moshe lhyi tying toh, 26 Lewi jens lyis taiq aq: Yhensain namoq dah vso khyvlyis dyei, Israel jens jyank masyah xauh yoeus lyis hou mhayah ciboms dvboms Yhensain lhyi lhyenwhei vlu khyvlyis dyei chah. 27 Hai lhyenwhei vlu lyis danh zwi bang dah guk uh yahge zvbiq monh jyungshuk teh nghuot oen nghamh chah. 28 Heisoeh khyvlyis namoq eq Israel jens jyank masyah xauh yoeus dah ciboms dvboms dvnganh masyah Yhensain yah sen dah lhyenwhei vlu dyei chah. Namoq gas hai Yhensain xiklyis lhyenwhei vlu phudyei Aron lyis dyei chah. 29 Namoq xauh yoeus masyah gis thank zis dyei aq. 30 Namoq gis thank zis dyei goeus ya, nyet zis yoh yung toh goeus. Houka danh zwi soeu nyah jyungshuk dye dyei thang lhyi nyet yvlyis yung toh teh nghuot. 31 Houka nvng yahge nah yhenbang khalhye eq gis zo: khasoeh ge lyis houka namoq Zvng muh wons wuq dah nyhenshang uhkung phauh dvnghuot. 32  Yhensain lhyi gis thank zis dyei goeus ya, namoq zo lyis yobos ma bos. Nghuot laus eq Israel jens dyei dah gyingshang jyungshuk mas gis thank zis ma dyei shih lyis zo las vwot v-oeu ma bweh shoq soh soh kuot geh. Ma nghuot lyis, nvng sat zis xauh das, ge.