GYUNG CHO
(NUMBERS)
Gyung cho buk gas, dius gas shanghsenh cho xauh lyis nhaiqkuk yomgyau lwis las Mangso lhyi eq, dius lyis uhshe das xiklyis Mangso toeuq kat toh dah Moshe lhyi eq dvsoq soq lyis gomloeus toq dah dius nyau lyis chixoeuq toh. Israel jens mas yomnhuk cho yahge domsyos ma gyo dah wotwu bos laus eq Mangso ka nyah dius nyau lyis gomh nyeis cho, dvlhain lhain ma yoh jhen lo das shoq yomgyau cho thungh phuh laus eq Moshe ka Mangso yahge nyah dius nyau thoq mas toh dah wontang cho lhyi haih buk mas chixoeuq toh.
1
Cangxeih Israel Nyings Suon
1 Israel dius jens Egutu masyah thuq zis aiq vzvn, aiq vkhyvp cangxeih vnyeih lyis Yhensain ka Sina mhanhdyvp, nyah xikkhonh Zvng mas Moshe lhyi taiq:Ref 1.1-46: Gyu 26.1-51
2 Nvng yahge Aron Israel dius jens lyis nyah yhenbang, nyah vhuh khyvlyis nyings kui geh.
3 Aiqci zvn bos bang, nghuot ya hauh thoq pheh jes muh wons geh bang yukgis jens dvnganh dah nyings lhaih toh geh.
4 Namoq lyis pangh das xiklyis vkoq khanghmuh masyah vhuh uhjyung dvyuk yuk sang geh.
5-16 Heika haih muh nyhenshang dius phung mhayah khyen toh, nyamoq vkoq mas dah uhshe bang vbusbih jens nghuot.
17 Hai dvci aiq yuk moq pangh zis yah Moshe yahge Aron gas
18 aiq vkhyvp, das vnyeih lyis moqphung gonh lyis dvgeh khi huom lha yhenbang yahge vhuh khyvlyis dius dvnganh dah nyings yoh lhaih toh. Aiqci zvn masyah thoq pheh yukgis jens dah nyings dvnganh suon lha lhaih comh toh.
19 Houka Yhensain Moshe lhyi tying toh vgus nghuot. Moshe ka Sina mhanhdyvp mas dius jens dah nyings lhaih.
20-46 Yakop lobes Ruben vkoq masyah xi lha yhenbang, vhuh khyvlyis aiqci zvn masyah thoq pheh jes muh wons geh dah yukgis jens dvnganh nyings tsain kat. Suon bos bang dvnganh gas o mha lhaih toh.
47 Lewi jens gas gohkoq bang yah dvgeh nyings ma kat.
48 Khasoeh ge lyis Yhensain Moshe lhyi taiq zis gas,
49 Nvng dius jens lyis jes muh wons wuq geh bang nyings kui lhyi Lewi vkoq lyis vbos nhang.
50 Hauh gungsthaiq Lewi jens lyis ngah xikkhonh mas Zvng yahge nyah kyahsoe dvnganh yoeuh das yvmas kat chah. Nyamoq gas hau Zvng yahge nyah kyahsoe dvng das, houmha phuqsoe das. Nyamoq dah thoenggus gas hauh yvm lhaink yah toeutsung das.
51 Namoq dah thoenggus cheh khanghmuh Lewi jens gas Zvng lyis thyoq das; thoenggus saiq mas thoeng khanghmuh Zvng lyis toeutsung das. Lewi mas lai las hank laus eq hau Zvng nvm mas los soeu lhyi sat chah.
52 Nyet dah Israel dius jens eq nyang phung nyang, yuk khanghmuh vsainnyang dvp, vsainnyang khyiq nvm mas thoenggus tsain kuot das.
53 Israel moqphung lhyi ngos nhaiqyo las bat zis ma jweh bas jungh, Lewi jens gas hau zvng yvmlhaink mas thoeng lha hau Zvng lyis zungh chah, ge.
54 Housoeh las Israel jens gas Yhensain Moshe lhyi tying toh zis dvnganh kuot.