13
Gohnyau bang yah Ganggoh
Dius jens lyis Moshe dah lyi thwejvp zvn zvn nghap kyoh loh lyis, Amon dius, Moab dius yah Mangso dah dius jens khanhamp eq vtsoq goh, ge dah loeus mas jweh los.Ref 13.1-2: Lyi 23.3-5 Khasoeh ge lyis Amon dius yahge Moab dius gas Israel dius jens Egutu masyah thuq los dah gyung cho mha zos jeis ma dyei. Hauh gungsthaiq Balam lyis lhung las nhoengh nhang. Nghuot laus eq Mangso ka nhoengh zis lyis shvmanh cho bweh los nhang.Ref 13.2: Gyu 22.1-6 Israel jens hauh cho xauhgyo lyis nyamoq gas gohnyau bang lyis nyamoq dah phung masyah phe tyamp.
Nehemia doms Soq cho
Yhenmuh zisyos toh dah jyi lhyi yoeuh soeu phudyei Eliashib gas Tobia yah svsoh seqgoh. Eliashib gas vlu jyo yahge xangh, yhenmuh mas yhung dah kyahsoe, phudyei bang xiklyis vlu, yhenmuh thwe yungh kat bang yahge yhenmuh zungh dah Lewi jens lyis dyei dah jyo, zvbiq, tsanlun coeu ciboms dvboms dvtoh dah jyi mha Tobia lyis yvpmuh dvkoeuq lyis yhung nhang toh. Heisoeh bweh uhlyis ngos gas Yerusalem mas ma nyeis. Khasoeh ge lyis Babilon Hwankti Xerxesnote 13.6 Persia Hwankti zainsmuh nghuot dah Xerxes gas "Babilon Hwankti" ge dah nyings eq yoh guon dah somhci aiq vzvn lyis ngos nyah jyank mas loeus doms kyoh loh. Dvyoq nyangh thang lhyi ngos nyah jyank masyah toeuh yoh las, Yerusalem pheh tauh los. Eliashib gas Tobia lyis yhenmuh dvyvp yhung nhang zis los nyvng las dvn. Ngos nhaiqlom dyis las Tobia yah sen dah vyhang lhyi she lhwih tyamp dyei. Ngos hauh yvp jens lyis lyi thungh yah cheihshang lha Yhenmuh kyahsoe, jyo vlu yahge xangh doms kat toh das xiklyis vmingh dyei.
10 Yhenmuh thwe yungh kat bang yahge Lewi jens lyis zokho luk shoq ma dyei yvmvyah, nyamoq gas nyamoq nyang dah danh bos yvmas loh doms zwi zo nyeis cho lhyi eq ngos yoh seq.Ref 13.10: Lyi 12.19 11 Housoeh yhenmuh lyis tyamp khoq yvlyis toeuh dyei dah guon bang vdeq jens lyis yobos huon lha, Lewi jens, chunghthwe kat bang lyis yhenmuh mas khi lha nyamoq dah muh mas doms kat. 12 Hauh uhlyis Israel jens dvnganh gas nyamoq dah ciboms dvboms vlu nghuot dah jyo, zvbiq yahge tsanlun coeu lyis yhenmuh jyi mha doms xi wons los.Ref 13.12: Mal 3.10 13 Ngos jyi lhyi tsain yoeuh das xiklyis o mha dah dius jens lyis kat toh. Phudyei Shelemia, lyi svra Zadok, Lewi dius Pedaia moq nghuot. Matania dah nyeilo, Zakhu dah lo Hanan lyis nyamoq dah loq pangh khyvlyis toh. Haih bang gas nyamoq dah muh zwi changh jens lyis wom gvm dyei muh mas yoh loms zis ngos seq.
14 Ngah Mangso eh, hai ngos kuot goeus dah nah yhenmuh yahge paiq cho dvnganh lyis jenh soh dyei aq, oen shvmanh dung.
15 Hauh yoq lyis Yuda mau mas dvyhamh bang No Buisnyeis lyis zvbiq nyhet nyeis. Tsai dvyhamh bang gas No Buisnyeis lyis Yerusalem pheh jyo, zvbiq, zvbiq shih, maiphang shih yahge gohja lyis mauhlyihzoe yah thuq wvng los yvlyis ngos nyvng. Ngos nyamoq lyis, No Buisnyeis lyis cha v-ungh goh, oen zaih nhang.Ref 13.15: Dyu 20.8-10; Lyi 5.12-14; Yer 17.21-22 16 Hauh thoq lyis Yerusalem mas nyeis dah Taire dius dvyhamh gas oengdoq yahge gohtoeu vja ja, No nyeih lyis ngamoq dius jens lyis ungh das ge tsain yoeus los. 17 Hauh uhlyis ngos gas Yuda uhshe bang lyis, Namoq kuot dah yaunos lyis yoeuh geh, namoq gas No Buisnyeis lyis vwot v-oeu kuot. 18 Namoq dah phauh thyeih moq gas yaunos kuot las Mangso ka haih wus lyis thyoqpi zis yah nyamoq lyis joeng. Housoeh namoq eq No Buisnyeis lyis vwot v-oeu kuot zis yah, Israel jens thoq mas Mangso dah nhaiqyo zis jweh nhang das lah, oen yobos huon zis yah taiq.
19 Hauh thang lhyi ngos wuskhomh lyis, No Buisnyeis xi khanghmuh nyenhthang jweh los lyis nyheih lasnote 13.19 Yuda No nyeih gas nyenhthang lhyi xi. No Buisnyeis dye shoq wuskhomh ma phank das, oen taiq toh. No Buisnyeis lyis wus khau mha chah hu eq ma thuq hwank das cho soh soh nghuot das xiklyis ngah dius dvyhamh lyis khyamkhomh mas nyhei toh. 20 Hu vja ja ungh dah soenghi jens gas, oeng vnyens lyis wusciank nghe pheh dvlhain aiq lhain los yhet. 21 Ngos nyamoq lyis zaih nhang zis gas, Nvpyo jweh shoq los langh zis gas chah vkyuh ma bos. Dvlos yhet shih lyis gas ngos tsoengh kuot das, ge. Hou mhayah nyamoq No nyeih lyis ma doms los lo. 22 No nyeih gyingshang das zis soh soh nghuot das xiklyis ngos Lewi dvyhamh lyis cheihshang lyi kuot las khyamkhomh zungh nhang. Mangso eh, Nah kuhxing jyet cho gvng mas ngos heisoeh kuot cho lhyi soh las jenh lhuiq kat dyei aq, oen dung.
23 Hauh yoq lyis Jew vbusbih nyoshoq gas, Ashdod, Amon, Moab lonyi, nyi tsain hwank toh zis eq ngos nyvng.Ref 13.23-25: Dyu 34.11-16; Lyi 7.1-5 24 Nyamoq lo jens dvgohyih gas Ashdod nyingh kat, nghuot ya gohtoeu nyingh kat las ngamoq dah nyingh khasoeh kat zis eq ma seq lo. 25 Hauh gvng mas ngos nyamoq lyis nyho jyauh, noengh, bat, cam lang khot dyei. Hauh thang lhyi ngos nyamoq lyis ngamoq, nghuot ya ngamoq dah lo jens khanhamp eq gohnyau bang yah nyiyoeus yhenloh ma kuot lo das zis ngos nyamoq lyis Mangso nyings mas maukhi, dangthoengh toh nhang. 26 Ngos nyamoq lyis taiq kyingh shih zis gas, gohnyau vmesbih jens gas hwankti Solomon lyis yaunos kuot nhang. Nyang gas gohnyau hwankti jens thoq lyis zes kuhxing. Mangso ka nyang lyis jyet las Israel dvnganh dah hwankti kuot nhang. Nghuot laus eq nyang haih yaunos mas wvng loh.Ref 13.26: 2Sa 12.24-25; 1Hw 11.1-8 27 Housoeh las ngamoq gas namoq dah yikhyoh chank las gohnyau vmesbih jens lyis nyihwank zis yah Mangso dah domsyos ma gyo das lah?
28 Yoiada gas Phudyei Zainsmuh Eliashib dah lo nghuot. Nghuot laus eq Yoiada dah lo dvyuk gas Bet Horon wus mas Sanbalat dah lonyi lyis nyihwank toh. Housoeh las ngos Yoiada lyis Yerusalem masyah khat tyamp.Ref 13.28: Neh 4.1
29 Mangso eh, nyamoq gas Phudyei bang dah joqyos lyis eq, phudyei bang yahge Lewi jens yah toh dah thanghchvp lyis eq khasoeh vwot v-oeu kuot yvlyis soh dyei aq. 30 Ngos gas dius jens lyis gohnyau bang yah sen zis dvnganh lyis cheihshang tyamp. Phudyei bang yahge Lewi jens lyis nyamoq yuk khanghmuh dah yvwons lyis seq das xiklyis lyi tsain lhaih dyei. 31 Shishenh jweh lyis ngheq phudyei das xiklyis thangh eq, dius jens eq nyamoq cangxeih yoh yhomh dah jyo, cangxeih nyhink dah shih chi los das xiklyis gvn toeuq toh.
Mangso eh, haih cho dvnganh lyis jenh soh dyei las ngos lyis jyehjuh dyei aq.