10
Lvgyo Dvci Aiq yuk
(Mak 3:13-19; Luk 6:12-16)
Yesu gas nyah changlo dvci aiq yuk lyis khi yoeus las nyamoq lyis yius khat tyamp das zis yahge nos thyoh vja ja, noslom vja ja lyis yoh gis los nhang das toeuh dyei. Lvgyo dvci aiq yuk moq dah nyings gas haih zis tsain nghuot. Cangxeih vyuk gas Petru ge soeu Simon, nyah vnoeuh Andre; Zebedi dah lotang Yaku yahge nyah vnoeuh Yohan; Philip yahge Bartholomeu; Thoma yahge khoengh khywi soeu Mathe; Alphe dah lo Yaku yahge Thade; Vnyau lyis jyet soeu Simon yahge Yesu lyis phanhlyen soeu Yudas Iskarot moq nghuot.
Dvci Aiq Yuk Muh
(Mak 6:7-13; Luk 9:1-6)
Yesu hai dvci aiq yuk moq lyis nhang kat uhlyis yah dyens mhoq zis gas, Namoq gas gohnyau bang jyank mas vwvng goh, Samari wukhau mha eq vwvng goh. Nghuot laus eq Israel vnyau mas dyuk loh dah yvng jens dah jyank mas dvloh geh. Namoq loh lyis, Maukhung munghdan gas ni los goeus oen tsain taiq hoeuh geh.Ref 10.7-15: Luk 10.4-12 Nos bang lyis gis los nhang geh; shei goeus bang lyis dwis los nhang geh; mvnggvng dap bang lyis eq thyauhlhang nhang geh; yius jens lyis khat thuq dyei geh. Namoq gas phauh ma gyoh xauh yoeus las, namoq eq phauh ma sang dyei geh. Namoq dah dyilhunk mas ngwis, xing, thunkjangh dyvpson cha eq vkat chi goh. 10 Bvtmuh yahge dyi aiq dung, thyvkoq, lhamloq eq vtsain chi goh: khasoeh ge lyis muh zwi soeu ka nyah zokho yah mon yih nyeis.Ref 10.10: 1Kr 9.14; 1Tm 5.18
11 Wukhau, wugungs khateh yvmas loh nghuot laus eq, houmha mon yih soeu khayuk nyeis zis lyis nyei gyo las, doms thuq loh shoq houmha nyeis geh. 12 Namoq hauh yhen mha wvng loh lyis phauh nyang zis yah jhent geh. 13 Hauh yhenbang mas mon yih nghuot lyis gas, namoq dah nyenstap zis gas nyamoq mas joq bas jungh: nghuot laus eq ma mon yih lyis gas namoq dah nyenstap zis gas namoq jyank mas tauh los bas jungh. 14 Hank laus eq namoq lyis ma lhom yoeus, namoq dah dang lyis ma gyo yoeus bang bos nghuot lyis, hauh yhen, hauh wukhau mhayah namoq thuq loh lyis, namoq khyei mha phvlhau lhyi ko khyoq toh khoq geh.Ref 10.14: Lgy 13.51 15 Ngos namoq lyis jyoengh taiq bah, soetuon dah buisnyeis lyis Sodom yahge Gomora gas hauh wus thoq lyis sunghhuq das.Ref 10.15: Mat 11.24; Vpm 19.24-28
Jweh das Shoeuhshih
(Mak 13:9-13; Luk 21:12-17)
16 Yoeuh aq, ngos namoq lyis womkhuih jens jo mas yvng jens lyis teh nhang kat. Housoeh yvmvyah namoq gas lhangnyis teh yik las khotjyauh teh kyonhzoeh nyeis geh.Ref 10.16: Luk 10.3 17 Nghuot laus eq dius jens lyis zaih geh: khasoeh ge lyis nyamoq gas namoq lyis soetuon huom mha kyauh tyamp das. Nyamoq dah lyi jungs mha eq namoq lyis tsain lyuk das.Ref 10.17-20: Mak 13.9-11; Luk 12.11-12, 21.12-15 18 Nyamoq xikkhonh mas eq, gohnyau bang dah xikkhonh mas eq thanghchvp duot das xiklyis, ngah gvng mas, namoq lyis zau bang yahge hwankti jens xikkhonh mas eq lang she loh zis xauh das. 19 Namoq lyis kyauh tyamp goeus ya, namoq khasoeh oen cha taiq das zis vchiq goh: namoq taiq das dang gas hauh uhlyis namoq lyis dyei los das. 20 Khasoeh ge lyis, dang taiq soeu ka namoq ma nghuot, namoq Uwus dah Dyos gas namoq vkhau mha dang taiq nyeis.
21 Hauh uhlyis, vmang vnoeuh nyang changh shei cho pheh kyauh tyamp das, uwus gas lo lyis shei das yvmas kyauh tyamp das. Lo jens gas nyhiphoq lyis jes sont las shei nhang das.Ref 10.21: Mak 13.12; Luk 21.16 22 Ngah nyings gvng mas dius dvnganh gas namoq lyis hoeng los das. Nghuot laus eq thang thank jweh shoq yoh jhen soeu ka, khyuot yoeus zis xauh das.Ref 10.22: Mat 24.9, 13; Mak 13.13; Luk 21.17 23 Housoeh haih wus mas shoeuhshih lyis gohtoeu dvwus pheh phang loh geh. Ngos namoq lyis jyoengh taiq bah, Cangsoeu Lo ma jweh shih lyis Israel mau mas dah wugungs lyis namoq yoh lhaink khvp das zis ma nghuot.
24 Changlo gas svra thoq lyis zes zis ma nghuot; jyeidwis eq nyah joeuzoe thoq lyis zes zis ma nghuot.Ref 10.24: Luk 6.40; Yoh 13.16, 15.20 25 Changlo gas nyah svra iq, jyeidwis eq nyah joeuzoe iq duot los lyis gas geh joq. Yhensain lhyi nyamoq Bezebu ge lui nghuot lyis gas, nyah yhenbang lyis ma gis dah nyings zes lui das ma nghuot lhyeh?Ref 10.25: Mat 9.34, 12.24; Mak 3.22; Luk 11.15
Gyuk Chah Soeu
(Luk 12:2-7)
26 Housoeh yvmvyah nyamoq lyis vgyuk goh: khasoeh ge lyis, ma yoh chixoeuq shoq nghop toh zis cha eq ma bos. Ma seq shoq shung toh zis cha eq ma bos.Ref 10.26: Mak 4.22; Luk 8.17 27 Ngos namoq lyis soeng soeng noq yvmas taiq zis lyis bvng yvmas taiq kyoh geh. Nhuot sot sot zis namoq xauhgyo yvlyis yhen khung thoq mas taiq hoeuh geh, ge. 28 Gungs lyis kyingh yoh sat las dyos lyis ma yoh tsain sat bang lyis vgyuk goh. Dyos yahge gungs lyis munyi thomh mas yoh mhont soeu lhyi dvgyuk geh. 29 Joslo aiq doeu gas dyvpson dvkyvp yah ungh ma nghuot lhyeh? Nah Uwus ma bauh lyis hau jos dvdoeu eq nyeisjvng mas ma dyet gyoh. 30 Khasoeh ge lyis namoq dah cam khvt dvnganh lyis yangh suon toh. 31 Housoeh yvmvyah vchiq goh, namoq gas jos nyoshoq thoq lyis zes phauhdap.
Khristu lyis Rhen, Peq
(Luk 12:8-9)
32 Housoeh yvmvyah svbih dah xikkhonh mas ngos lyis rhen soeu lhyi, ngos eq maukhung mha ngah Uwus xikkhonh mas hauh soeu lhyi rhen das. 33 Nghuot laus eq svbih xikkhonh mas ngos lyis he tyamp soeu lhyi, maukhung mha ngah Uwus dah xikkhonh mas ngos eq hauh soeu lhyi he tyamp das.Ref 10.33: 2Tm 2.12
Nyenstap Cho ma nghuot
(Luk 12:51-53; 14:26-27)
34 Nyeisjvng thoq mas nyenstap cho chi lyih das xiklyis ngos lyih oen vnghamh goh; nyenstap cho chi lyih das xiklyis ngos lyih zis ma nghuot, moengsa chi los das xiklyis ngos dvlyih. 35 Khasoeh ge lyis ngos lyih zis gas, loloeu gas nyah uwus yah, lonyi gas nyah ungwes yah, doeusmuh gas nyimuh yah tyixo goh das xiklyis dvnghuot.Ref 10.35-36: Mik 7.6 36 Dius dvyuk dah jeswus gas nyah yhen mha bang nyang nghuot los das.
37 Ngos lyis jyetdap thoq lyis nyah ungwes uwus lyis zes jyetdap soeu ka, ngos yah ma mon: ngos lyis jyetdap thoq lyis nyah loloeu lonyi lyis zes jyetdap soeu eq ngos yah ma mon. 38 Hauh thoq lyis magoh, nyah tapzains wuq las ngah thang mha ma chank soeu ka ngos yah ma mon.Ref 10.38: Mat 16.24; Mak 8.34; Luk 9.23 39 Vsainnyang kang lhyi xo soeu ka kang dyuk das. Ngah gvng mas kang dyuk soeu ka, kang yoh das.Ref 10.39: Mat 16.25; Mak 8.35; Luk 9.24, 17.33; Yoh 12.25
Phauh Shangh
(Mak 9:41)
40 Namoq lyis lhom yoeus soeu ka ngos lyis lhom yoeus zis nghuot; ngos lyis lhom yoeus soeu eq ngos lyis nhang kat soeu lhyi lhom yoeus zis nghuot.Ref 10.40: Mak 9.37; Luk 9.48, 10.16; Yoh 13.20 41 Dius dvyuk lyis lvpe nghuot yvmvyah lhom yoeus soeu ka lvpe dah khyik manh phauh xauh yoeus das. Dius dvyuk lyis dan soeu khyvlyis lhom yoeus soeu eq hau dan soeu dah khyik manh phauh xauh yoeus das. 42 Ngos namoq lyis jyoengh taiq bah, Haih bang mas loshang dvyuk lyis changlo nghuot yvmvyah shuk jeis dvkom khvlangh gvmshuk soeu hank laus eq, nyang khyik manh phauh dyuk das zis ma nghuot.