2
1 Maukhung Jesphung Yhensain ka phudyei bang lyis taiq. Hai tyingtoh dang gas namoq xiklyis nghuot.
2 Namoq kuot loh zis yah ngos lyis nyoqnho ngelang dyei chah. Namoq ngos taiq zis ma gyo lyis ngos namoq jyank mas nhoengh cho she kat das. Ngos nvng lyis pangh das xiklyis xauh yoeus dah vyhang thoq mas nhoengh das. Jyoengh, hauh thoq mas ngos nhoengh goeus. Khasoeh ge lyis nvng ngah tyingtoh dang lyis vlhomuh ma yoeus.
3 Ngos namoq dah lo jens lyis joeng das, namoq dah nyoqnho lhyi namoq phudyei dah gaunyhauq khyeih mas buot das las hauh khyeih boms pheh yoeus tyamp zis xauh das.
4 Housoeh lyis ngos Lewi vnyau vshih, phudyei bang yah toh dah thanghchvp doengs nhang mes las haih tyingtoh dang ngos namoq lyis dyei zis gas namoq seq das.Ref 2.4: Gyu 3.11-13
5 Ngah thanghchvp mas ngos nyamoq lyis kang yahge nyeis gis das cho dangthoengh toh. Nyamoq ngos lyis phauh nyang gyukwoms das xiklyis ngos nyamoq lyis hauh zis dyei: Hauh buisnyeis lyis nyamoq ngos lyis phauh nyang las tsain gyukwoms.Ref 2.5: Gyu 25.12
6 Nyamoq gas jus zis jyauh las ma jus yvlyis ma jyauh. Nyamoq gas ngos yah nyoeuh shoq nyeis. Nyamoq gas jus cho lhyi nyamoq kyingh ma kuot, gohtoeu nyoshoq moq lyis eq ma gis zis kuot cho no toh das xiklyis bos pangh.
7 Mangso dah jyoeng seq cho lhyi jyauh das zis gas phudyei bang dah yvwons nghuot. Nyamoq gas Maukhung Jesphung Yhensain dah loeuskyoh bang nghuot yvmvyah Dius jens gas ngos o cho lhyi nyamoq jyank mas loh xuq chah.
8 Nghuot laus eq gvshih namoq phudyei bang gas jus cho mhayah whang loh goeus. Namoq dah jyauh cho ka nyoshoq moq lyis ma jus zis kuot das yvpheh shwih loh goeus. Namoq gas ngos namoq yah kuot toh dah thanghchvp lyis thyoq goeus.
9 Housoeh las ngos Israel dius jens lyis yah namoq lyis dius ngis tauh khyoq nhang das. Khasoeh ge lyis namoq ngos o cho domsyos ma gyo, namoq dius jens lyis jyauh lyis, yuk khanghmuh lyis dvyih ma kuot.
Dius jens Lom Ma luk
10 Yang dvnganhmoq Uwus dvyuk dvyoh ma nghuot lhyeh? Yang dvnganh lyis hauh dvyhangteh Mangso yah gvnkhanh toh ma nghuot lhyeh? Housoeh lyis yang chamus dvyuk yah dvyuk dah dangthoengh thyoq goh? Mangso, yah phauh thyeih moq yah kuot toh dah thanghchvp lyis chamus dius ngis khyoq goh?
11 Yuda dius jens gas nyamoq Mangso yah thoengh toh dah dangthoengh lyis thyoq las Yerusalem yahge dvmau gonh mas gyukphoh cho kuot goeus. Nyamoq gas Yhensain jyet dah Yhenmuh lyis vwot v-oeu kuot goeus. Vbusbih jens gas lvbaus mangso jens lyis paiq dah vmesbih jens lyis nyihwank.
12 Housoeh kuot goeus soeu lhyi ka Yhensain yah Israel dius phung mhayah thyet tyamp bas jungh. Ngamoq dius nyau Maukhung Jesphung Yhensain jyank mas jyungshuk chi e bang mas eq khanhamp eq ma doms bos nhang lo bas jungh.note 2.12 Hebre mas ma bvng.
13 Haih zis gas namoq kuot cho gohtoeu dvkoeuq nghuot. Namoq Yhensain jyank mas chi los dah jyungshuk lyis nyang ma lhom yoeus dyei lo yvmvyah namoq noskyingh ngaus zis yah Yhensain dah phon lyis namoq nyoqdyeis yah nghop.
14 Namoq gas, Nyang hauh yvlyis chamus ma lhom yoeus lo au? ge tsain nyei. Houka nvng loyvm yoq lyis nvng nyihwank yoeus dah nah yhensain nyhiq lyis toh dah dangthoengh thyoq zis nyang seq yvmvyah nghuot. Nyang gas nah hwank nyhiq nghuot, nvng nyang lyis wontang das ge Mangso xikkhonh mas dangthoengh toh laus eq nvng nyang lyis nah dangthoengh thyoq goeus.
15 Mangso ka nah aiq yuk lyis dvgungs dvdyos kuot toh goeus ma nghuot lhyeh? Housoeh kuot zis nyah nghamhtoeuq cho cha nghuot? Houka jyoeng dah Mangso dius jens nghuot dah, lo jens bos das xiklyis nghuot. Housoeh yvmvyah namoq hank eq vsainnyang yhensain nyhiq lyis toh dah dangthoengh ma thyoq das cho soh soh mus geh.note 2.15 Hebre mas ma bvng.
16 Yhensain nyhiq kangh tyamp cho lhyi ngos hoeng, ge Yhensain, Israel dah Mangso taiq. Namoq dvyuk yuk vsainnyang dah yhensain nyhiq lyis houteh lhoeng cho kuot lyis ngos hoeng. Nah yhensain nyhiq lyis wontang das ge dah dangthoengh lyis ma thyoq das zis soh soh mus geh.
Soetuon Buisnyeis Ni goeus
17 Namoq gas namoq dang taiq zis yah Mangso lhyi lhoq nyung nyeis laus eq, namoq gas nyang lyis, Ngamoq nyang lyis khasoeh lhoq nyung, ge nyei. Ma gis zis kuot bang dvnganh gas gis ge Maukhung Jesphung Yhensain nghamh, jyoengh, nyang nyamoq lyis o, ge taiq zis yah eq, lyi jus chah dah Mangso khalhye nyeis, ge nyei zis yah eq, nyang lyis lhoq nyung, ge.