7
Israel wotwu dyoq
1 Hei iq shohjyen goeus nyvng! Ngos gas shih zains mas shih xo ma nyvng, zvbiq nwis mas zvbiq shih xo ma nyvng las yuot soeu teh nghuot. Zvbiq shih dvnganh, nghamh dah maiphang shih dvnganh thyoq tyamp goeus.
2 Hauh mau mas lomluk dius dvyuk eq ma nyet lo, Mangso lhyi dang jings soeu hank ma nyeis lo. Yuk khanghmuh gas dius sat das toeuh lyis langh nyeis. Yuk khanghmuh gas nyah dius jens lyis twih khyoq las nyhik yoeus.
3 Nyamoq dvnganh gas ma gis muh kuot yvmas lyes bang nghuot. Zau jens yahge soetuon bang gas khauwhot zo; Vmingh bos bang eq nyamoq o khyvlyis taiq las nyamoq dvgeh nghamh toeuq.
4 Nyamoq mas gis thank soeu yahge zes lomluk soeu yangh nyoq teh phauh ma dap lo. Mangso ka lvwon nghuot dah lvpe jens lyis yah taiq kyingh zis yah dvyhangteh, dius jens lyis joeng das buisnyeis jweh los goeus. Gvshih nyamoq nhunk khamkhvv nyeis.
5 Nah yhenkyoh lyis vjingh, nah dyenschangh lyis vloms. Nvng cha taiq zis nah yhensain phoq, nghuot ya yhensain nyhiq lyis yangh zaih aq.
6 Haih shishenh lyis loloeu gas nyah uwus lyis koh soeu teh kuot das. Lonyi gas nyah ungwes yah, doeusmuh gas nyimuh yah tyixo goh das. Nah jeswus gas nvnyang yhenbang nghuot.Ref 7.6: Mat 10.35-36; Luk 12.53
7 Nghuot laus eq ngos gas Yhensain lhyi zungh yoeuh nyeis das. Ngos gas ngos lyis khyuot yoeus das Mangso lhyi nghamhnywe zis yah langh das. Ngah Mangso ngos lyis gyo dyei das.
Mangso khyuot yoeus cho
8 Ngamoq dah jeswus jens ngamoq thoq mas yoeuh gauslaus chank ma bos. Ngamoq lains laus eq doms toq das; Gvshih ngamoq chuot yvmas nyeis laus eq Yhensain ngamoq lyis bvng zis dyei das.
9 Ngamoq Yhensain lhyi cu goeus. Housoeh las gvshih ngamoq nyah nhaiqyo cho lhyi dvxa kham chah. Nghuot laus eq thang thank lyis nyang ngamoq lyis gos las lyi jus khyvlyis thyet dyei das. Nyang ngamoq lyis bvng yvmas shwih los das; Nyang ngamoq lyis khyuot yoeus cho ngamoq jyoengh nyvng das.
10 Hauh thang lhyi ngamoq dah jeswus gas haih zis nyvng das las nyoqnho ngelang gyoh das. Yhensain, nah Mangso khalhye nyeis, ge yang lyis jwangh bang, hau dvyhangteh dah jeswus jens gas somh las talhoeu mha thomhbop teh nang nheh toh yvlyis yang nyvng das.
11 Yerusalem dius jens hau wusciank doms ci das shishenh jweh los nyeis. Hauh shishenh lyis nah maukyo jelvm los das.
12 Dvkhauyah dah nah dius jens gas nah jyank mas tauh los das. Buisthuq pheh Asiria masyah, mautyi pheh Egutu masyah, Uphrat lvng janggyon masyah, we dah thomh jens yahge boms jens masyah jweh los das.
13 Nghuot laus eq nyeisjvng thoq mas nyeis bang dah lhung cho gvng mas hauh zis sihyos duot das.
Yhensain nhaiqnyen
14 Yhensain eh, nvng khyen yoeus goeus dah nah dius jens lyis yvng yoeuh soeu duot dyei aq. Nyamoq gas nyeiscoeu bos dah mau yah lhaink toh, we dah mhanhdyvp mas nyeis laus eq, Bashan yahge Gilead mau mas dah katjang gis mas xikpheh nyamoq xauh zo teh loh doms xauh zo nhang aq.
15 Nvng ngamoq lyis Egutu masyah shwih thuq los nyeih lyis kuot teh, Yhensain eh, nvng ngamoq xiklyis yomsoq muh kuot aq.note 7.15 Hebre mas "ngos yomsoq muh kuot das" ge bos.
16 Dius nyau jens gas nyamoq yombos laus eq haih zis nyvng las nyamoq toeuq cho dyoq tyamp las nghamh gyuk zis yah nyamoq nhuot eq, no eq nyheih toh das.
17 Nyamoq gas tsohmop mas lhangnyis teh shweh das. Nyamoq gas nyamoq dah thoenkgus jesdvp masyah gyuk nvn zoh lyis thuq los das. Nyamoq gas gyukwoms zis yah Yhensain, ngamoq dah Mangso jyank mas tauh los das.
18 Yhensain eh, nvng teh dah gohtoeu mangso hank ma bos. Doeng los goeus bang nah dius jens dah yaunos lyis khyuot dyei aq. Nvng gas vjangh nhaiq ma yo nyeis. Nah ma thank magons jyetdap cho lhyi chixoeuq yvmas nhaiqdoeus.
19 Nvng ngamoq lyis nhaiq dvlhain doms nyen das. Nvng ngamoq dah yaunos lyis nah khyei o mha nang gyik las thomh theh mas khyoq kat das.
20 Gohlhain yah, ngamoq dah phauh thyeih moq lyis dangthoengh toh zis yah dvyhangteh Abraham yahge Yakop dah vnyau vshih, nah dius jens lyis nah wontang cho yahge nah mathank magons jyetdap cho chixoeuq das.