3
Uhshe bang lyis Mikha Taiq
1 Namoq Israel dah guon bang eh, kamp gyo geh. Namoq lyi jus cho kuot chah.
2 Nghuot laus eq namoq gas gis yvlyis hoeng lha ma gis yvlyis tsain ngwis. Ngah dius jens lyis dius dwis gungs mas yeis xik las, shohyau mas dah shoh lyis tsain cwe.
3 Namoq ngah dius jens lyis zo tyamp. Nyamoq dah yeis xik tyamp las shohyau lyis khyauh zis yah auh mas jyauq das shoh teh tsain jap.
4 Namoq gas Yhensain lhyi kaiq ngaus das laus eq nyang ma toeuh dyei das shishenh jweh los. Namoq ma gis zis kuot goeus yvmvyah nyang namoq dah dung yvlyis ma gyo dyei das.
5 Ngah dius jens gas, Phauh dyei bang lyis gas nyenstap das, phauh ma yoh dyei bang lyis gas, jes bos das, ge dangthoengh toh dah lvpe jens yah, mhuih zis tsain xauh. Housoeh teh dah lvpe jens lyis Yhensain taiq zis gas,
6 Lvpe jens eh, namoq dah buisnyeis vluk thank goeus. Namoq xiklyis buis wvng loh goeus. Khasoeh ge lyis namoq ngah dius jens lyis shwih whang lha pe dah nyoqnyvng ma yoh nyvng lo das. Bot cha ma yoh thyet lo das.
7 Thang pheh xiklyis pe zis ma ying las nyamoq xoqphuh das. Mangso ka nyamoq lyis ma toeuh dyei yvmvyah, nyamoq nyoqnho ngelang khyoq zis xauh das.
8 Nghuot laus eq ngos gas Israel dius jens lyis nyamoq yaunos cha nghuot zis taiq das nyhenshang, Yhensain ka ngos lyis nyah Dyos yomsoq yah tyink dyei, lyi jus cho seq dah ehnyet yahge womh cho dyei toh.
9 Israel dah guon bang eh gyo geh, namoq gas lyi jus cho lhyi hoeng lha jus yvlyis ma jus yvpheh lhaiq tyamp.
10 Namoq gas dius sat cho yahge lyi ma jus cho dah vpom mha Mangso dah wus, Yerusalem lyis tsain ci nyeis.
11 Wus mas dah guon bang gas khauwhot xiklyis soetuon. Phudyei bang gas phauh yoeus las jyauh. Lvpe jens eq ngwis yoeus las nyoqnyvng taiq. Nyamoq dvnganh gas, Mangso ka nyamoq yah nghuot. Nyamoq gas Yhensain ka yang yah dvgeh nghuot las yah jyank mas nos nhang cho ma jweh das, tsain ge.
12 Housoeh las namoq gvng mas Zion ka yos teh phuk zis xauh das las, Yerusalem wus gas lukjvp boms, yhenmuh jing eq saiqkhyam bweh das.Ref 3.12: Yer 26.18