3
Nyenstap Jyungshuk
1 Dvyuk yuk nyenstap jyungshuk khyvlyis nyah noeu phudyei lyis, houka nos ma bos dah vlus, nghuot ya vzains nghuot chah.
2 Hauh soeu ka hau gaunyhauq uhloms mas nyah loq kih lho lha, Yhensain xikkhonh Zvng khomh mas sat chah. Aron lo jens phudyei bang gas, hauh suih lyis phon dah nyei shot mas doeuh gyon das.
3 O mha taiq dah gaunyhauq vdoeus vdyet Yhensain lhyi zonoms jyungshuk khyvlyis dyei chah. Houka ungkhau mha dah coeu dvnganh,
4 jinghloms yahge hauh thoq mas dah coeu dvnganh, sainh gis thank vdoeus tsain nghuot.
5 Phudyei bang gas hau dvnganh lyis ngheq jyungshuk yah dvgeh phon mas ngheq dyei das. Hai zonoms jyungshuk xangh shom ka Yhensain lhyi nhaiqdoeus nhang.
6 Yvng, nghuot ya shvbeq lyis nyenstap jyungshuk khyvlyis yhung lhyi, houka nos ma bos dah vlus, nghuot ya vzains nghuot chah.
7 Dius dvyuk yvng phudyei lyis,
8 nyang hau yvng dah uhloms mas nyah loq kih lho lha, Zvng xik mas sat das. Phudyei bang gas hauh suih lyis phon dah nyei shot mas doeuh gyon das.
9 O mha taiq dah gaunyhauq vdoeus vdyet Yhensain lhyi zonoms jyungshuk khyvlyis dyei chah. Houka coeu, nungh chang yau nvm mas dah lhyank coeu dvnganh, ungkyo dvnganh,
10 jinghloms yahge hauh thoq mas coeu, sainh gis thank vdoeus tsain nghuot.
11 Phudyei muh wons soeu ka hai dvnganh Yhensain lhyi zonoms jyungshuk khyvlyis phon mha ngheq dyei das.
12 Dius dvyuk shvbeq phudyei lyis,
13 nyah loq hauh uhloms thoq mas kih lho lha Zvng xik mas sat das. Phudyei bang gas hauh suih lyis phon nyei shot mas doeuh gyon das.
14 O mha taiq dah vdoeus vdyet Yhensain lhyi zonoms jyungshuk khyvlyis dyei chah. Houka ung nghop coeu dvnganh,
15 jinghloms yahge hauh thoq mas coeu, sainh gis thank vdoeus tsain nghuot.
16 Phudyei soeu ka hai dvnganh Yhensain lhyi nhaiqdoeus nhang dah zonoms jyungshuk khyvlyis phon mha ngheq dyei das. Coeu dvnganh gas Yhensain yah sen.
17 Israel jens hank eq coeu eq suih eq ma gis zo. Haih zis gas Israel jens nyeis yvmas vcaiq caiq chank das lyi nghuot, ge.