27
Jyungshuk Lyi
1 Yhensain Moshe lhyi yah,
2 Israel jens xiklyis o mha dah lyi dyei. Dius dvyuk Yhensain lhyi phudyei das ge lhyenwhei nyhen toh lyis, nyang o mha dah phauh ngwis dyei zis yah yoh lhuiq kat.
3-7 Gyingshang joqyos mas thyet dah kya yah dvyhangteh:
— logis vbusbih aiqci zvn masyah khyukci zvn jo mas bang ngwis kyvp 50
— logis vmesbih ngwis kyvp 30
— yukgis loshang 5 zvn masyah 20 zvn ngwis kyvp 20
— nyelo loshang ngwis kyvp 10
— yukgis nauh noeuh 5 zvn o pheh ngwis kyvp 5
— nyelo nauh noeuh ngwis kyvp 3
— yukgis 60 zvn thoq pheh ngwis kyvp 15
— vmesbih 60 zvn thoq pheh ngwis kyvp 10 nghuot.
8 Nyhen toh soeu nyo nyungs las kya thyet khyvlyis ma thyeh dyei lyis, nyang lyis phudyei soeu jyank mas shwih e lha, phudyei soeu ka nyang yoh dyei khyvlyis kya khyoq las thyet dyei das.
Yhensain lhyi Jyungshuk
9 Hau nyhen toh zis gaunyhauq yah sen lhyi houka Yhensain lhom yoeus gis jyungshuk nghuot. Yhensain lhyi dyei dah jyungshuk khanghmuh gas gyingshang.
10 Nyhen toh soeu ka hau gaunyhauq nyhenshang gohtoeu dvdoeu yah ma gis thaiq: thaiq lyis aiq doeu gonh Yhensain yah sen.
11 Nghuot laus eq hau nyhen toh zis ma lhoq, Yhensain lhyi jyungshuk khyvlyis ma gis phudyei dah gaunyhauq nghuot lyis, hauh zis phudyei soeu jyank mas chi e chah.
12 Phudyei soeu ka hauh zis gis, gang mon khyvlyis kya thyet chah: Nyang thyet dah kya ka thang thank nghuot.
13 Nyang hau gaunyhauq khyuot mes lyis gas, hauh phauh eq, kya dah oeng boms dvboms eq lhungh dyei chah.
Yhen Dvyhen Phauh
14 Dvyuk yuk nyah yhen Yhensain lhyi dyei lyis, phudyei soeu ka khoek ma khoek zis yoeuh las kya thyet das. Nyang thyet dah kya ka thang thank nghuot.
15 Hau yhen dyei soeu doms khyuot mes lyis, hauh phauh eq, hauh phauh dah oeng boms dvboms eq lhungh dyei chah.
Yos Kya
16 Dvyuk yuk nyah vso yos dvkhamh Yhensain lhyi dyei lyis, jyo nyau yoh khyoq khyvlyis kya thyet chah; kya ka bali oeng luh ko yoh khyoq yvmas ngwis kyvp dvci nghuot.
17 Nyah yos lyis Jubili zvn dye yah dvyih dyei lyis, kya ka thyet khyvlyis dyingh shoq nghuot.
18 Jubili zvn lai thang lhyi khanhamp laus eq nyah yos kyauh lyis gas, phudyei soeu suon toeuq las, Jubili zvn jweh das yvmas nyet shih zvn suon lha kya thyet toh yvmas khyoq dyei chah.
19 Hauh yos dyei soeu doms khyuot mes lyis, hauh yos phauh eq, yos phauh dah oeng boms dvboms eq lhungh dyei chah.
20 Nyang hauh yos Yhensain jyank masyah cangxeih ma khyuot zis dvyuk yuk lyis ungh lyis gas, nyang hauh yvlyis doms khyuot das toeuh chithyuk goeus.
21 Jweh los das Jubili zvn lyis, hau yos gas Yhensain dah vcaiq vto zisyos bweh los. Houka phudyei bang yah sen loh.
22 Dius dvyuk nyang wis dah yos Yhensain lhyi kyauh lyis,
23 phudyei soeu ka Jubili zvn jweh shoq dah zvn suon lha, kya thyet chah. Nyang ngwis hauh nyeih lyis dyei chah. Hauh ngwis gas Yhensain yah sen.
24 Jubili zvn lyis, hau yos gas cangxeih ungh dah yos sain, nghuot ya nyah vnyau vshih jens lyis tauh dyei chah.
25 Kya dvnganh gas gyingshang joqyos mas thyet khyvlyis toh chah.
Gaunyhauq jens Kya
26 Cangxeih suot dah gaunyhauq gas Yhensain yah sen joq goeus. Housoeh las hank eq xihhonh jyungshuk khyvlyis ma gis dyei. Noeulo, yvnglo yahge beqlo gas Yhensain yah sen.
27 Nghuot laus eq ma lhoq dah suot xeih gaunyhauq lyis gas gyingshang joqyos mas thyet dah kya yahge houmha oeng boms dvboms kyah las gis khyuot. Ma khyuot lyis gas dvyuk yuk lyis gyingshang joqyos mas thyet toh kya yah gis ungh.
28 Nghuot laus eq gvn toeuq toh zis ma nghuot dah dius, gaunyhauq, yos cha lhyi laus eq Yhensain lhyi kyauh lyis, hauh yvlyis hank eq ma gis ungh, ma gis khyuot. Houka Yhensain yah vcaiq vto sen.Ref 27.28: Gyu 18.14
29 Mhont tyamp chah ge toeuq toh zis xauh soeu lhyi ma gis khyuot, nyang lyis sat chah.
30 Nyeisjvng masyah thuq los zis dvnganh, jyo laus eq, shih laus eq ciboms dvboms gas Yhensain yah sen.Ref 27.30-33: Gyu 18.21; Lyi 14.22-29
31 Dvyuk yuk hau dvja ja lyis khyuot mes lyis, nyang hauh phauh eq, phauh dah oeng boms dvboms eq lhungh dyei chah.
32 Nyhoeu dah gaunyhauq dvci mha dvdoeu gas Yhensain yah sen. Gaunyhauq suon lhyi dvci jweh khanghmuh mas dvdoeu gas Yhensain yah sen.
33 Gaunyhauq yhensain ka ma gis vdoeu xauh khyen bas jungh khyvlyis ma gis toeuq. Thaiq eq ma gis thaiq: thaiq lyis gas hau gaunyhauq aiq doeu yah Yhensain yah sen loh das. Khyuot eq ma gis khyuot lo, ge.
34 Heika Israel dius jens xiklyis Sina boms mas Yhensain Moshe lhyi dyei dah tyingtoh dang nghuot.