26
Domsyos Gyo Shvmanh
(Lyi 7:12-24; 28:1-14)
1 Yhensain taiq, Paiq das xiklyis phvra, gungslho toh, luk yah kuot dah zains, luk mas thwang tap ja vkuot goh. Ngos Yhensain, namoq dah Mangso nghuot.Ref 26.1: Dyu 20.4; Lew 19.4; Lyi 5.8, 16.21-22, 27.1
2 No nyeih lyis chank nyeis geh, ngos lyis paiq dah joqyos lyis nyoqnho ngelang dyei geh. Ngos Yhensain nghuot.
3 Namoq ngah lyi yah dvyhangteh kang dwis las ngah tyingtoh dang lyis domsyos gyo lyis,Ref 26.3-5: Lyi 11.13-15, 28.1-14
4 nyah Shishenh lyis ngos namoq xiklyis mau wus nhang lha namoq dah maunyeis gas jyo thuq los nhang das, shihzains eq vshih shih das.
5 Nah jyo ka nyoshoq nghuot las zvbiq thyoq yoq jweh shoq jyo yhomh das. Zvbiq dvthyoq nyeis shih lyis jyo khyoq nyos doms jweh das. Namoq zo mes zis dvnganh yoh das las namoq mau mas jesluiq shohluiq xauh nyeis das.
6 Ngos namoq mau mas nyenstap nhang lha, namoq hank lyis eq ma gyuk noh yoh yhet das. Namoq mau mas gyukphoh dah yewus lyis eq shung tyamp dyei las, houmha moeng dyoq cho ma bos lo das.
7 Namoq gas namoq dah jes lyis ung das.
8 Namoq oeng yuk gas jes dvxo lhyi yoh ung das. Dius dvxo ka jes dvmons lyis yoh ung das.
9 Ngos namoq lyis shvmanh las, lo jens nyoshoq dyei das. Ngos namoq yah toh dah thanghchvp goeng nhang das.
10 Yhomh kat toh jyo nyo las zvn gonh yoh zo das. Jyo saiq kat das zis nyet dah jyo cauh yoeus doeuh tyamp chah das.
11 Ngos namoq mas ngah gyingshang Zvng mas nyeis das. Ngos namoq jyank masyah khanhamp eq ma tauh loh das.
12 Ngos namoq yah dvgeh nghuot das. Ngos namoq dah Mangso duot las namoq eq ngah dius duot das.Ref 26.12: 2Kr 6.16
13 Ngos Yhensain, namoq dah Mangso ka namoq lyis Egutu masyah shwih thuq los. Housoeh las namoq jons ma nghuot lo. Ngos namoq lyis duon zaiq toh dah yomsoq lyis khyauh tyamp dyei las namoq lyis zungh zungh loh nhang.
Domsyos ma Gyo las Joeng cho
(Lyi 28:15-68)
14 Yhensain taiq: Namoq ngos tyingtoh dang domsyos ma gyo lyis, namoq joeng zis xauh das.
15 Namoq ngah lyi yahge ngos tyingtoh dang lyis domsyos gyo das zis ngoek las ngos namoq yah toh dah thanghchvp thyoq lyis gas,
16 Ngos namoq lyis joeng das. Namoq mas dyoqbis zainsmuh she los das. Ma yoh yhoh dah noslom yahge nyoq gos nhang dah nos, shei loh nhang das. Namoq jyo khyoq laus eq vkyuh ma bos, jeswus jens namoq lyis ung lha namoq khyoq toh jyo yhomh zo das.
17 Ngos namoq lyis nungs phuk tyamp das las namoq jes somh loh zis yah namoq hoeng bang gas namoq lyis guon das. Namoq gas svsoh gyuk las hank ma khat laus eq phang das.
18 Hounyhoq xauh laus eq ngah domsyos ma gyo shih lyis gas ngos namoq lyis joeng cho nyhet huon lung dyei das.
19 Ngos namoq dah khwank nge khyop das. Mau ma wus das las namoq dah nyeisjvng gas kyuk las thyeq teh than das.
20 Namoq yomkat zis vkom mus das: khasoeh ge lyis, namoq maunyeis gas jyo ma dyei, shihzains eq vshih ma shih das.
21 Namoq ngos lyis thoenk tyamp las tsoq las domsyos ma gyo shih lyis gas, ngos namoq lyis joeng cho nyhet huon doms lung dyei das.
22 Ngos namoq jyank mas gyukphoh yewus nhang lha hauh bang gas namoq lo jens lyis sat das, namoq gaunyhauq lyis mhont das las namoq dvtsiq dvnyet lo las namoq dah cho tsingtsam mus das.
23 Haih joeng cho dah thang lhyi namoq ngah dang ma gyo, ngos lyis tsoq toeu nghank shih lyis gas,
24 Ngos eq namoq yah tyi lha, xik pheh thoq lyis nyhet huon zes than dah joeng cho dyei das.
25 Yah thanghchvp thyoq gvng mas namoq lyis joeng das zis ngos namoq jyank mas jes she los das. Namoq jesluiq shoq wus vkhau mha huom lhyi, ma yoh yhoh dah noslom namoq mas nhang das. Jeswus yah namoq lyis ung nhang das.
26 Ngos namoq lyis thukxank dah zonoms lyis thyet tyamp dyei las, vmesbih dvci yuk nyi dvkhyomp kyingh mas dvpiq noh dah ohlhyoq namoq lyis gvm dyei das: namoq zo goeus laus eq dvyuot nyeis shih das.
27 Hauh zis dye thang lhyi eq namoq tsoq toeu nghank las domsyos gyo das zis ngoek shih lyis gas,
28 Ngos nhaiqyo zis yah namoq lyis tyi lha xik pheh thoq lyis nyhet huon zes than dah joeng cho dyei das.
29 Namoq gas sunk yuot las namoq nyang lo jens lyis zo das.
30 Ngos namoq dah jing thoq mas dah paiq joqyos lyis mhont das, xangh phon lhyi thyoq khyoq das. Namoq mvng lyis hauh lains joq dah phvra thoq mas doeuh kih das. Ngos namoq lyis choqh thank las,
31 namoq wus jens lyis mhanhdyvp kuot das, namoq paiq dah joqyos lyis mhont das, namoq dah phudyei lyis ma lhom yoeus dyei das.
32 Ngos namoq mau lyis shank shoq thyoq das las houmha los nyeis dah jeswus jens hauh zis nyvng las dvn das.
33 Ngos namoq mas jes she kat las namoq lyis lvbaus mau mas sanh tyo tyamp das. Namoq mau gas jyamhjyuklhyuk mus das, namoq wus jens eq mhanhdyvp duot das.
34-35 Housoeh namoq gas namoq jeswus jens mau mas jons loh gyo lyis, namoq mau gas jyamhjyuklhyuk doeuh tyamp toh las yos hwangh joq das. Hauh mau gas hau dvyoq gonh tam joq zis yah yoh pyo nyeis das. Hau cho namoq nyeis khoq uhlyis ma dyei.
36 Namoq jons loh bang lyis gyuk nhang lha, phoq lyis lyeis muot thwe yah phang nhang das: Namoq gas moeng zan yvmas phang teh phang das. Namoq vnvm mas jeswus ma nyeis laus eq lains das.
37 Namoq lyis hank ma khat laus eq namoq nyang changh thungh lains das. Jeswus lyis ma yoh thoenk zan das.
38 Namoq gas jons loh yvmas shei das, namoq dah Jeswus mau mas dyuk loh das.
39 Namoq dah jeswus mau mas dvtsiq doeng nyeis shih bang eq namoq dah yaunos yahge namoq phauh thyeih moq dah yaunos gvng mas dyuk das.
40 Nghuot laus eq namoq dah vnyau vshih jens gas nyamoq yaunos lyis eq, nyamoq phauh thyeih moq dah yaunos lyis rhen mvbeh. Houka nyamoq ngos lyis tyi lha gomloeus toq gvng mas,
41 ngos nyamoq lyis tyi lha, nyamoq dah jeswus mau mas jons loh nhang. Thang thank lyis namoq dah vnyau vshih gas ehnyet nyhen mha gyoh las nyamoq yaunos yahge gomloeus toq cho xiklyis ngos dyei dah joeng cho lhyi kham yoeus lyis gas,
42 ngos eq Yakop, Isak, Abraham moq yah toh dah thanghchvp lyis soh das. Ngah dius jens lyis hauh mau dyei das xiklyis dangthoengh vsaiq doms toh das.Ref 26.42: Vpm 17.7-8, 26.3-4, 28.13-14
43 Nghuot laus eq cangxeih lyis hauh mau gas nyah mau mas dah dius dvnganh shank nhang goeus. Housoeh hauh mau gas doeuh tyamp toh las yos hwangh joq. Houmha kang dwis nyeis shih bang gas ngah lyi yahge ngos tyingtoh dang lyis peq tyamp dah yobos dyei zis kham chah.
44 Nghuot laus eq jeswus mau mas nyeis shih uhlyis ngos nyamoq lyis shank shoq ma tyamp, shank shoq ma mhont das. Ngos nyamoq yah toh dah thanghchvp ma thyoq, ngos Yhensain, nyamoq dah Mangso nghuot.
45 Ngos nyamoq dah phauh thyeih moq yah toh dah thanghchvp lyis vsaiq doms kuot das. Ngos nyamoq dah Mangso duot das oen nyamoq lyis Egutu masyah khyuot shwih los. Haih ngah yomsoq lyis gohtoeu dius nyau jens nyvng. Ngos Yhensain nghuot, ge.
46 Hai dvnganh gas Israel jens xiklyis, Sina boms mas Yhensain Moshe lhyi dyei dah lyi yahge tyingtoh dang tsain nghuot.