24
Nyitoengh lyis Loqzamh zwi
(Dyu 27:20-21)
Yhensain Moshe lhyi taiq: Zvng mas Nyitoengh xiklyis gis thank tsanlun coeu gyingh chi los das xiklyis Israel jens lyis tying aq. Housoeh vjangh nyi yoh duk nyeis das. Aron gas nyenhthang khanghmuh nyi tuonh las nvpyo jweh shoq duk nyeis das nyhenshang ba chah. Houka gyingshang thank joqyos mas joq dah Thanghchvp Kwi xik, gosseh nghe pheh Yhensain xikkhonh mas joq. Haih lyi gas jweh los das shishenh dvnganh lyis chank chah. Aron gas xing gyingh nyituonh gus mas nyitoengh nyi Yhensain xikkhonh mas vjangh duk joq das xiklyis yoeuh ba chah.
Mangso lhyi Dyei Ohlhyoq
Monh noeuh oengci paung yoeus las ohlhyoq dvci aiq lhyoq piq aq.Ref 24.5-6: Dyu 25.30 Hauh yvlyis Yhensain xikkhonh, xing gyingh yah kyop dah kihgus thoq mas dvjens mas khyuk lhyoq lhyoq mulas aiq jens toh aq. Yhensain lhyi zonoms jyungshuk khyvlyis ohlhyoq joqyos yoeus das xiklyis hau ohlhyoq nyang jens nyang mas loban gyingh dvtsiq kih toh aq. Jweh los das shishenh dvnganh lyis no nyeih khanghmuh Yhensain xikkhonh mas hauh ohlhyoq toh chah. Heika Israel jens dah vcaiq vto yvwons nghuot. Hau ohlhyoq gas Aron yahge nyah vnyau vshih jens yah sen lha, nyamoq hau gyingshang joqyos mas zo chah. Heika phudyei bang xiklyis Yhensain lhyi phudyei dah zonoms jyungshuk nghuot yvmvyah svsoh gyingshang.Ref 24.9: Mat 12.4; Mak 2.26; Luk 6.4
Lyi jus khyvlyis Joeng Yikhyoh
10-11 Egutu vbusbih yahge Dan vkoq mas Dibri dah lonyi Shelomit ge Israel vmesbih dah loloeu dvyuk nyeis. Nyang gas dvp mas Israel dvyuk yah dyoqgoh. Housoeh dyoqgoh uhlyis nyang Yhensain lhyi nhoengh las nyang lyis Moshe jyank mas tsain shwih los. 12 Nyamoq gas hauh soeu lhyi lhunk toh las Yhensain khasoeh kuot das cho taiq das yvlyis langh nyeis.
13  Yhensain Moshe lhyi taiq zis gas, 14 Hauh soeu lhyi dvp nghe pheh shwih thuq geh. Nyang nhoengh zis xauhgyo soeu khanghmuh dah loq nyang yobos bos kanghjyoeng kat khyvlyis nyah uhloms mas kih las moqphung ka nyang lyis luk yah doeuh sat geh. 15 Hauh thang lhyi Israel jens lyis taiq aq: Hank laus eq Mangso lhyi nhoengh soeu ka nyah yobos kham chah, 16 nyang shei chah. Israel laus eq Israel mas nyeis dah lvbaus laus eq Yhensain lhyi nhoengh soeu lhyi ka moqphung yah nyang lyis luk yah doeuh sat chah.
17 Dius sat soeu hank laus eq sat zis xauh chah.Ref 24.17: Dyu 21.12 18 Gohyuk yah sen dah gaunyhauq lyis sat soeu ka khyauh chah. Soenghchoenk gas dvkang nyhenshang dvkang nghuot.
19 Dvyuk yuk gohyuk lyis nos nhang lhyi, nyang lyis eq housoeh nos nhang chah. 20 Nyang shohyau khyauh lyis nyah shohyau eq gyau chah. Nyah nyoqjeih xiklyis nyoqjeih, zwis xiklyis zwis, dvm jyen cap chah. Cha laus eq gohyuk lyis nos nhang lhyi nyang lyis eq housoeh doms kuot chah.Ref 24.20: Dyu 21.23-25; Lyi 19.21; Mat 5.38 21 Hank laus gaunyhauq sat dyei soeu ka khyauh chah, hank laus eq dius sat soeu ka sat zis xauh chah. 22 Haih lyi gas Israel xiklyis laus eq, Israel jens mas nyeis dah lvbaus xiklyis laus eq dvnganhmoq xiklyis toeuq toh: khasoeh ge lyis ngos Yhensain, namoq dah Mangso nghuot, ge.Ref 24.22: Gyu 15.16
23 Moshe ka Israel jens lyis haih zis taiq lyis, nyamoq gas hau nhoengh soeu lhyi dvp nghe pheh shwih thuq las luk yah tsain doeuh sat. Heisoeh khyvlyis Israel dius jens gas Yhensain Moshe lhyi tying toh zis kuot.