17
Suih Ma gis Zo
Yhensain Moshe lhyi taiq zis gas, Haih o mha dah lyi Aron yahge nyah loloeu jens lyis eq, Israel dius jens dvnganh lyis eq dyei aq. 3-4 Israel dvyuk Yhensain lhyi jyungshuk khyvlyis dyei dah noeu, yvng, shvbeq lyis Yhensain xikkhonh Zvng khomh mas lai las khalhye laus eq gohyos sat soeu ka lyi lhoeu thyoq goeus. Nyang suih huot goeus las Mangso dah dius dvyuk oen ma nghamh dyei lo. Hai tying toh dah vjyuk gas, Israel dius jens nyamoq nghe mha gyangh sat dah gaunyhauq lyis gvshih Yhensain jyank mas she los das xiklyis nghuot. Gvshih nyamoq hauh yvlyis Zvng khomh, phudyei soeu jyank mas she los las nyenstap jyungshuk khyvlyis sat das. Phudyei soeu ka, hau suih lyis Zvng khomh, phon mha doeuh gyon las coeu lhyi eq ngheq las Yhensain lhyi nhaiqdoeus nhang dah xangh shom thuq los nhang das. Israel dius jens gas shvbeq yius lyis phudyei khyvlyis nghe pheh gaunyhauq sat zis yah Yhensain lhyi lom ma luk kuot los zis ma gis kuot lo. Israel dius jens gas haih lyi lyis jweh los das shishenh dvnganh mas chank kuot chah.
Israel jens laus eq, dius phung mha nyeis dah lvbaus laus eq, ngheq dyei jyungshuk, gohtoeu jyungshuk cha laus eq, Yhensain lhyi jyungshuk phudyei lyis Zvng khomh mas lai las khalhye laus eq phudyei soeu ka Mangso dah dius oen ma nghamh dyei lo das.
10 Israel jens laus eq, dius phung mha nyeis dah lvbaus laus eq dvyuk yuk suih bos shih dah shoh zo lyis gas Yhensain nyang lyis nyoq gis ma yoeuh, nyah dius dvyuk khyvlyis ma nghamh dyei lo das.Ref 17.10: Vpm 9.4; Lew 7.26-27, 19.26; Lyi 12.16, 23, 15.23 11 Dwis nyeis ja khanghmuh dah kang ka suih mas bos yvmvyah Yhensain tying toh zis gas, Dius jens dah yaunos yoeus tyamp dyei das zis suih dvnganh phon mha huot chah, ge. Kang nghuot dah suih yah yaunos yoeus tyamp dyei.Ref 17.11: Heb 9.22 12 Housoeh yvmvyah Yhensain Israel jens lyis taiq toh goeus, nyamoq laus eq nyamoq mas nyeis dah lvbaus laus eq suih bos shih dah shoh ma gis zo, ge.
13 Israel laus eq, moqphung mas nyeis dah lvbaus laus eq dvyuk yuk shoh khat las lhoq ja yewus, nghoq yoh yoeus lyis, hauh suih tsoh mas kamp huot las tsoh yah nghop chah. 14 Dwis nyeis ja khanghmuh dah kang ka suih mas bos. Housoeh yvmvyah Yhensain Israel jens lyis suih bos shih dah shoh ma gis zo ge taiq toh. Zo soeu lhyi ka nyah dius oen ma nghamh dyei lo das.
15 Israel laus eq, lvbaus laus eq, dvyuk yuk nyang pheh shei, nghuot ya yewus ngat sat shoh zo soeu ka, nyah dyimis cheih, gungs cheih chah. Nyang lhoqshang shoq nyenhthang jweh shoq langh chah. 16 Nyah dyimis ma cheih, gungs ma cheih lyis gas, nyah yobos nyang kham chah, ge.