16
Shangphu Nyeih
1 Aron lotang Yhensain lhyi ma gyingshang dah nyi yah phudyei las sat zis xauh las shei thang lhyi Yhensain Moshe lhyi taiq.
2 Nah vmang Aron lyis taiq aq. Gosseh nungsthank Thanghchvp Kwi joq dah Gyingshang thank joqyos mas mvgon vwvng: khasoeh ge lyis houka hau kwi nghop thoq mas ngos jyommauh yah thuq los dah joqyos nghuot. Nyang domsyos ma gyo lyis sat zis xauh das.Ref 16.2: Heb 6.19
3 Aron gyingshang thank joqyos mas yoh wvng das xiklyis, yaunos jyungshuk xiklyis noeulu kyoh dvdoeu, ngheq dyei jyungshuk xiklyis yvnglus dvdoeu she los chah.Ref 16.3: Heb 9.7
4 Hauh thang lhyi Yhensain ka o mha dah taiq shet cho dyei. Aron gyingshang thank joqyos mas ma wvng shih lyis nyang gungs cheih chah. Hauh thang lhyi phudyei thau wuot chah. Houka jeiyhwiq dyixing yahge lhuhkhyaq, dyichih yahge uhthop nghuot.
5 Israel moqphung ka Aron lyis yaunos jyungshuk xiklyis beqlus aiq doeu, ngheq dyei jyungshuk xiklyis yvnglus dvdoeu dyei das.
6 Nyang noeulu lyis nyah yaunos yoeus tyamp dyei das xiklyis yahge nyah yhenbang dah yaunos xiklyis phudyei das.
7 Hauh thang lhyi nyang hau beqlus aiq doeu lyis Yhensain xikkhonh Zvng khomh mas she los chah.
8 Nyang hau shvbeq aiq doeu lyis doeugoh zis yah luk aiq lom yhung lha Yhensain xiklyis dvdoeu, Azazenote 16.8 Azaze: Mhanhdyvp mas dah yius nyings dvkoeuq nghuot mvbeh. xiklyis dvdoeu oen comh das.
9 Aron gas doeugoh zis yah Yhensain xiklyis ge khyen dah shvbeq lyis yaunos jyungshuk khyvlyis phudyei das.
10 Azaze xiklyis khyen dah shvbeq lyis gas Yhensain lhyi vdwis kyauh lho lha, mhanhdyvp pheh Azaze jyank mas dius jens dah yaunos wons loh nhang.
11 Aron gas, nyah xiklyis eq, nyah yhenbang xiklyis eq yaunos jyungshuk khyvlyis hau noeulu phudyei uhlyis,
12 nyang nyi bvn yoeus las phon mha dap nyeis dah nyigywe dyingh shoq kat, loban aiq tsop yoeus las gyingshang thank joqyos mas chi los das.
13 Hau Yhensain xikkhonh mas nyang hau nyi mas loban kat das. Hau loban nyikhauh gas Thanghchvp Kwi nghop lyis gos das las nyang hauh yvlyis ma nyvng las ma shei das.
14 Nyang noeulu suih dvkhamh yoeus las loqnyhauh yah Kwi nghop xik mas tyitsant das. Dvkhamh lyis Thanghchvp Kwi xik mas nyhet lhain tyitsant das.
15 Hauh thang lhyi nyang dius jens dah yaunos jyungshuk shvbeq sat las, hau suih lyis Gyingshang thank joqyos mas chi wvng las noeulu suih tyitsant teh Kwi nghop xik mas eq, Thanghchvp Kwi xik mas eq tyitsant das.Ref 16.15: Heb 9.12
16 Israel dius jens mas bang ma lhoq. Housoeh las Aron gas gyingshang thank joqyos mas Yhensain lhyi yoh phuqsoe das xiklyis, nyang hauh vyhang lhyi Israel jens dah yaunos masyah cheihshang cho kuot. Housoeh lyis houka Israel jens dah yaunos masyah lhoqshang das. Nyang hau Zvng lyis housoeh kuot chah zis gas, hauh zis ma lhoq dah Israel dvp dah vgungs mas joq yvmvyah nghuot.
17 Aron hau gyingshang thank joqyos lyis cheihshang cho kuot das zis wvng loh masyah doms thuq los shishenh jweh shoq, Zvng khau mha hank eq ma gis nyeis. Nyang cheihshang cho kuot uhlyis nyah xiklyis, nyah yhenbang xiklyis yahge dius phung xiklyis nghuot.
18 Hauh thang lhyi nyang ngheq phudyei las phon cheihshang das xiklyis phudyei phon mha thuq e chah. Nyang noeulu suih dvkhamh yahge shvbeq suih dvkhamh yoeus las phon thunk khyau mha tsain juot chah.
19 Hau suih dvkhamh lyis nyah loqnyhauh yah phon mas nyhet lhain tyitsant chah. Heisoeh khyvlyis Israel jens dah yaunos cheihshang lha gyingshang nhang.
Yaunos Wons tyamp Shvbeq
20 Housoeh Aron hau gyingshang thank joqyos, nyet shih Yhensain xikkhonh Zvng, phon lhyi cheihshang cho dye tsain kuot lyis, Azaze xiklyis ge khyen toh dah shvbeq vdwis Yhensain lhyi kyauh das.
21 Aron gas hau shvbeq vdwis dah uhloms mas nyah loq aiq shot kih zis yah Israel jens dah ma gis zis, yaunos yahge gomloeus toq cho dvnganh rhen lha hau shvbeq uhloms mas thot kih thang lhyi, toeuq toh soeu lhyi hauh shvbeq mhanhdyvp pheh khat tyamp nhang das.
22 Hau shvbeq gas nyamoq dah yaunos dvnganh lyis dius ma nyeis joqyos pheh wons loh das.
23 Hauh thang lhyi Aron gas Zvng khau mha loh las, hau Gyingshang Thank Joqyos mas wvng das lyis wuot toh phudyei dyimis khyuot las houmha toh das.Ref 16.23: Ezk 44.19
24 Nyang gyingshang joqyos mas gungs cheih lho lha nyah dyimis thaiq wuot chah. Hauh thang lhyi nyang nghe pheh thuq las nyang yahge dius jens dah yaunos yoeus tyamp dyei das xiklyis ngheq dyei jyungshuk phudyei das.
25 Nyang yaunos jyungshuk gaunyhauq coeu lhyi phon mha ngheq das.
26 Mhanhdyvp Azaze jyank pheh shvbeq loh khat kat soeu eq dvp khau mha ma doms wvng shih lyis nyah dyimis cheih, gungs cheih chah.
27 Yaunos jyungshuk xiklyis yhung dah noeulu yahge shvbeq mvng lyis dvp nghe pheh yoeus thuq las yeis, shoh, oeu dvnganh lyis ngheq tyamp chah. Hauh suih gas yaunos yoeus tyamp das xiklyis Gyingshang Thank Joqyos mas yoeus wvng zis nghuot.Ref 16.27: Heb 13.11
28 Hau ngheq soeu eq dvp khau mha ma tauh los shih lyis nyah dyimis cheih, gungs cheih chah.
Shangphu nyeih
29 O mha lyi gas jweh los das shishenh dvnganh yvmas soh nyeis chah. Lhamhmuh nyhet vkhyvp dah ci vnyeih lyis Israel jens eq nyamoq mas nyeis dah boenghwus jens eq wom kyi chah, muh cha eq ma gis zwi.Ref 16.29-34: Lew 23.26-32; Gyu 29.7-11
30 Hauh nyeih lyis nyamoq yaunos masyah cheihshang cho gyangh kuot zis kuot chah. Housoeh nyamoq gas lhoqshang das.
31 Hauh buisnyeis gas nyamoq womkyi lha muh ma zwi dah nyeih nghuot las svsoh gyingshang nyeih nghuot. Haih lyi gas jweh los das shishenh vcaiq caiq chank nyeis chah.
32 Uwus gungsthaiq das zis coeu juot cheihshang lha gyamh huon toh dah Phudyei Zainsmuh gas hau cheihshang cho kuot chah. Nyang gas phudyei dyixing wuot las,
33 Gyingshang thank Joqyos, Yhensain dah xikkhonh Zvng, phon, phudyei bang yahge moqphung gonh lhyi cheihshang cho kuot dyei.
34 Haih lyi jens gas jweh los das shishenh dvnganh mas chank kuot chah. Haih zis gas Israel jens dah yaunos cheihshang das xiklyis dvzvn dvlhain kuot chah.
Housoeh las Aron gas Yhensain Moshe lhyi tying toh khyvlyis kuot.