13
Dvmjot yah Sen Lyi
Yhensain Moshe yahge Aron lyis haih lyi dyei. Dvyuk yuk nyah shoh mas dvm bos, nghuot ya dyings nyuk, nghuot ya nyi ngeh dvm, dvmjot pheh je los lyis, nyang lyis Aron vnyau phudyei soeu jyank mas shwih xoeuq chah. Phudyei soeu ka hauh dvm lyis yoeuh dyei das: hauh dvm mas yuk dah mauh thyoeu lha dvm khwangh joq lyis gas dvmjot nghuot, hauh soeu ma lhoq oen taiq dyei chah. Nghuot laus eq dvm gas thyoeu, ma khwangh, mauh eq ma thyoeu lhyi ka, phudyei soeu ka hau nos dap soeu lhyi nyhet nyeih gohtoeu toh das. Nyhet vnyeih lyis phudyei soeu ka nyah dvm lyis doms yoeuh las hauh nos ma je, vgus dvnghuot ge nghamh lyis gas nyhet nyeih gohtoeu doms toh das. Phudyei soeu ka nyang lyis nyhet vnyeih lyis doms yoeuh las nyah dvm ma je los nyhauh loh lyis gas, hauh soeu lhoqshang oen taiq dyei chah. Houka dvm dvnghuot, nyang nyah dyimis cheih las lhoqshang das. Nghuot laus eq phudyei soeu dye yoeuh dyei las lhoqshang ge taiq dyei thang lhyi nyah shoh mas dvm je los lyis gas, nyah gungs phudyei soeu lhyi e doms chixoeuq chah. Phudyei soeu eq doms yoeuh las nyah dvm je dyos loh lyis gas, hauh soeu ma shang oen taiq dyei chah: houka dvmjot nghuot.
Dvmjot nos soeu lhyi phudyei soeu jyank mas shwih xoeuq chah. 10 Phudyei soeu ka nyang lyis yoeuh das. Nyah shoh mas dvm thyoeu bos, mauh eq thyoeu los, dvm mas huot dyingh joq lyis, 11 houka nyah shoh mas dap goeus dah noslom nghuot. Phudyei soeu ka nyang lyis ma lhoq oen taiq dyei das. Nyang ma lhoq ma shang yvmvyah nyang lyis gohtoeu ma toh lo noh. 12 Hauh noslom gas je las uhloms masyah khyei jweh shoq thyoeu joq lyis; 13 phudyei soeu ka nyang lyis doms yoeuh las hauh soeu dah gungs gonh mas thyoeu nghop joq zis nyvng lyis gas nyang lyis lhoqshang oen taiq dyei das. Gungs gonh thyoeu lyis ka nyang lhoqshang. 14 Nghuot laus eq hauh uhlyis dvm thuq los lyis gas nyang ma lhoq. 15 Nyang lyis phudyei soeu doms yoeuh das las, dvm thuq los zis nyvng lyis, nyang lyis ma lhoq oen taiq dyei das. Dvm thuq los ge zis gas dvmjot nghuot las nyang ma lhoq. 16 Nghuot laus eq hauh dvm gis las doms thyoeu los lyis gas hauh soeu phudyei soeu jyank mas doms loh das. 17 Phudyei soeu yoeuh dyei das. Hauh nos dvm thyoeu los lyis nyang gas lhoqshang phudyei soeu eq nyang lyis lhoqshang oen taiq dyei das.
18 Dvyuk yuk dyings nyuk zis gis goeus, 19 hauh thang lhyi hau dvm-yos mas thyoeu, nghuot ya thyoeu nes vchent thuq los lyis phudyei soeu jyank mas loh das. 20 Phudyei soeu yoeuh lyis khwangh las mauh thyoeu lhyi ka, hauh soeu ma lhoq ge taiq das. Houka dyings masyah bweh los dvmjot nghuot. 21 Nghuot laus eq phudyei soeu yoeuh lyis mauh ma thyoeu, yeis eq ma khwangh, nyhauh teh nyvng lyis gas, hauh soeu lhyi nyhet nyeih gohtoeu toh das. 22 Nyah dvm je los lyis gas phudyei soeu ka nyang lyis ma lhoq oen taiq das: nyang mas noslom bos. 23 Hau dvm eq ma je, vgus dvnghuot lyis gas dyings yos dvnghuot, phudyei soeu eq nyang lyis lhoqshang oen taiq dyei das.
24 Nyi ngeh ku soeu dah cho, nyah shoh jen mas thyoeu, nghuot ya nes los lyis, 25 phudyei soeu nyang lyis yoeuh dyei das. Hauh vchuq mas mauh thyoeu los khwangh teh nghuot lyis gas, nyi ngeh dvm yos masyah thuq dah dvmjot nghuot. Phudyei soeu eq hauh soeu lhyi ma lhoq oen taiq dyei das. 26 Nghuot laus eq dvm yos mas mauh ma thyoeu, shohyeis eq ma khwangh, nyhauh teh nghuot lyis gas phudyei soeu ka hauh soeu lhyi nyhet nyeih gohtoeu toh das. 27 Nyhet vnyeih lyis phudyei soeu doms yoeuh dyei das. Hau dvm yos je los lyis houka dvmjot nos nghuot las nyang lyis ma lhoq oen taiq dyei das. 28 Nghuot laus eq hau dvm yos gas vgus dvnghuot, ma dyos loh, nyhauh teh nghuot lyis gas, houka dvmjot ma nghuot. Phudyei soeu ka hauh soeu lhyi, Houka nyi ngeh yos dvnghuot yvmvyah lhoqshang, oen taiq dyei das.
29 Vmesbih vbusbih hank laus eq uhloms, nghuot ya amchamh mas nos bos lyis, 30 phudyei soeu yoeuh dyei das. Hau shoh khwangh teh, houmha mauh eq xwi lha ngis lyis gas, hauh zis dvmjot nghuot las hauh soeu lhyi ma lhoq oen taiq dyei das. 31 Phudyei soeu yoeuh dyei uhlyis hau dvm ma khwangh laus eq, cam ma noq lyis gas, nyang hau nos dap soeu lhyi nyhet nyeih gohtoeu toh das. 32 Nyhet vnyeih lyis phudyei soeu hau nos lyis doms yoeuh las, hau nos ma je los, cam eq ma xwi, shoh eq ma khwangh lyis gas, 33 hauh soeu ka dvm mas ma zangh, cam yuk tyamp das. Phudyei soeu ka nyang lyis nyhet nyeih gohtoeu doms toh das. 34 Nyhet vnyeih lyis, phudyei soeu hau dvm doms yoeuh dyei las, hau dvm ma je, shoh eq ma khwangh lyis gas, nyang lyis lhoqshang oen taiq dyei das. Nyah dyimis cheih goeus ya lhoqshang das. 35 Nghuot laus eq nyang lyis lhoqshang oen taiq dyei thang lhyi nyah dvm je los lyis gas, 36 phudyei soeu doms yoeuh dyei das. Hauh dvm je dyos loh lyis gas cam xwi ma xwi ma yoeuh chah lo: Nyang ma lhoq ma shang. 37 Nghuot laus eq phudyei soeu nghamh lyis hau dvm ma je los, cam noq eq yuk los goeus lyis gas hau dvm gis los goeus las phudyei soeu ka nyang lyis lhoqshang oen taiq dyei das.
38 Vbusbih vmesbih hank laus eq shohyeis mas vchuq chuq thyoeu lhyi, 39 phudyei soeu ka hauh soeu lhyi yoeuh dyei das. Hau vchuq gas mvgon dvthyoeu, houka shohyeis mas bweh los dah vkywank dvnghuot: nyang lhoqshang.
40-41 Nungs pheh cam gyot, nghuot ya ngelang pheh cam gyot lyis, hauh zis nyang lyis ma lhoq ma shang ma bweh nhang. 42 Nghuot laus eq nyah uhtyauh mas, vthyoeu nes kyingh dah dvm thuq los lyis gas dvmjot nghuot. 43 Phudyei soeu ka nyang lyis yoeuh dyei las, shohyeis mas nes dah dvm thyoeu bos lyis gas, 44 nyah uhloms mas dvmjot jot yvmvyah nyang lyis ma lhoq oen taiq dyei das.
45 Dvmjot dap soeu ka dyityang wuot, cam ma tyeh, nyah nyoqnho o chink lyis nghop las, Ma lhoq ma shang, ma lhoq ma shang, oen kaiq chah. 46 Nyang hau nos bos dvchank gas ma lhoq ma shang: nyang gohyhamh yah we dah dvp nghe mha nyeis chah.
Mauhjungh yah Sen Lyi
47-48 Sauh dyimis, jeiyhwiq dyimis, jeiyhwiq misseh, sauh misseh, shohyeis, shohyeis yah kuot dah vyhang cha mha laus eq mauhjungh yuk lyis, 49 houka nyaus, nghuot ya nes lyis, hauh zis dyos loh dah mauhjungh nghuot las phudyei soeu lhyi chixoeuq chah. 50 Phudyei soeu ka hauh yvlyis yoeuh las hauh vyhang gohyos nyhet nyeih yoeus toh chah. 51 Nyhet vnyeih lyis nyang doms yoeuh das las hauh mauhjungh dyos loh lyis gas hauh vyhang ka ma lhoq lo. 52 Dyos loh dah mauhjungh lyis gas nyi yah mhont tyamp chah yvmvyah phudyei soeu ka hau vyhang lhyi ngheq tyamp das.
53 Nghuot laus eq phudyei soeu yoeuh lyis hau mauhjungh vyhang mha ma dyos loh zis nyvng lyis, 54 nyang hau vyhang lhyi cheih tyamp nhang das las, gohtoeu nyhet nyeih doms toh das. 55 Hauh thang lhyi nyang doms yoeuh das las hauh zis ma dyos loh laus eq vwot ma thaiq loh lyis gas hauh zis ma lhoq ma shang. Hauh vyhang ka xikpheh yom laus eq nungs pheh yom laus eq ngheq tyamp chah. 56 Nghuot laus eq Phudyei soeu doms yoeuh lyis, hau mauhjungh dyuk loh lyis gas hau yvlyis dyimis nghuot ya shohyeis masyah chuiq tyamp das. 57 Hauh thang lhyi hau mauhjungh doms thuq los lyis gas, hauh zis doms dyos loh goeus las hauh dyimis sain ka hauh yvlyis ngheq tyamp das. 58 Nyang hauh vyhang cheih lyis hauh vkywank dyuk loh. Nyang hauh yvlyis doms cheih lyis houka lhoqshang das.
59 Haih goeu gas sauh, jeiyhwiq, sauh dyimis, jeiyhwiq dyimis, shohyeis yah kuot dah vyhang dvja ja mas mauhjungh yuk cho dah lyi nghuot.