4
Yerusalem Gyoh Thang lhyi
Bvng dah ngamoq xing ka ma bvng lo mus.
Yhenmuh mas dah luk gas talhoeu mha sanh joq.
 
Zion loloeu jens gas ngamoq xiklyis xing teh phauhdap,
nghuot laus eq gvshih nyamoq gas tsoh yam teh kuot zis xauh.
 
Ye khuih zains yangh nyah lo jens lyis nauh seq gvmshuk.
Nghuot laus eq ngah dius jens gas gola-u nghoq teh nyamoq dah ngis bang lyis lhoeng khyvlyis kuot.
 
Nyamoq gas nyamoq dah lonoeuh jens lyis yuot shet shei nhang.
Loshang jens zonoms sang laus eq hank ma dyei das.
 
Xikpheh zonoms nghamh zis zo bang wus talhoeu mha yuot shei joq.
Gis gis nyhoeu bes kat zis xauh bang gas mhotkhyot boms mas zonoms pau.
 
Ngah dius jens xauh joeng zis gas Sodom mas nyeis dyos bang nyetlos nyettant xauh lasRef 4.6: Vpm 19.24
Mangso dah loq khau mha dyoqbis thoq lyis yangh zes xungh.
 
Ngamoq dah zaulo jensnote 4.7 Zaulo jens nghuot ya, Nazari jens gas vwot v-oeu ma nghuot, gyu teh gyingh,
yangh las yombos, yanghzan zis yah ying ying nghuot.
 
Gvshih gas wus talhoeu mha nyamoq nyoqnho ka cot cot noq shei joq las nyamoq lyis hank ma seq yoeuh comh lo.
Nyamoq dah shohyeis gas thangh teh kyuk las shohyau mas nyhung dap joq.
 
Jeszan yvmas shei bang gas yuot shet shei bang thoq lyis sunghhuq.
Yuot bang gas nyamoq kang khoeu das zis zonoms ma yoh las zoh yah yuot shei.
 
10 Ngah dius jens mas jweh los dah dyoqbis zainsmuh gas gyukphoh zis she los.Ref 4.10: Lyi 28.57; Ezk 5.10
Jyetdap ungwes moq gas zonoms xiklyis nyamoq dah lo jens lyis jyauq zo.
 
11  Yhensain ka nyah nhaiqlom tsoeu zis pih las
nyang Zion lhyi nyi ngheq kat zis yah ngeh jom tyamp.
 
12 Yerusalem wus khomh cho yah
jyenh wvng los bang yoh wvng los ge yvlyis hank khamha bang eq ma jingh.
Gohnyau bang dah guon bang yangh ma jingh.
 
13 Nghuot laus eq hauh zis bweh goeus khasoeh ge lyis nyah lvpe jens yaunos kuot las
nyah phudyei bang gas yobos ma bos bang lyis shei nhang yobos bos gvng mas nghuot.
 
14 Nyah uhshe bang gas wus talhoeu chank yah nyoqjet bang teh whang yenh las
suih lhoeuh yvmvyah hank eq nyamoq lyis ma tanh.
 
15 Dius jens gas nyamoq lyis, Loh geh, namoq vwot v-oeu nghuot. Ngos lyis vzangh goh, ge kaiq.
Housoeh las nyamoq gas dius dvnyau masyah gohtoeu dvnyau mas suh whang yenh.
Hank eq nyamoq lyis ma lhom yoeus.
 
16  Yhensain ka nyamoq yah cha ma sen lo: nyang nyamoq lyis sanh tyamp goeus.
Nyang ngamoq dah phudyei bang yahge uhshe bang lyis ma yoeuh lo cho chixoeuq.
 
17 Ngamoq gas, pangh das zis nyoq nyung shoq langh gom goeus.
Dyei das zis cha ma yoh dah dius nyau jyank masyah pangh das xiklyis langh nyeis shih.
 
18 Jeswus gas ngamoq lyis zungh yoeuh nyeis las ngamoq talhoeu mha yangh ma yoh suh yenh.
Ngamoq dah buisnyeis zoeus goeus, thang thank zis jweh los.
 
19 Ngamoq lyis chank khat bang gas
maukhung mha zonsmuh thoq lyis nyap.
Jing chank yah khat, ngamoq lyis sihyos mas tsain lhom.
 
20  Yhensain khyen toeuq kat dah hwankti ka
ngamoq dah kang ngamoq dah kang yhensain lhyi nyhik loh goeus.
Haih soeu ka jyenh wvng los soeu khanghmuh masyah ngamoq lyis gos dyei das oen, ngamoq loms toh soeu nghuot.
 
21 Edom yahge Uza mas nyeis bang eh, namoq yoh gaus uhlyis yis geh.
Nah dyoqbis zainsmuh eq jweh los nyeis.
Nvng eq vtyi vkamh yet las shohchen mus las xoqphuh das.
 
22 Zion lhyi nyah yaunos jyen dye cap goeus.
Yhensain ka yang lyis jonsdoeus loh yvmas ma nyeis nhang lo.
Nghuot laus eq Edom eh, nvng lyis Yhensain joeng las nvng kuot dah yobos lyis phant xoeuq das.