12
Gis Guons Vkuot
(Mat 10:26-27)
1 Hauh uhlyis dius ma thoq suon lo dah moqjens zain los las, nyamoq nyang changh zangh nang goh loh nyeis lyis, nyang nyah changlo jens lyis shih taiq zis gas, Pharishe jens dah bicheih lyis zaih geh, ge. Houka gis guons kuot ge dah wotwu nghuot.Ref 12.1: Mat 16.6; Mak 8.15
2 Khasoeh ge lyis ma yoh chixoeuq shoq nghop shung toh zis cha eq ma bos; ma yoh seq shoq shung toh zis cha eq ma bos.Ref 12.2: Mak 4.22; Luk 8.17
3 Housoeh yvmvyah namoq chuot yvmas taiq ya taiq zis lyis bvng yvmas xauhgyo los das. Yvplhunk mas nhuot sot sot zis yhen khung thoq mas taiq hoeuh loh das.
Gyuk Chah Soeu
(Mat 10:28-31)
4 Ngah loeuzomh jens eh, ngos namoq lyis taiq bah, gungs lyis kyingh yoh sat las hauh thang lhyi cha eq ma yoh kuot lo bang lyis vgyuk goh.
5 Nghuot laus eq hank lyis gyuk chah zis ngos namoq lyis taiq; gungs lyis sat thang lhyi, munyi thomh mas yoh khyoq kat dah yomsoq yoh soeu lhyi dvgyuk geh. Nghuot goeus, ngos namoq lyis taiq bah, nyang lyis gyuk geh.
6 Nghuot laus eq jos oeng doeu lyis dyvpson aiq kyvp yah ungh ma nghuot lhyeh? Hau jos dvdoeu lyis eq Mangso ma tohnyhik.
7 Namoq dah uhloms mas cam khvt dvnganh lyis yangh suon toh. Housoeh yvmvyah vchiq goh, namoq gas jos nyoshoq thoq lyis zes phauhdap.
Khristu lyis Rhen, Peq
(Mat 10:32-33, 12:32; 10:19-20)
8 Nghuot laus eq ngos namoq lyis taiq bah, Hank laus eq dius xikkhonh mas ngos lyis rhen soeu lhyi, cangsoeu Lo eq Mangso dah loeuswons bang xikkhonh mas nyang lyis rhen das.
9 Nghuot laus eq cangsoeu dius xikkhonh mas ngos lyis he tyamp soeu lhyi, Mangso dah loeuswons bang xikkhonh mas nyang lyis eq he tyamp das.
10 Cangsoeu Lo lyis dang yah jis shuot yobos lyis yoh khyuot dyei: nghuot laus eq Gyingshang Dyos lyis loeusmus soqzo dah yobos lyis gas ma yoh khyuot dyei das.Ref 12.10: Mat 12.32; Mak 3.29
11 Nyamoq gas namoq lyis lyi jungs mas nhaiqbos bang, vmingh yoh dah guon bang xikkhonh mas shwih loh lyis, khasoeh cha phuk taiq das zis vchiq goh.Ref 12.11-12: Mat 10.19-20; Mak 13.11; Luk 21.14-15
12 Hauh shishenh lyis khasoeh taiq chah zis gas, Gyingshang Dyos yah namoq lyis jyauh das.
Koh dah Dis Soeu Dangtoeuq
13 Dius huom mha dvyuk nyang lyis taiq zis gas, Svra eh, ngah vmang lyis ngos yah yhenzis gvm goh das cho lhyi bos taiq aq, ge.
14 Nyang hauh soeu lhyi taiq zis gas, Lvcang eh, nah zomh jo mas soetuon das zis yahge gvm dyei das soeu kuot das nyhenshang ngos lyis hank toeuq toh lah, ge.
15 Nyang nyamoq lyis taiq zis gas, Nyoqnoq cho lhyi tsain zaih lha zaih geh: khasoeh ge lyis, zisyos magons magoh yoh yvmas dius dah kang bos zis ma nghuot, ge.
16 Nyang nyamoq lyis dangtoeuq dvkoeuq taiq zis gas, Dis soeu dvyuk dah maunyeis mas guknyau shihnyau nyoshoq yoh los.
17 Nyang nghamh zis gas, Ngah guknyau shihnyau kat toh das joqyos ma bos, ngos khasoeh kuot das au?
18 Ngos heisoeh kuot das: Ngah jyi cauh lyis thyoq tyamp las, zes kuh zis tsuk lho lha, hauh yvmas ngah wom yahge yhenzis dvnganh kat toh das.
19 Housoeh las ngah gungs dyos lyis, Gungs dyos eh, zvnlom nyoshoq xiklyis vyhang nyoshoq kat toh goeus, zo shuk, pyo lha nyenstap nyeis aq, oen taiq das, ge.
20 Nghuot laus eq Mangso nyang lyis taiq zis gas, Koh soeu eh, khvnyens nyang, nyang nah gungs dyos lyis yoeus tyamp das: housoeh las nvng ba kat toh vyhang ka hank xiklyis nghuot das lah, ge.
21 Vsainnyang xiklyis zisyos yung toh las Mangso mha ma dis soeu ka housoeh teh soeu nghuot.
Mangso lhyi Loms aq
(Mat 6:25-34)
22 Tsai, nyang nyah changlo jens lyis taiq zis gas, Housoeh yvmvyah ngos namoq lyis taiq bah, kang xiklyis cha zo das; gungs xiklyis cha wuot das oen vchiq goh, ge.
23 Kang ka zonoms thoq lyis, gungs gas dyimis thoq lyis zes phauhdap.
24 Kvnhoq jens gas jyo ma khyoq, jyo eq ma yhomh zis lyis nghamh yoeuh geh; nyamoq mas jyi eq ma bos, zisyos eq ma joq; nghuot laus eq Mangso ka nyamoq lyis gvmtsoh nyeis. Namoq gas nghoq thoq lyis kha iq zes phauhdap!
25 Namoq chiq las vsainnyang kang lhyi loq dvbon hank yoh chent kat?
26 Housoeh teh ngis thank cho lhyi yangh namoq ma yoh kuot lyis, gohtoeu nyet shih goeu lyis chamus chiq nyeis goh lah?
27 Anghchau ban khasoeh yuk kuh los yvlyis nghamh yoeuh geh. Nyamoq gas muh eq ma zwi, jei eq ma ni, nghuot laus eq ngos namoq lyis taiq bah, phunk nyoqnho ngelang bos dah Solomon dyimis yangh haih ban dvjyo lhyi ma nyis.Ref 12.27: 1Hw 10.4-7; 2Ss 9.3-6
28 Lomsjingh ehnyet nain bang eh, yos mas yuk las phvnaq nyeihyo nyikhyomp mas kat tyamp das dah mhanh lyis yangh Mangso heisoeh gvmhuot lyis gas, namoq lyis hauh thoq lyis zes gvmhuot das ma nghuot lhyeh?
29 Cha zo cha shuk das oen zis yah sen yvmas kyingh shishenh vthank nhang goh.
30 Khasoeh ge lyis, hauh zis lyis gas mungkvn mas dah dius jens tsain xo lha, hounyhoq namoq chah nyeis yvlyis namoq dah Uwus seq.
31 Namoq gas Mangso munghdan lyis xo geh; housoeh lyis hau chah nyeis cho dvnganh namoq lyis lung dyei das.
Maukhung mha Dis Cho
(Mat 6:19-21)
32 Yvng phung ngis eh, Vchiq goh: khasoeh ge lyis, namoq Uwus gas hauh munghdan namoq lyis dyei das zis svsoh mes.
33 Namoq yoh zis lyis ungh las, gvm dyei geh. Khauh soeu ma jweh, naus eq ma yoh zo joqyos, maukhung mha namoq zisyos xiklyis ma seq tyang dah ngwis thung kuot toh geh.
34 Khasoeh ge lyis, namoq zisyos joq yvmas namoq nhaiqlom eq joq das.
Lomluk Soeu, ma Lyungs Soeu
(Mat 24:45-51)
35 Namoq dah yhensain nyihwank pwe mhayah tauh los lyis zes das xiklyis sont langh nyeis dah jyeidwis jens teh dyichih chih, nyibung tuonh las cicont langh nyeis geh.Ref 12.35: Mat 25.1-13
36 Nyang jweh las khomh koq lyis hau jyeidwis jens nyang lyis khomh phank dyei.Ref 12.36: Mak 13.34-36
37 Jyeidwis jens langh nyeis zis lyis yhensain los nyvng lyis, hauh jyeidwis jens gas ngelhoq. Ngos namoq lyis jyoengh taiq bah, hauh yhensain nyang dyichih chih lho lha, nyamoq lyis zojus mas tsung nhang lha, nyang nyang nyamoq lyis phuqsoe das.
38 Nyensyo gungsgvm lyis, nghuot ya maubuh los yoq lyis housoeh zungh nyeis langh zis lyis yhensain los nyvng lyis, hauh jyeidwis jens gas ngelhoq.
39 Haih zis lyis seq geh: khauh soeu khanhamp los das zis lyis yhensain seq nghuot lyis gas, nyah yhen lhyi ma los yoh thyoq wvng shoq nyang zungh nyeis das.Ref 12.39-40: Mat 24.43-44
40 Housoeh yvmvyah namoq eq cicont kuot geh. Khasoeh ge lyis namoq ma zangh soh dah shishenh lyis, Cangsoeu Lo jweh los das, ge.
Lomluk, Lom ma luk Jyeidwis
(Mat 24:45-51)
41 Hauh thang lhyi Petru nyang lyis taiq zis gas, Yhensain eh, haih dangtoeuq gas ngamoq lyis kyingh taiq lah, dvnganhmoq lyis taiq lah, ge.
42 Yhensain taiq zis gas, Yhensain ka nyah yhenbang lyis, shishenh jweh lyis zonoms gvm dyei das xiklyis toeuq toh, lomluk las joeui bos dah jyeidwis gas hank nghuot lah, ge.
43 Nyah yhensain jweh los uhlyis lomluk luk kuot nyeis yvlyis los nyvng jus dah jyeidwis gas ngelhoq.
44 Ngos namoq lyis jyoengh taiq bah, yhensain ka nyah zisyos dvnganh thoq mas guon soeu nyang lyis kuot nhang das.
45 Nghuot laus eq hauh jyeidwis gas nyah ehnyet mas, Ngah yhensain los das zis nyangh shih ge, nghamh las, phoq jyeidwis nyhiq jyeidwis jens lyis bat, zo shuk, yet nyeis lyis gas,
46 hauh jyeidwis dah yhensain ka nyang ma nghamh dah buisnyeis, ma soh dah shishenh lyis nyah yhensain jweh los lyis, nyang lyis zan chinknote 12.46 Zan chink: nguot ya doeuh tyamp, ge bos. las lom ma luk bang yah dvgeh toh das.
47 Nyah yhensain dah ehnyet lyis seq toh las, nyah ehnyet ma chank, cicont ma sont toh dah jyeidwis hank laus eq pop pop bat zis xauh das.
48 Nghuot laus eq ma seq las lyuk mon dah muh shuot soeu ka, nainlo dvxauh lyuk das: khasoeh ge lyis, nyoshoq dyei zis xauh soeu hank laus eq nyah jyank masyah nyoshoq sang zis xauh das. Nyoshoq dyei toh goeus soeu jyank masyah zes las sang das.
Yesu gas Gang Loh Cho
(Mat 10:34-36)
49 Nyeisjvng thoq mas nyi khyoq kat das xiklyis ngos los; hauh nyi gvshih nyang dap nyeis lyis kha iq gis das lah?
50 Nghuot laus eq ngos kham chah shih dah jeisnyhop dvkoeuq bos shih. Hauh zis ma kham dvchank, ngos kha iq ehnyet nyo nyeis lah?Ref 12.50: Mak 10.38
51 Nyeisjvng thoq mas nyenstap cho chi lyih das xiklyis nghuot oen nghamh goh lhyeh? Ma nghuot, kangh das xiklyis dvnghuot.
52 Khasoeh ge lyis, gvshih masyah gas oeng yuk nyeis dah yhen mha somh yuk gas aiq yuk yah, aiq yuk gas somh yuk yah tyixo goh das.
53 Uwus yahge loloeu, loloeu yahge uwus; ungwes yahge lonyi, lonyi yahge ungwes, nyimuh yahge doeusmuh, doeusmuh yahge nyimuh gang goh das.Ref 12.53: Mik 7.6
Shishenh Vkyo Seq Chah
(Mat 16:2-3)
54 Nyang dius phung lhyi eq taiq zis gas, Buiswvng shot pheh jyommauh nyvng lyis, nvng houjang yah mau wus das, ge vgus wus los.
55 Mautyi lyeis muot los lyis gas, buis gywes das ge vgus gyangh bweh los.
56 Gis guons kuot bang eh, maukhung yahge nyeisjvng nyoqnho wuhsoh lyis seq taiq lyis gas: haq caiq dah vlho lhyi chamus ma seq suon goh lah?
Nah Jes yah Dap Goh aq
(Mat 5:25-26)
57 Namoq nyang gungs lyis chamus jyoeng khyvlyis soe ma tuon goh lah?
58 Nvng gas nvng lyis zau kauq soeu yah cho mha dvgeh nghuot shih lyis hauh soeu yah lvnyap taiq tamp goh aq. Housoeh ma nghuot lyis gas, zau kauq soeu yah nvng lyis soetuon soeu jyank mas kyauh das. Soetuon soeu nvng lyis pyada lyis kyauh las, nyang gas nvng lyis thung khyoq das.
59 Ngos nvng lyis taiq bah, thang thank thunkcent kyvp ma dye cap dvchank nvng hou mhayah yoh thuq los das zis ma nghuot.