10
Nyhetci Aiq Yuk Nhang
Yhensain ka gohtoeu nyhetci aiq yuk lyis eq toeuq kat las, nyamoq lyis nyang loh das wukhau khyiq khanghmuh mas aiq yuk dvtwi twi nyah xik mas nhang kat.note 10.1 Greek sauh buk dvkhamh mas 70 yuk ge bos. Nyang nyamoq lyis taiq zis gas, Jyo yhomh das zis nyoshoq bos laus eq, muh zwi bang nain. Housoeh yvmvyah jyo Yhensain ka nyah jyo yhomh das zis uhkung jens lyis nhang kat dyei bas jungh dung nyeis geh.Ref 10.2: Mat 9.37-38 Namoq tsain loh geh, yoeuh aq, ngos namoq lyis womkhuih jens jo mas yvng lo jens lyis teh, nhang kat.Ref 10.3: Mat 10.16 Ngwis thung, bvtmuh, thyvkoq teh zis cha eq vchi goh: cholvt mas hank lyis eq vjhent goh.Ref 10.4-11: Mat 10.7-14; Mak 6.8-11; Luk 9.3-5 Namoq kha yhen mha wvng loh laus eq, Haih yhen mha nyenstap joq bas jungh, oen shih cangxeih taiq geh. Hauh yhen mha nyenstap dah lo nyeis nghuot lyis gas, namoq dah nyenstap zis hauh soeu jyank mas doengs joq das, ma nyeis nghuot lyis gas, namoq dah nyenstap zis gas namoq jyank mas tauh los das. Namoq hauh yhen mha nyang nyeis las, nyamoq gvmtsoh zis zo shuk geh: khasoeh ge lyis muh zwi soeu ka, nyah uhkung phauh yoh mon: dvyhen thang lhyi dvyhen vtyungh vlvng goh.Ref 10.7: 1Kr 9.14; 1Tm 5.18 Namoq wvng loh dah wukhau mha laus eq, nyamoq lhom yoeus langh nghuot lyis gas, namoq xikkhonh mas khyoq dyei yvlyis tsain zo shuk geh. Houmha nos bang lyis gis los nhang lha, Mangso dah munghdan gas namoq jyank mas ni los goeus, oen dius jens lyis taiq kyoh geh. 10 Nghuot laus eq namoq loh dah wus mas bang, namoq lyis ma lhom yoeus nghuot lyis gas, talhoeu pheh doms thuq las heisoeh oen taiq geh.Ref 10.10-11: Lgy 13.51 11 Ngamoq khyei mha dap, namoq wus mas dah phvlhau yangh namoq lyis yobos tuonh shet yvmas kanghjyoeng duot das nyhenshang ko khyoq toh khoq goeus; nghuot laus eq Mangso munghdan gas namoq jyank mas ni los goeus zis lyis soh geh, oen taiq kyoh geh. 12 Nghuot laus eq namoq lyis ngos taiq bah, hauh buisnyeis lyis Sodom wugungs kham zo zis gas, hauh wus thoq lyis sunghhuq das, ge.Ref 10.12: Vpm 19.24-28; Mat 11.24, 10.15
Somh Wus lyis Taiq
(Mat 11:20-24)
13 Korazin eh, nvng mvtanhzoe nghuot! Betsaida eh, nvng mvtanhzoe nghuot! Khasoeh ge lyis namoq jyank mas nyvng nhang dah yomsoq zains muhzoh lyis Taire yahge Sidon mas nyvng nhang nghuot lyis gas, hauh wus mas bang gohnhamp yah yanghthung dyi wuot, nyiyvp boms mas lhoeuh las nhaiqlom yoh thaiq hah das.Ref 10.13: Esa 23.1-18; Ezk 26.1—28.26; Yol 3.4-8; Amo 1.9-10; Zek 9.2-4 14 Soetuon dah buisnyeis lyis Taire yahge Sidon xauh zis gas namoq thoq lyis sunghhuq das. 15 Kaperna-um eh, nvng maukhung jweh shoq chunghtoq zis xauh das lah, munyi thomh jweh shoq khyoq zis xauh das.Ref 10.15: Esa 14.13-15
16 Namoq dah dang gyo soeu ka ngah dang gyo zis nghuot, Namoq lyis peq tyamp soeu ka ngos lyis peq tyamp zis nghuot. Ngos lyis peq tyamp soeu ka, ngos lyis nhang kat soeu lhyi peq tyamp zis nghuot, ge.Ref 10.16: Mat 10.40; Mak 9.37; Luk 9.48; Yoh 13.20
Nyhetci Aiq Yuk Tauh Los
17 Hau nyhetci aiq yuk moq gas gauslaus zis yah tauh los las taiq zis gas, Yhensain eh, nah nyings masyah yius jens yangh ngamoq dah dang tsain gyo, ge.
18 Nyang nyamoq lyis doms taiq zis gas, Satan gas maunyoq nyik teh maukhung mhayah gyoh zis ngos nyvng goeus. 19 Yoeuh aq, lhangnoq yahge gungsgauh lyis nang nheh das zis yahge jeswus yomsoq dvnganh zis lyis ung tyamp das yomsoq gas, ngos namoq lyis dyei goeus yvmvyah, namoq lyis cha yah eq yoh nos nhang das zis ma nghuot.Ref 10.19: Chd 91.13 20 Nghuot laus eq yius gas namoq dah dang gyo oen vgauslaus goh: namoq dah nyings maukhung mha lhaih toh yvmvyah dvgauslaus geh, ge.
Yesu Gauslaus
(Mat 11:25-27; 13:16-17)
21 Hauh shishenh lyis Yesu gas, Dyos mas gauslaus las heisoeh ge: Maukhung nyeisjvng dah Yhensain Uwus eh, joeui bos bang yahge ehnyet yik bang jyank masyah nvng haih cho jens lyis nghop shung toh las, lonoeuh jens lyis chixoeuq yvmvyah, ngos nvng lyis nhaiqshoqlang. Nghuot goeus Uwus eh, heisoeh bweh los zis gas nvng nhaiqdoeus khyvlyis nghuot.
22 Ngah Uwus gas ngos lyis dvnganh dyei toh goeus: Lo hank nghuot yvlyis Uwus mas lai las hank eq ma seq, Uwus hank nghuot yvlyis Lo yahge hauh Lo yah nyah cho chixoeuq das xiklyis khyen yoeus zis xauh soeu mha lai las hank ma seq.Ref 10.22: Yoh 3.35, 10.15
23 Hauh thang lhyi nyang nyah changlo jens jyank pheh lhain yoeuh las gauh taiq zis gas, Namoq nyvng dah vyhang lhyi nyvng dah nyoq gas ngelhoq. 24 Khasoeh ge lyis ngos namoq lyis taiq bah, namoq nyvng yvlyis lvpe jens yahge hwankti jens nyoshoq nyvng mes laus eq ma xauh nyvng khoq. Namoq xauhgyo yvlyis gyo mes laus eq ma xauhgyo khoq, ge.
Gis dah Samari Dangtoeuq
25 Yoeuh aq, lyi svra dvyuk toq yap las Yesu lyis shiwu zoh lyis yah taiq zis gas, Svra eh, vcaiq vto kang vso vlho xauh kham yoeus das xiklyis ngos cha kuot chah lah, ge.Ref 10.25-28: Mat 22.35-40; Mak 12.28-34
26 Yesu nyang lyis taiq zis gas, Lyi maussauh mas cha lhaih toh? Nvng khasoeh seqgyo lah, ge lyis,
27 Nyang phuk taiq zis gas, Nah Yhensain Mangso lhyi nah nhaiqlom dvnganh yah, nah dyos dvnganh yah, nah yom dvnganh yah, nvng dolhain zis dvnganh yah jyetdap aq, nah yhenkyoh lyis eq nah gungs yah dvyhangteh jyetdap aq, ge.Ref 10.27: Lew 19.18; Lyi 6.5
28 Yesu doms taiq zis gas, Nvng taiq zis jus, housoeh kuot lyis kang yoh das, ge.Ref 10.28: Lew 18.5
29 Nghuot laus eq nyang gas vsainnyang dan zis lyis seq nhang mes dah ehnyet yah taiq zis gas, Ngah yhenkyoh gas hank nghuot lah, ge.
30 Yesu phuk taiq zis gas, Dius dvyuk Yerusalem wus masyah Yerikho pheh gyoh e lhyi, khyanktau xauh. Hauh bang gas nyah dyi khyuot lho lha vnyhoq mvnos bat, dvmtap las vluk shei bah ge lyis toh khoq las tsain loh. 31 Hou cho yah phudyei soeu dvyuk suh lai jus las, hauh soeu lhyi nyvng lyis gohshot jhank lai loh. 32 Vgus Lewi dius dvyuk hauh yvmas jweh las nyang lyis loh yoeuh lho lha gohshot cho yah doms jhank lai loh. 33 Nghuot laus eq gyung suh loh dah Samari dvyuk hauh soeu jyank mas jweh las nyvng lyis nhaiq yoeuh nyen las,Ref 10.33-34: 2Ss 28.15 34 nyah jyank mas loh las, nyah dvm mas coeu yahge zvbiq kat dyei lho lha misseh yah lyet dyei thang lhyi, nyah mauhlyihzoe thoq mas thuq loh las, boenghdoq yhen dvkoeuq mas shwih loh las dyangh dyei. 35 Thang lhyi nyeihyo nyang ngwis kyvp aiq koeuq yhensain lhyi lap dyei las taiq zis gas, nyang lyis bos dyangh aq, kha nyhoq jes gyoh zis ngos doms los uhlyis nvng lyis doms cap das, ge thuq loh.
36 Hau somh yuk mas khyanktau xauh soeu dah yhenkyoh gas khayuk nghuot oen nvng nghamh lah, ge nyei.
37 Nyang gas, Nyang lyis nhaiqnyen soeu nghuot, ge.
Yesu taiq zis gas, Nvng eq houyah dvyhangteh loh kuot aq, ge.
Yesu, Mari Matha jyank Loh
38 Gvshih nyamoq loh lyis, nyang gas wukhau dvkoeuq mas wvng loh: houmha Matha ge dah vmesbih dvyuk gas, nyang lyis nyah yhen mha boengh lhom yoeus langh.Ref 10.38-39: Yoh 11.1 39 Nyang mas Mari ge dah vnoeuh dvyuk bos: nyang gas Yesu dah khyeiyang mas tsung lha nyah dang gyo nyeis. 40 Nghuot laus eq Matha gas phuqsoe dah muh lyis chiq yvmvyah, Yesu jyank mas los las taiq zis gas, Yhensain eh, ngah vnoeuh gas boengh daih cho mha ngos lyis kyingh doeuh gyomh toh dyei yvlyis nvng chaxwe ma nhang lhyeh? Nyang ngos lyis bos pangh das xiklyis taiq kat dyei aq, ge.
41 Yesu nyang lyis phuk taiq zis gas, Matha, Matha, nvng gas vyhang nyoshoq lyis ehnyet nyo las chiq nyeis. 42 Nghuot laus eq chah zis dvja kyingh dvnghuot: Mari gas gis zis lyis khyen yoeus goeus yvmvyah, hauh zis lyis nyah jyank masyah yoh yoeus tyamp dyei das zis ma nghuot, ge.