5
Naman Dvmjot Gis Los
1 Siria jesdvp dah jeszau zainsmuh Naman gas Siria hwankti nyoqjeih mas nyoqnho ngelang yoh soeu nghuot. Khasoeh ge lyis Yhensain ka nyang masyah Siria mau lyis ung cho yoh nhang. Nyang gas yombos dah jeszau nghuot. Nghuot laus eq nyang gas dvmjot juot soeu nghuot.Ref 5.1-14: Luk 4.27
2 Siria jens nyamoq Israel mau pheh jeszan loh yvmas Israel nyelo dvyuk nyhik shwih los. Nyang gas Naman dah yhensain nyhiq jyank mas jyeidwis mus.
3 Hauh jyeidwis nyelo nyah yhensain lhyi taiq zis gas, Ngah yhensain ka Samari mas nyeis dah lvpe jyank mas jenh jweh loh ya, nyang ngah yhensain dah dvmjot lyis yoh gis los nhang das, ge.
4 Naman gas hauh cho xauhgyo lyis, nyang hwankti jyank loh las nyelo taiq zis lyis loh taiq kyoh.
5 Housoeh las Siria hwankti taiq zis gas, Gvshih nvng Israel hwankti jyank loh aq. Haih maussauh eq nyang lyis loh dyei aq, ge.
Housoeh las Naman gas, ngwis kyvp somh mons, xing kyvp khyuk khyoengh, dyimis dvci thau chi lha loh.
6 Nyang chi loh dah maussauh mas heisoeh ge: Haih maussauh yah ngah jeszau Naman lyis nvng yah jhent dyei kat. Nvng ngah jeszau zainsmuh Naman dah dvmjot yhoh dyei aq.
7 Israel hwankti ka hauh maussauh nghap lho lha svsoh gyuk zis yah mauh hangh las nyah dyimis langchuiq las kaiq taiq zis gas, Ngos gas kang yoh thyet, kang yoh dwis nhang dah Mangso nghuot ge Siria hwankti nghamh las nyang ngah jyank mas dvmjot yhoh das xiklyis dius nhang lhyeh? Housoeh las nyang ngos lyis kha iq jausxo mes zis gas dede nghuot, ge.
8 Bweh cho lhyi Mangso dah dius Elisha xauhgyo lyis, hwankti jyank mas dius nhang lha taiq zis gas, Nvng chamus nah dyimis langchuiq? Nyang lyis ngah jyank mas nhang kat aq. Israel mas lvpe nyeis zis nyang seq das, ge.
9 Housoeh Naman gas nyah nyang jens, nyah lhyingh jens yah loh las Elisha dah yhen khomh dwang mas yap joq.
10 Elisha gas nyah jyeidwis lyis nhang lha taiq zis gas, Loh aq, Yodan lvng mas nyhet lhain cheih aq, nah shoh thaiq las nvng thyauh lhyang das, ge.
11 Nghuot laus eq Naman gas nhaiqyo las thuq loh zoh lyis yah taiq zis gas, Jyoengh lvpe nyang ngah jyank mas thuq los las Yhensain nyah Mangso dah nyings yoeus zis yah nyah loq ngah nos mas sop las dvmjot dap soeu lhyi thyauh lhyang los nhang das oen nghamh.
12 Damasku mas dah Abana lvng yahge Pharpa lvng gas Israel mau gonh mas dah jeislvng dvnganh thoq lyis zes gis ma nghuot lhyeh? Hauh jeislvng mas ngos cheih las yoh thyauh lhyang los das ma nghuot lhyeh, ge nhaiqyo.
13 Nyah jyeidwis jens nyah jyank mas loh las taiq zis gas, Nhaiqbos eh, yau dah cho kuot chah ge lvpe taiq lyis nvng kuot chah das. Gungs cheih zis yah kyingh thyauh lhyang das dvge lyis kha iq zes kuot gis lah, ge.
14 Housoeh las Mangso dah dius taiq zis yah dvyhangteh nyang Yodan lvng mas nyah gungs nyhet lhain e nyop. Housoeh nyah shoh gas yukgis loshang dah shoh teh thaiq las nyang thyauh lhyang los.
15 Hauh thang lhyi nyang gas nyah dius jens dvnganh yah dvgeh Elisha jyank mas tauh jweh los las taiq zis gas, Israel mau mas lai las kha mau mas eq Mangso ma nyeis cho lhyi gvshih ngos seq goeus. Housoeh las gvshih ngos dyei dah jyungshuk jenh yoeus aq, ge.
16 Nghuot laus eq Elisha taiq zis gas, Ngos phuqsoe nyeis dah Yhensain nyang nyeis zis yah dvyhangteh ngos cha eq ma yoeus das, ge.
Naman gas yoeus das xiklyis yhah dyei laus eq nyang ma yoeus.
17 Housoeh las Naman taiq zis gas, Housoeh lyis gas ngos lyis luzoe dvzomh thuq ko tsoh jenh yoeus loh nhang aq. Khasoeh ge lyis nah jyeidwis gas gvshih masyah nyi ngheq phudyei, gohtoeu phudyei vja ja laus eq Yhensain mha lai las gohtoeu phvra lyis phudyei das zis ma nghuot.
18 Ngos Siria mangso Rimon dah yhenmuh pheh ngah hwankti dah dyenschangh kuot las hauh zis lyis loh paiq lyis Yhensain ngos lyis yobos khyuot dyei das oen ngos loms. Jyoeng Yhensain ngos lyis yobos khyuot dyei das.
19 Lvpe nyang lyis taiq zis gas, Nyenstap zis yah loh aq, ge.
Housoeh las Naman thuq las dvthungh lo loh goeus.
20 Hauh uhlyis Mangso dah dius Elisha dah jyeidwis Gehazi nyang bauh taiq zo zis gas, Yoeuh aq, ngah yhensain ka Siria dius Naman dyei dah jyungshuk lyis ma lhom yoeus lhuiq kat. Nyang Siria phoq dyei zis lyis lhom yoeus vvng. Yhensain nyang nyeis zis yah dvyhangteh ngos nyang lyis chank khat las dvja ja sang das, ge.
21 Housoeh Gehazi gas, Naman dah thang mha chank wuih loh. Naman gas, dius dvyuk nyah thang mha chank wuih los zis nyvng lyis, nyang nyah lhyingh masyah gyoh las zes zis gas, Cha chah lah, ge.
22 Nyang gas, Cha ma chah. Ngah yhensain ngos lyis heisoeh ge taiq nhang kat. Gvshih ngah jyank mas Ephraim boms masyah lvpe lotang jweh los. Nyah zomh xiklyis ngwis kyvp somh khyoengh, dyimis aiq thau jenh dyei aq, ge.
23 Naman gas, Ngwis kyvp khyuk khyoengh jenh yoeus aq, ge yomdyei lho lha ngwis kyvp khyuk khyoengh lyis ihtsung aiq lom mas kat las dyimis aiq thau yah dvgeh twih las nyah jyeidwis aiq yuk lyis dvng nhang lha nyah aiq yuk gas Gehazi dah xik pheh wuq loh.
24 Nyamoq Elisha nyeis dah wus jing mas jweh lyis Gehazi gas nyah zomh loq masyah hauh zisyos yoeus las yhen khau mha kat toh. Hauh thang lhyi nyang hauh vzomh lyis pont las nyah zomh loh lo.
25 Nyang yhen khau pheh doms wvng loh las, Elisha nyang lyis nyei zis gas, Gehazi eh, nvng khalhye loh khoq, ge.
Nyang gas, Nah jyeidwis khalhye eq ma loh, ge toeuh.
26 Nghuot laus eq Elisha taiq zis gas, Hauh soeu nvng lyis zes das ge nyah lhyingh masyah gyoh uhlyis ngah dyos nvng yah loh ma nghuot lhyeh? Gvshih ngwis, dyimis, tsanlun yos, zvbiq khyam, yvng, noeu, jyeidwis phoq jyeidwis nyhiq lhom yoeus das shishenh ma nghuot.
27 Housoeh yvmvyah Naman dah dvmjot gas nvng eq nah vnyau vshih mas vcaiq vto dap das, ge.
Gehazi gas nyah yhensain dah xikkhonh masyah thuq loh yah dvyih, nyang gas gyu teh thyoeu dah dvmjot dap soeu bweh loh.