4
Elisha Chauhmuh lyis Pangh
Lvpe phung mha dah lvpe dvyuk dah chauhmuh Elisha jyank mas los taiq zis gas, Ngah yhensain phoq gas shei goeus. Nyang Yhensain lhyi gyukwoms zis eq nvng seq. Nghuot laus eq nyang jyen shauh dah vbusbih gas ngah lotang lhyi nyah jyen cap khyvlyis jons loh shwih kuot das ge jweh los goeus, ge.
Elisha nyang lyis nyei zis gas, Ngos nah xiklyis cha kuot dyei das lah? Nah yhen mha cha joq, ge.
Nyang gas, Tsanlun coeu jywang mhauhlo masyah lai las gohtoeu cha ma joq, ge toeuh.
Elisha taiq zis gas, Loh aq, yhenkyoh dvnganhmoq mas ngo dah jywang joq ya joq zis nyoshoq nghoh aq. Lholha yhen khau mha nvng eq nah lotang eq wvng las khomh nyeih toh aq. Hauh thang lhyi hauh coeu lhyi jywang dvnganh mas huot kat aq. Jywang mha coeu dyingh yah dvyih vyvm mas yoeus toh toh kuot aq, ge.
Vmesbih gas nyah jyank masyah loh las, lotang ka jywang chi los thang lhyi nyang khomh nyheih las coeu huot kat. Housoeh jywang tsain dyingh lyis nyang nyah lotang lhyi taiq zis gas, Jywang gohtoeu dvlom chi los aq, ge. Nyah lotang mas dvyuk gas, jywang gohtoeu ma joq lo, ge. Housoeh las coeu eq doms tyamp. Housoeh vmesbih gas Elisha lyis loh taiq kyoh. Elisha gas, Loh aq, hauh coeu ungh las nah jyen cap aq, nyet goeu yah nvng yahge nah lotang dah kang khoeu geh, ge.
Elisha yahge Shunem Vmesbih
Dvnyeih gas Elisha Shunem wus mas lai loh. Hauh yvmas dis, nyoqnho ngelang bos dah vmesbih dvyuk nyeis. Nyang gas Elisha lyis lhom tsoh phuqsoe. Housoeh nyang houcho gyangh lai lyis hauh yhen mha wom wvng zo zo kuot. Nyang nyah yhensain phoq lyis taiq zis gas, Yoeuh aq, hai yah jyank mas vjangh los soeu ka Mangso dah gyingshang dius nghuot zis ngos seq. 10 Yhenkhung dvm mas thoq yvp mhauhlo dvyvp kuot dyei goh; houmha yhet jung, kihgus, tank yahge nyitoengh tsain toh dyei goh. Nyang yah jyank mas los khanghmuh houmha yoh wvng thoeng das, ge.
11 Dvnyeih gas nyang los lyis hau thoq yvp mas wvng las houmha lhain toh. 12 Housoeh nyang nyah jyeidwis Gehazi lyis taiq zis gas, Haih Shunem vmesbih lyis khi los aq, ge. Nyang khi los las hau vmesbih gas nyah xikkhonh mas yap joq. 13 Elisha gas Gehazi lyis, Gvshih hauh vmesbih lyis taiq aq: yoeuh aq, nvng ngamoq xiklyis hei iq kuot dyei nyhenshang nah xiklyis khasoeh kuot dyei das lah? Nah xiklyis hwankti, nghuot ya, jeszau zainsmuh jyank taiq dyei chah das lah, ge.
Hauh vmesbih taiq zis gas, Ngos ngah vnyau jens jyank ngos chah zis dvnganh yoh, ge.
14 Elisha gas, Housoeh lyis nyah xiklyis kuot dyei das zis cha bos lah, ge.
Gehazi gas, Nyang mas lo ma bos, nyah yhensain phoq eq mang loh goeus, ge.
15 Nyang taiq zis gas, Vmesbih lyis doms khi aq ge las khi lhyi nyang khomh dwang mas los yap. 16 Elisha taiq zis gas, Sangnhaiq hei nyos lyis nvng yukgis lo xauh po das, ge.Ref 4.16: Vpm 18.14
Vmesbih taiq zis gas, Ngos lyis vjenh hwah. Nvng gas Mangso dah dius nghuot, ge.
17 Nghuot laus eq hauh vmesbih gas loshang gungs lyis chi lha Elisha nyang lyis taiq dah shishenh jweh lyis yukgis lo khoeu.
18 Housoeh loshang ka bes los. Jyo yhomh nyos dvnvp lyis nyang danhpa mas guk yet bang yah dvgeh muh zwi nyeis dah nyah vbah jyank mas e loh. 19 Nyang nyetlos nyettant nyah vbah lyis kaiq taiq zis gas, Uhloms nos, ge.
Housoeh las nyah uwus gas nyah jyeidwis lyis, Nyang lyis nyah ungwes jyank mas loh bau kat aq, ge. 20 Nyang lyis nyah ungwes jyank mas shwih jweh las nyah ungwes gas nyang lyis buis gungs toeu shoq sainhkhonh mas po tsung toh. Hauh shishenh lyis nyang shei loh. 21 Housoeh nyah ungwes gas nyah mvng lyis Mangso dah dius dah jung thoq mas loh doq kih, khomh nyheih khoq las thuq loh. 22 Hauh thang lhyi nyah yhensain phoq lyis eq khi lha taiq, Ngos Mangso dah dius jyank mas loh las yoh tauh los shoq, mauhlyihzoe dvdoeu yahge loyvm dvyuk dyei aq, ge.
23 Nyah yhensain phoq nyei zis gas, Nvng khvnyhik nyah jyank mas chamus loh? Lhamhmuh canh nyeih eq ma nghuot, No Buisnyeis eq ma nghuot, ge.
Nyang gas, Gis das, ge toeuh. 24 Mauhlyihzoe lyis anhzoe kih las nyah jyeidwis lyis taiq zis gas, Xik pheh komp suh aq. Ngos cha ma taiq lyis zohyah vkomp, ge. 25 Housoeh nyang loh las Khamel boms, Mangso dah dius jyank mas jweh loh.
Mangso dah dius gas nyang lyis we masyah nyvng kat las nyang nyah jyeidwis Gehazi lyis taiq zis gas, Yoeuh aq, Shunem vmesbih los. 26 Nvng, nyang lyis e jenh zes las Nvng eq, nah yhensain phoq eq, loshang eq yangh nyeis lah, oen nyei aq, ge.
Vmesbih gas, Yangh nyeis, ge Gehazi lyis phuk taiq. 27 Nghuot laus eq nyang gas jing mas Elisha jyank mas jweh lyis, nyah khyei lhyi dap po. Gehazi gas nyang lyis duon tyamp das ge ni loh. Nghuot laus eq Mangso dah dius taiq zis gas, Nghuot goeus jungh, nyang svsoh nhaiqkuk nyeis, Yhensain haih cho ngos lyis ma taiq kyoh, nghop toh, ge.
28 Hauh vmesbih taiq zis gas, Ngos ngah yhensain jyank mas lo dung lhyeh? Ngos lyis vmhuih oen goeus, ma nghuot lhyeh, ge.
29 Housoeh Elisha Gehazi lyis taiq zis gas, Nah loq mas ngah lhamloq yoeus chi lha lvnyap loh aq. Dvyuk yuk xauhgoh lyis vjeshuh. Hank jeshuh laus eq nvng vphuk taiq, ngah lhamloq lyis loshang dah nyoqnho mha kih toh aq, ge.
30 Loshang dah ungwes taiq zis gas, Yhensain eq, nvng eq kang dwis nyeis zis yah dvyhangteh, ngos nvng yah ma gang, ge. Housoeh las nyang toq las hauh vmesbih thang mha chank loh. 31 Gehazi gas nyamoq xik pheh loh langh las hauh lhamloq loshang dah nyoqnho mha kih toh laus eq chah thwe eq ma xauhgyo, kang dwis vlho eq cha ma nyvng. Housoeh las nyang Elisha yah xauhgoh das zis tauh loh las nyang lyis taiq zis gas, Loshang ma soh los, ge.
32 Elisha jweh loh las hauh yvp khau pheh wvng loh lyis, loshang ka nyah jung thoq mas shei lhain toh zis loh nyvng. 33 Nyang khomh nyheih lho lha Yhensain lhyi shvmanh dung. 34 Housoeh nyang loshang thoq mas, nhuot changh, nyoqjeih changh, loq changh tanh kih. Nyah gungs lyis loshang gungs thoq mas tanh kih yah dvyih hauh loshang nywe los.Ref 4.34-35: 1Hw 17.21 35 Elisha toq las yvpkhau mha e los suh lho lha doms doq loh las loshang thoq mas nyah gungs doms tanh kih lyis, loshang ka nyhet lhain jyei lha nyah nyoqjeih phank los. 36 Elisha Gehazi lyis lui las, loshang dah ungwes lyis khi nhang. Hauh vmesbih yvp khau mha jweh lyis Elisha gas nyang lyis, Nah lo lyis po loh aq, ge. 37 Hauh vmesbih eq Elisha lyis dupaiq lho lha nyah lo lyis po lha thuq loh.
Yomsoq Muh Aiq Koeuq
38 Elisha gas Giga pheh tauh loh lyis hauh mau mas phanghkhauq gyoh nyeis. Lvpe dvphung lhyi nyang jyauh nyeis lyis, nyang nyah jyeidwis lyis taiq zis gas, Lvpe jens xiklyis auhmuh sont las lvphoq cuk aq, ge. 39 Housoeh dvyuk gas pa mha anghphoq loh xo khoeuh lyis, whom lamh nwis dvgyomh nyvng las houmha dah whom lamh yoh wuq nyhoq thyoq los las nyang hau zis cha nghuot yvlyis ma seq zis lvphoq auh mas ceq kat. 40 Hauh lvphoq lyis dius jens lyis tsain khoeuh dyei. Nghuot laus eq nyamoq hauh zis lyis chaq kat yah dvyih nyamoq Elisha lyis kaiq taiq zis gas, nyonoq bos, ge - las hauh lvphoq ma tsain shuk. 41 Nyang taiq zis gas, Sunghso mons dvtsiq chi los aq, ge. Nyang hauh zis auh mas kat thang lhyi, Dius jens zo bas jungh, khoeuh dyei geh, ge. Housoeh hauh lvphoq auh gas gis shuk goeus.
42 Dvlhain ka Bala Shalisha mha dah dius dvyuk gas Mangso dah dius jyank mas vsaiq nyhink dah bali masyah balilhyoq aiqci, vsaiq zan los dah mis dungh dvwons chi los dyei. Elisha nyah jyeidwis lyis taiq zis gas, Haih zis lvpe dvphung lhyi dyei aq, nyamoq zo bas jungh, ge. 43 Nghuot laus eq nyah jyeidwis taiq zis gas, Haih zis dius dvxo yuk lyis luk tsoh das lah, ge toeuh.
Nyang doms taiq zis gas, Haih zis dius jens lyis dyei aq, nyamoq zo bas jungh. Yhensain taiq: Nyamoq zo las nyet shih das, ge. 44 Housoeh las nyang hauh zis nyamoq xikkhonh mas toh dyei. Yhensain dah dang yah dvyhangteh, nyamoq zo thang lhyi nyet joq shih.