3
Moab Israel lyis Zan
1 Yuda hwankti Yehoshaphat guon zis dvci xet vzvn lyis Ahab lo Yoram gas Samari wus mas hwankti kuot xi lha Israel thoq mas dvci aiq zvn guon khoq.
2 Nyang gas Yhensain dah nyoqlvtjvng mas ma shop muh kuot laus eq nyah ungwes Yezebel, nyah uwus Ahab teh ma nghuot. Bala lyis paiq das xiklyis nyah uwus kuot toh dah gungslho lhyi khyom tyamp.
3 Nghuot laus eq nyah xik mas dah Nebat lo Yeroboam teh Israel jens lyis yaunos cho pheh shwih loh las nyang hauh cho lhyi ma no.
4 Moab hwankti Mesha gas yvng nyhoeu soeu nghuot las Israel hwankti lhyi yvnglo dvsens yahge yvng dvsens dah yvngmauh zvn yau dyei nyeis.
5 Nghuot laus eq Israel hwankti Ahab shei thang lhyi Moab hwankti ka Israel mau lyis gomloeus toq.
6 Hwankti Yoram gas, Samari wus masyah lvnyap thuq las Israel thoenkgus jesdvp dvnganh lyis tsainh toh.
7 Hauh thoq lyis nyang gas Yuda hwankti Yehoshaphat jyank mas dius nhang lha taiq zis gas, Moab hwankti ka ngos lyis gomloeus toq nyeis. Moab lyis loh zan das zis nvng ngos yah vloh das lah, ge.
Hwankti Yehoshaphat toeuh zis gas, Ngos doq los das, ngos gas nvng sont cho mha nghuot. Ngah dius jens eq, ngah nyang jens eq, nvng sont cho mha nghuot.
8 Yang khacho yah doq loh das lah, ge.
Yoram gas, Edom mhanhdyvp cho yah doq loh das, ge.
9 Housoeh Israel hwankti Yoram ka Yuda hwankti yahge Edom hwankti yah dvgeh tsain jens doq loh. Nyhet nyeih cho jens loh lyis, houmha nyamoq dah jesphung xiklyis eq, nyamoq thang mha chank dah gaunyhauq xiklyis eq jeis thank tyamp.
10 Housoeh hwankti Yoram taiq zis gas, Ah, Yhensain ka yang hwankti somh yuk lyis Moab loq mas kyauh das ge khi thuq kat nyvng, ge.
11 Nghuot laus eq Yehoshaphat taiq zis gas, Yhensain lhyi nyei yoeuh das zis Yhensain dah lvpe dvyuk yuk vnyeis au, ge nyeis.
Houlhyi, Israel hwankti dah zau dvyuk toeuh zis gas, Eliya dah loq pangh, Shaphat lo Elisha nyeis, ge.
12 Yehoshaphat taiq zis gas, Yhensain dah dang nyang yah dvgeh nghuot ge lyis, Israel hwankti, Yehoshaphat yahge Edom hwankti moq gas nyah jyank mas gyoh e.
13 Elisha Israel hwankti lhyi taiq zis gas, Ngos nvng lyis chamus pangh das lah? Nah ungwes uwus gyangh nyei dah lvpe jens jyank mas loh nyei aq, ge.
Israel hwankti nyang lyis toeuh zis gas, Ma nghuot, Yhensain ka haih hwankti somh yuk lyis Moab loq mas kyauh tyamp das ge khi toh, ge.
14 Elisha gas, Ngos phuqsoe nyeis Yhensain nyang nyeis zis yah dvyhangteh, jyoengh nyang Yuda Hwankti Yehoshaphat dah nyoqnho lhyi ma yoeuh lyis gas ngos nah shot pheh nyoqnho xoeu das zis ma nghuot, yoeuh eq ma yoeuh, nyvng eq ma nyvng das.
15 Gvshih khvlhank muot soeu dvyuk shwih los aq, ge.
Khvlhank muot soeu muot kat lyis Yhensain dah yomsoq gas Elisha thoq mas jweh los.
16 Housoeh las nyang gas, Yhensain heisoeh ge: Hauh langhkhau kyuk lyis jeis dyingh shoq ngos kuot das.
17 Khasoeh ge lyis namoq gas lyeis ma zangh, mau eq ma nyvng; nghuot laus eq haih langhkhau mha jeis dyingh los las, namoq eq namoq dah noeu, gaunyhauq eq xauh shuk das, ge.
18 Elisha tsoq las taiq zis gas, Haih cho ka Yhensain xikkhonh mas vtsiq vlo dvnghuot. Nyang gas Moab lyis namoq ung das cho eq namoq loq mas kyauh das.
19 Housoeh namoq gas wusciank bos yungh dah wus dvnganh lyis thyoq das. Shih zains khanghmuh thoeuq das. Jeis thuq dwang dvnganh cheiq das, yos gis mas eq luk yah sanh tyo lha lhoq thyoq das, ge.
20 Nvpsangh zonoms jyungshuk phudyei yoq lyis Edom cho yah jeis yaus los las hau dvmau gonh jeis dyingh joq.
21 Hwankti somh yuk gas jeszan das zis doq los ge yvlyis Moab jens dvnganh xauhgyo lyis nyamoq gas, mang thank mas zis loshang jweh shoq jes kyonhkhyi yoh wuot goeus bang dvnganh huom lha maukyo mha yap nyeis.
22 Nyamoq gas nungs nvp noq yah toq los lyis buis jeis thoq mas tso joq gvng mas jeis gas suih teh nes joq yvlyis nyvng.
23 Nyamoq taiq zis gas, Haih zis gas suih nghuot. Jyoengh nyang, jeswus somh yuk gas nyamoq sham yah zan-goh las dvyuk yah dvyuk sat goh goeus. Housoeh las gvshih Moab jens eh, lvnyhvp e tsain yoeus goh, ge.
24 Nghuot laus eq nyamoq Israel thoenggus mas jweh lyis Israel jens nyamoq lyis lhom zan las nyamoq gas Israel dah xikkhonh masyah phang loh. Israel jens eq tsoq las chank khat las Moab jens lyis sat.
25 Housoeh nyamoq gas wus jens lyis tsain thyoq tyamp. Nyamoq gas maunyeis gis yvmas lai loh vvng lhyi hauh yvmas luk dyingh shoq dvyuk dvlom tsain doeuh toh. Jeis thuq dwang lyis eq cheiq, shih zains dvnganh thoeuq lhain. Thang thank lyis Kir Hareset wus zains lyis kyingh nyhet toh las hauh mas wusciank gas nyah joqyos mas joq. Nghuot laus eq panh chi bang gas hauh yvlyis lhaink toh las zan.
26 Moab hwankti ka nyang ma duot lo cho nyvng lyis sham wons bang nyhetxo shwih las jeswus nyeis cho, Edom hwankti vnvm chank yah lai loh. Nghuot laus eq nyamoq ma yoh phang lai loh.
27 Housoeh las nyang gas nyah gungsthaiq guon das soeu nyah loxeih lyis wusciank thoq mas Moab mangso lhyi phudyei. Israel jens lyis svsoh nhaiqyo las nyamoq gas hauh wus masyah tauh las nyamoq nyang dah mau pheh loh lo.