25
Yerusalem Gyoh
(2Ss 36:13-21; Yer 52:3-11)
1 Zedekia gas Babilon hwankti lhyi gomloeus toq gvng mas Zedekia guon zis gau vzvn, dvci vkhyvp, dvci vnyeih lyis Babilon hwankti Nebukhaneza gas nyah jesphung gonh yah Yerusalem lyis los lhaink toh. Nyamoq gas wus nge pheh thoenggus kuot las ciank yvmlhaink yah gvduk doeu toh.Ref 25.1: Yer 21.1-10, 34.1-5; Ezk 24.2
2 Hauh zis hwankti Zedekia guon zis dvci das vzvn jweh shoq lhaink toh.
3 Hauh zvn nyei vkhyvp, gau vnyeih lyis hauh wus mas phanghkhauq gyoh las hauh mau mas bang wom cha ma zo mus,
4 wusciank eq dyoq gyoh joq goeus. Babilon dius jens gas wus lyis lhaink toh laus eq wus mas dah jeslo jens gas, nyenh lyis hwankti dah yhen khyam nvm mas dah ciank aiq puk dah vjo khomh cho phang thuq las Yodan langhkhau pheh loh.Ref 25.4: Ezk 33.21
5 Nghuot laus eq Babilon jes jens gas hwankti lhyi chank khat las Yerikho nvm mas dah pa mha yoh chank duons nyhik. Nyah jeslo jens dvnganh gas phang dyos loh.
6 Babilon dius jens gas Zedekia lhyi Hwankti Nebukhaneza nyeis dah Ribla wus mas shwih loh. Houmha Nebukhaneza gas nyang lyis soetuon.
7 Nyamoq gas Zedekia yoeuh nyeis lyis nyah loloeu jens lyis sat. Zedekia dah nyoqjeih tsain chet tyamp dyei las nyang lyis shamjvng yah Babilon pheh twih she loh.Ref 25.7: Ezk 12.13
Yhenmuh Dyoqbis Cho
(Yer 52.12-33)
8 Gvshih Babilon hwankti Nebukhaneza guon zis dvci gau vzvn, oeng vkhyvp, nyhet vnyeih lyis, Babilon hwankti dah gungs zungh zau, Babilon hwankti lhyi phuqsoe soeu Nebuzaradan gas Yerusalem mas jweh los.
9 Nyang gas Yhenmuh, hwankti yhen, Yerusalem mas yhen dvnganh, yhen zainsmuh khanghmuh lyis ngheq.
10 Nyah jesphung dvnganh gas Yerusalem lyis lhaink toh dah wusciank dvnganh tsain thyoq khyoq.
11 Gungs zungh zau Nebuzaradan gas wus mas nyet shih bang, Babilon hwankti shot pheh dap loh goeus bang yahge nyet shih bang dvnganh lyis shwih jons loh.
12 Nghuot laus eq gungs zungh zau gas hauh mau mas nyungs thank bang dvyhamh lyis zvbiq khyam dyangh das zis yahge yos zwi das zis nyhet toh khoq.
13 Babilon bang gas Yhenmuh mas dah thunk zains jens, lang tyen dah tank jens yah dvgeh thunk thomh lyis tsain bat khyop las hauh thunk lyis Babilon pheh yoeus loh.Ref 25.13: 1Hw 7.15-26; 2Ss 3.15-17
14 Nyamoq gas phon shang yvmas yhung dah tsoh thauh, nyiyvp kham zis, nyitoengh tuonh yvmas yhung dah vyhang, lomhxangh suih kham khuq jens, xangh ngheq yvmas yhung dah khuq jens yahge Yhenmuh muhzoh mas yhung dah thunk kyahsoe dvnganh yoeus loh.Ref 25.14: 1Hw 7.45; 2Ss 4.16
15 Nyamoq gas khuq mhauhlo, nyibvn eq cheq ngwis, xing yah kuot toh dah kyahsoe dvnganh yoeus loh.
16 Yhenmuh xiklyis Solomon kuot toh dah zains aiq koeuq, lhyingh jens yahge thomh lvm dvkoeuq mas dah thunk gas ma yoh thoq laiq.
17 Zains dvkoeuq dah nyhang choeu 27 pe bos las zains vthyoh eq bos shih. Hauh thunk zains vthyoh gas 4 pe dvkhyamh nyhang lha hauh vthyoh vyvm chank yah tvleh shih thunk chvp bandyoms dap. Aiq vzains eq vgus housoeh shunk toh.
Yuda jens Babilon pheh
(Yeremia 52.24-27)
18 Hauh thoq lyis zau zains Nebuzaradan gas phudyei zainsmuh Seraia, nyah o lhyi gyet phudyei Zephania, yhenmuh mas yhaugyen dah zau jens somh yuk moq lyis thung dius khyvlyis shwih jons loh.
19 Hauh wus masyah jeslo jens lyis vmingh dyei dah zau dvyuk, wus vkhau mha nyeis shih dah hwankti xam changh oeng yuk, jeszau dah loqpangh nghuot las jesdvp mas lhaih comh soeu, wus vkhau mha xo nyvng dah hauh mau bang khyukci yuk lyis shwih loh.
20-21 Zungh zau Nebuzaradan gas nyamoq lyis nyhik las, Hamat mau Ribla wus mas nyeis dah Babilon hwankti jyank mas shwih loh. Babilon hwankti ka nyamoq lyis Hamat mau Ribla wus mas bat sat.
Housoeh Yuda dius jens gas nyamoq mau masyah jonsdoeus loh.
Yuda Munghzau Gedalia
(Yer 40:7-9; 41:1-3)
22 Babilon hwankti Nebukhaneza Yuda mau mas nyhet toh khoq bang thoq mas Shaphan nyeilo, Ahikam lo Gedalia lyis mungh zau toh.
23 Gvshih vsomh ma kham dah Yuda jeszau jens yahge jeslo jens dvnganh gas, Babilon hwankti ka Gegalia lyis mungh zau toh cho xauhgyo lyis nyamoq gas Mizpa wus Gedalia jyank mas tsain los. Hauh bang gas, Nethania lo Ishmael, Karea lo Yohanan, Netopha dius Tanhumet lo Seraia yahge Makha lo Yazania moq eq nyamoq dah dius jens eq nghuot.
24 Gedalia nyamoq lyis dangthoengh dyei, Babilon muhwons bang lyis vgyuk goh. Haih mau mas nyeis las Babilon hwankti lhyi phuqsoe geh. Housoeh lyis namoq nyeisgis das, ge.
25 Nghuot laus eq nyhet vkhyvp lyis Elishama nyeilo Nethania lo Ishmael, hwankti yhen dius gas dius dvci yuk yah los las, Mizpa mha nyeis Gedalia yah zan-goh las nyang lyis sat. Nyang gas houmha nyang yah dvgeh nyeis dah Jew jens yahge Babilon dius jens lyis eq sat.
26 Hauh thang lhyi Israel dius jens dvnganh, ngislo kuhlo, jeszau jens gas Egutu pheh tsain e loh. Khasoeh ge lyis nyamoq gas Babilon dius jens lyis gyuk.Ref 25.26: Yer 43.5-7
Yehoiakhin lhyi Phank Kat
(Yer 52:31-34)
27 Ewil Merodak Babilon hwankti bweh los zvn lyis, nyang Yuda hwankti Yehoiakhin lyis thung mhayah phank kat zis yah nyah nhaiqnyen cho chixoeuq. Hauh zis bweh zis gas Yuda hwankti Yehoiakhin jons loh thang lhyi somhci nyhet vzvn, dvci aiq vkhyvp, aiqci nyhet vnyeih lyis nghuot.
28 Ewil Merodak gas Yehoiakhin lhyi dang gis jis las Babilon mas nyang yah nyeis dah hwankti jens thoq lyis zes dah joqyos dyei.
29 Nyang gas Yehoiakhin lhyi nyah thung dyimis thaiq tyamp nhang lha nyang kang dwis nyeis dvchank vjangh hwankti zojus mas zo shuk nhang.
30 Babilon hwankti ka Yehoiakhin kang dwis nyeis dvchank dvnyeih dvnyeih nyang chah dah zokho lhyi top top dyei.