24
1 Yehoiakim zaih lyis Babilon hwankti Nebukhaneza gas Yuda mau mas nyhenh wvng los las Yehoiakim ka nyah loq o mha 3 zvn gop. Hauh thang lhyi nyang gomloeus toq.Ref 24.1: Yer 25.1-38; Dan 1.1-2
2 Yhensain ka nyah jyeidwis lvpe jens lyis yah taiq nhang toh dang vgus, Yuda mau lyis mhont das ge Yehoiakim lyis zan das xiklyis Babilon jes jens, Siria jes jens, Moab jes jens, Amon jes jens lyis jes toq nhang.
3 Hwankti Manase kuot khoq dah yaunos dvnganh gvng mas Yhensain ka Yuda jens lyis nyah nyoqlvtjvng masyah khat tyamp mes las nyang taiq toh zis yah dvyhangteh hauh cho jyoengh bweh los nhang zis nghuot.
4 Nyang gas yobos ma bos bang lyis sat las, Yerusalem wus lyis nyamoq dah suih yah dyingh nhang dah nyah yaunos lyis Yhensain ka yobos ma yoh khyuot dyei.
5 Yehoiakim kuot zis nyet shih goeu dvnganh gas Yuda hwankti jens Sungson mha lhaih toh.
6 Housoeh Yehoiakim shei lha, nyah joqyos mas nyah loloeu Yehoiakhin guon khoq.
7 Egutu maukyo masyah Uphrat lvng jweh shoq Egutu hwankti sain dah maunyeis lyis Babilon hwankti yoeus tyamp yvmvyah, Egutu hwankti ka nyah mau masyah ma yoh thuq los.
Yuda Hwankti Yehoiakhin
(2Ss 36:9-10)
8 Yehoiakhin ka nyang hwankti bweh los uhlyis dvci xet zvn nghuot. Nyang Yerusalem mas lhamhmuh somh khyvp guon khoq. Nyah ungwes gas Yerusalem mas Elnathan lonyi Nehushta nghuot.
9 Nyang gas, nyah uwus thang chank las Yhensain dah nyoqlvtjvng mas ma gis zis kuot.
10 Nyang guon yoq lyis Babilon hwankti Nebukhaneza dah jeszau zainsmuh uhshe dah jesphung ka Yerusalem lyis zan das zis los lhaink toh.
11 Housoeh lhaink toh yoq lyis Babilon hwankti Nebukhaneza gas Yerusalem lyis zan das zis doq los.
12 Yuda hwankti Yehoiakhin ka nyah ungwes, nyah jyeidwis jens, nyah zau jens yahge nyah muh wons bang gas Babilon hwankti jyank mas thuq e. Babilon hwankti ka nyang guon zis xet vzvn lyis Yehoiakhin lyis thung khyoq.Ref 24.12: Yer 22.24-30, 24.1-10, 29.1-2
13 Nebukhaneza gas Yhensain taiq ku zis yah dvyhangteh Yhenmuh mas dah zisyos dvnganh, hwankti yhen mha dah zisyos tsain yoeus loh. Yhenmuh xiklyis Israel hwankti Solomon kuot toh, Yhenmuh mas dah xing kyahsoe dvnganh lyis vdoeus doeus thyet khoq.
14 Nyang gas Yerusalem hwankti loloeu jens, yombos jes thoeuqzoe jens dvmons, loqmuh dap bang, ngwis shonh bang dvnganh shwih jons loh. Hauh mau mas nyungs thank bang mas lai las hank eq ma nyet lo.
15 Nyang gas Yehoiakhin lyis nyah ungwes, hwankti dah yhensain nyhiq jens, nyah muh wons zau jens, hauh mau mas dah yombos thoeuqzoe jens dvnganh yah dvgeh Babilon pheh shwih jons loh.Ref 24.15: Ezk 17.12
16 Babilon hwankti ka jeszan duot bang nyhet khyoengh, loqmuh dap bang, ngwis shonh bang dvkhyoengh, yombos las jes yoh zan das bang dvnganh lyis Babilon pheh shwih jons loh.
17 Babilon hwankti ka Yehoiakhin dah phvlvt Matania lyis Zedekia ge nyings thaiq dyei las Yehoiakhin joqyos mas hwankti toh.Ref 24.17: Yer 37.1; Ezk 17.13
Yuda Hwankti Zedekia
(2Ss 36.11-12; Yer 52:1-3)
18 Zedekia gas nyang guon xi uhlyis aiqci dvzvn nghuot. Nyang Yerusalem mas dvci dvzvn guon khoq. Nyah ungwes gas, Libna wus mas Yeremia dah lonyi Hamutal nghuot.Ref 24.18: Yer 27.1-22, 28.1-17
19 Yehoiakim kuot khoq vgus nyang eq Yhensain dah nyoqlvtjvng mas ma gis zis kuot.
20 Yhensain ka Yerusalem yahge Yuda mau lyis svsoh nhaiqyo las nyamoq lyis nyah xikkhonh masyah khat thuq tyamp. Zedekia gas Babilon hwankti lhyi gomloeus toq.Ref 24.20: Ezk 17.15