8
Thanghchvp Kwi Hwank
(2Ss 5:2-6:2)
1 Hauh thang lhyi, Yhensain dah Thanghchvp Kwi lyis Zion ge Dawi dah wus masyah Yhenmuh pheh yoeus los das xiklyis Solomon gas Israel dius jens mas vnyau uhshe bang yahge vkoq uhshe bang dvnganh lyis Yerusalem wus nyah jyank mas khi tsainh.Ref 8.1: 2Sa 6.12-16; 1Ss 15.25-29
2 Housoeh Israel jens dvnganh gas lhamhmuh nyhet vkhyvp ge, Ethanim khyvp zvng pwe mha hwankti Solomon jyank mas los huom.Ref 8.2: Lew 23.24
3 Israel uhshe bang dvnganh jweh lyis, phudyei bang gas hauh Kwi dvng.
4 Houlhyi phudyei bang yahge Lewi jens gas Yhensain dah Kwi yah dvgeh moqhuom zvng yahge hau zvng mas bos gyingshang kyahsoe dvnganh lyis Yhenmuh pheh tsain yoeus los.
5 Hwankti Solomon yahge Israel moqphung dvnganh gas Kwi xik mas ma thoq suon lo shoq nyo dah yvng, noeulu lyis tsain phudyei.
6 Phudyei bang gas Yhensain dah Thanghchvp Kwi lhyi Yhenmuh vkhau yvp, - Gyingshang Thank Joqyos - pheh dvng los las Kherubim dah dungs o mha toh.
7 Kherubim gas Kwi thoq mas dungs lhywa lha Kwi yahge nyah tanzoe aiq koeuq lyis eq mau toh.
8 Tanzoe svsoh xing lha hauh vthang jens lyis Yhenmuh dah yvpmuh - Gyingshang Joqyos - dah xikkhonh khomh masyah yoh nyvng, nghuot laus eq nghe mhayah gas ma yoh nyvng. Hauh tanzoe khvnyhik jweh shoq houmha joq.
9 Israel dius jens Egutu masyah thuq los nyeis lyis, Yhensain ka nyamoq yah Horeb boms mas thanghchvp toh uhlyis, Moshe ka Kwi mha luk aiq lhyoq kat toh zis masyah lai las hauh Kwi mha gohtoeu cha ma bos.Ref 8.9: Lyi 10.5
10 Phudyei bang gas Yhenmuh dah gyingshang yvp vkhau masyah thuq lyis Yhensain dah Yhenmuh gas jyommauh yah dyingh joq.Ref 8.10-11: Dyu 40.34-35
11 Yhensain dah phunk gas Yhenmuh mas dyingh joq gvng mas phudyei bang gas hauh uhlyis nyamoq dah muh ma yoh tsoq kuot lo.
12 Solomon shvmanh dung:Ref 8.12: Chd 18.11, 97.2
Yhensain eh! Nvng gas buis lyis maukhung thoq mas toh,
nghuot laus eq nvng gas soeng soeng noq dah jyommauh khau mha nyeis das xiklyis khyen goeus, ge.
13 Nghuot laus eq nvng vcaiq vto nyeis das xiklyis
phunk bos Yhenmuh nah xiklyis ngos kuot toh goeus.
Solomon Muh Dye cho Taiq
(2Ss 6:3-11)
14 Hauh thang lhyi hwankti ka nyah xik mas yap joq dah Israel moq dvhuom gonh jyank pheh xoeu lha heisoeh shvmanh dyei:
15 Ngah uwus Dawi lyis nyah nhuot yah taiq las, nyah loq yah hauh yvlyis tyink dyei, Yhensain, Israel dah Mangso ka ngelhoq bas jungh.
16 Nyang ngah uwus lyis taiq zis gas, Ngah dius nyau Israel jens lyis Egutu masyah khyuot shwih los nyeih masyah ngos lyis paiq das xiklyis Yhenmuh tsuk das zis Israel vnyau jens mas ngos wus ma khyen. Nghuot laus eq ngah dius dah hwankti duot das xiklyis gvshih, ngos Dawi lyis khyen yoeus goeus, ge.Ref 8.16: 2Sa 7.4-11; 1Ss 17.3-10
17 Solomon tsoq las taiq zis gas Yhensain, Israel dah Mangso, dah nyings lyis phauh nyang das nyhenshang ngah uwus Dawi gas haih Yhenmuh lyis tsuk mes.Ref 8.17-18: 2Sa 7.1-3; 1Ss 17.1-2
18 Nghuot laus eq Yhensain ngah uwus Dawi lyis taiq zis gas, Nvng ngah nyings lyis phauh nyang das nyhenshang Yhenmuh tsuk mes zis gas gis.
19 Nghuot laus eq nvng ma yoh tsuk, nah gungs mas yaus, nah lo ngah nyings xiklyis Yhenmuh tsuk das, ge.Ref 8.19: 2Sa 7.12-13; 1Ss 17.11-12
20 Housoeh las Yhensain ka nyang taiq dang lyis tyink dyei las, Yhensain dangthoengh toh zis yah dvyhangteh ngos ngah uwus dah joqyos, Israel hwankti tank, mas tsung lha Yhensain, Israel dah Mangso, nyings lyis phauh nyang das nyhenshang Yhenmuh yoh tsuk toh goeus.
21 Ngos houmha, Yhensain ka yah phauh thyeih moq lyis Egutu masyah shwih los uhlyis nyamoq yah toh dah thanghchvp bos dah Kwi toh das joqyos kuot toh.
Solomon dah Vkyuh Dung Dang
(2Ss 6:12-42)
22 Solomon gas, Israel moqhuom nyeis yvmas, Yhensain dah phon xikkhonh mas maukhung pheh loq lvm las yap.
23 Nyang taiq zis gas, Yhensain, Israel dah Mangso eh, maukhung mas eq, nyeisjvng mha eq nvng yah doeus dah Mangso ma bos. Nhaiqlom dvnganh yah nah xikkhonh mas chank kuot dah nah domsyos gyo bang dvnganh lyis nvng dangthoengh jyoeng nhang, nvng nhaiqnyen cho chixoeuq.
24 Nvng nah jyeidwis ngah uwus Dawi lyis nah dangthoengh yah dvyhangteh kuot dyei. Nvng nah nhuot yah hauh dangthoengh lyis toh las khvnyhik nah loq yah hauh zis lyis doengs nhang.
25 Housoeh las Yhensain, Israel dah Mangso eh, nvng gas, Nvng ngah xikkhonh mas chank kuot zis yah dvyhangteh, nah lo jens gas ngah xikkhonh mas chank kuot mes zis yah nyamoq loh cho lhyi zaih lhyi ngah xikkhonh mas Israel munghdan dah hwankti tank mas tsung das hwankti vnyau ma dyet ge, nvng nah jyeidwis Dawi lyis toh dah dangthoengh eq gvshih doengs nhang aq.Ref 8.25: 1Hw 2.4
26 Israel dah Mangso eh, nah jyeidwis, ngah uwus Dawi lyis taiq toh dang gvshih jenh bweh los nhang aq.
27 Nghuot laus eq Mangso ka nyeisjvng thoq mas jyoengh nyeis das lah? Yoeuh aq, maukhung yahge maukhung dvnganh dah nyhang thank maukhung ka nvng lyis ma yoh lungh joq nhang. Ngos tsuk dah Yhenmuh gas kha iq zes ngis lah?Ref 8.27: 2Ss 2.6
28 Yhensain, ngah Mangso eh, ngah vkyuh dung dang yahge sang dang lyis gyo yoeus aq. Khvnyhik nah jyeidwis nah xikkhonh mas kaiq las shvmanh dung dah dang lyis gyo aq.
29 Haih joqyos mas ngah nyings joq chah ge las taiq zis yah dvyhangteh, haih joqyos yahge haih Yhenmuh lyis nyeih nyenh yoeuh gomh aq. Nah jyeidwis ngos gas haih joqyos pheh xoeu lha shvmanh dung dah dang lyis gyo yoeus dyei aq.Ref 8.29: Lyi 12.11
30 Ngos yahge nah dius Israel jens haih joqyos pheh xoeu lha nyhen mha gyoh las svsoh chah zis yah sang dah shvmanh dung dang lyis gyo dyei aq. Nvng nyeis dah maukhung mhayah ngamoq lyis gyo yoeus las yobos khyuot dyei aq.
31 Dius dvyuk gas dvyuk lyis cu lha haih Yhenmuh, Yhensain dah phon xik mas, yobos ma bos cho dah kyamptang chah lyis,
32 maukhung mhayah gyo dyei las nah jyeidwis jens lyis soetuon aq. Yaunos bos soeu lhyi nyah yobos yah dvyhangteh, joeng aq. Yaunos ma bos soeu lhyi dan khyvlyis vkyuh dyei aq.
33 Nah dius Israel jens gas nvng lyis cu lha jeswus yah ung zis xauh uhlyis nyamoq nah jyank lhain los las yobos khyuot dyei zis xauh das xiklyis nhaiqlom nyhen mha gyo zis yah haih Yhenmuh mas los las nvng lyis shvmanh dung lyis,
34 nvng maukhung mhayah gyo yoeus dyei las nah vnyau Israel lyis yobos khyuot dyei zis yah, nvng nyamoq dah phauh thyeih moq lyis dyei toh vso maunyeis mas nyamoq lyis doms los nhang aq.
35 Nvng lyis cu dah yobos gvng mas maukhung nyheih las mau ma wus nhang nyamoq lyis yobos dyei lyis, nyamoq gas haih Yhenmuh pheh xoeu lha nhaiqlom nyhen mha gyo zis yah shvmanh dung las nah nyings lyis rhen lha nyamoq yobos lyis tyamp lyis,
36 maukhung mhayah gyo yoeus dyei las nah dius Israel jens yahge hwankti lyis yobos khyuot dyei aq. Nyamoq jus cho chank das xiklyis jyauh las nvng nah dius nyau lyis nyamoq dah vso maunyeis khyvlyis dyei toh dah nah mau mas mauwus nhang aq.
37 Mau khau mha phanghkhauq gyoh, yomh gyoh, guk bop, bau bau, janghgyik zo, tungde zo lyis eq; nyamoq jeswus gas nyamoq dah mau, nyamoq wus lyis los lhaink toh lyis eq, chah yaukyenh shanghsenh cho bos laus eq,
38 nah dius Israel jens nyamoq dah yaukyenh cho, nghuot ya kuk cho yah sen lha haih Yhenmuh pheh xoeu lha loq toeu shvmanh dung lyis,
39 nvng gas nvng nyeis dah maukhung thoq masyah gyo yoeus dyei aq. Nvng gas dius nhaiqlom seq dyei zis yah dvyhangteh, yobos khyuot dyei las dvyuk yah dvyuk lyis nyamoq dah muhzoh khyvlyis tauh dyei aq. (Nvng kyingh cangsoeu dius dvnganh dah nhaiqlom lyis seq.)
40 Housoeh nyamoq gas nvng ngamoq dah phauh thyeih moq lyis dyei toh mau mas nyeis gyo lyis nvng lyis gyukwoms las nvng o khyvlyis kang dwis das.
41 Houlho lha gohnyau bang nah cho xauhgyo las, nyamoq gas we mau masyah nah nyings lyis los paiq uhlyis,
42 khasoeh ge lyis nyamoq gas nah dah yomzains mauh loqmuh yahge phunk xauhgyo las, nyamoq haih Yhenmuh mas los las shvmanh los dung lyis,
43 Nvng nyeis joqyos maukhung mhayah gyo yoeus las nyamoq dung zis lyis dyei aq. Houlhyi nah dius Israel jens teh, nyeisjvng thoq mas dius dvnganh gas nvng lyis seq las gyukwoms los das. Nyamoq eq hai ngos tsuk Yhenmuh gas nah nyings wons yvlyis seq los das.
44 Nvng nhang lha nah dius jens gas jeswus nyeis yvpheh jes toq uhlyis nvng khyen toh dah wus pheh xoeu, nah nyings xiklyis ngos tsuk toh dah Yhenmuh pheh xoeu lha Yhensain lhyi shvmanh dung lyis,
45 Nvng maukhung mha nyamoq dah sang cho, dung cho xauhgyo las nyamoq lyis ung cho yoh nhang aq.
46 Yaunos ma kuot soeu hank ma bos las nah dius jens gas nvng lyis tyi dah yaunos kuot gvng mas nvng nhaiqyo zis yah jeswus loq mas kyauh las nyamoq lyis thunglungh bang teh goh mau pheh, mau we pheh shwih loh.
47 Nyamoq houmha nyeis uhlyis, ehnyet thaiq las, Ngamoq cu goeus, ma dan cho kuot goeus ge rhen lha,
48 ehnyet gungs dyos dvnganh yah nah jyank mas tauh los las nvng nyamoq phauh thyeih moq lyis dyei dah mau, nvng khyen toh dah wus, ngos nah nyings xiklyis tsuk toh dah Yhenmuh pheh shvmanh dung lyis,
49 Nvng nyeis dah maukhung mha nyamoq sang cho, dung dang xauhgyo las pangh dyei aq.
50 Nah dius jens nvng lyis tyi lha gomloeus toq cho, nvng lyis cu dah yobos dvnganh khyuot dyei aq. Nah dius jens lyis jons loh bang gas nah dius jens lyis nhaiqnyen das xiklyis nyamoq lyis nhaiq seq nyen dah ehnyet dyei aq.
51 Khasoeh ge lyis nyamoq gas Egutu mau mas dah thyeq nyikhyomp masyah Nvng khyuot toh dah nah dius nyau, nah vso nghuot.
52 Ngos dung cho lhyi eq, nah dius Israel vnyau dung cho lhyi eq, ngamoq sang cho dvnganh lyis gyo dyei aq. Nyamoq nvng lyis kaiq sang khanghmuh gyo yoeus dyei aq.
53 Khasoeh ge lyis ngamoq dah phauh thyeih moq lyis Egutu masyah khyuot los uhlyis nah jyeidwis Moshe lhyi yah taiq zis yah dvyhangteh, Yomzains Yhensain eh, Israel vnyau lyis nah dius nyau bweh bas jungh ge nyeisjvng dius jens masyah kangh toh, ge.
Thang Thank Shvmanh Dung
54 Solomon gas Yhensain lhyi sang cho, dung cho dye lyis phon xikkhonh mas phvluk zomhgyuis las loq maukhung pheh tyo toh masyah toq los.
55 Nyang yap las Israel moq dvhuom gonh lyis thwe than yah shvmanh dyei zis gas,
56 Nyang gis dah dangthoengh toh zis dvnganh yah dvyhangteh, nyah dius Israel lyis nyenstap cho dyei dah Yhensain ka ngelhoq bas jungh. Nyah jyeidwis Moshe masyah toh dah dangthoengh dvkhonh eq ma dyoq ma dyuk.Ref 8.56: Lyi 12.10; Yosh 21.44-45
57 Yhensain, yah Mangso ka yah phauh thyeih moq yah nghuot khoq zis yah dvyhangteh, yang yah nghuot bas jungh. Nyang yang lyis khanhamp eq ma tyamp bas jungh.
58 Nyah cho mha chank suh las phauh thyeih moq lyis tyingtoh dang, lyi yahge soetuon cho chank kuot mes bas jungh ge, yah nhaiqlom lyis nyah jyank pheh shwih yoeus bas jungh.
59 Yhensain, yah Mangso ka ngos, nyah jyeidwis yahge nyah dius Israel jens dah nyeih yau chah cho lhyi tyink das xiklyis gomh chah zis yah dvyhangteh vjangh gomh das xiklyis ngos Yhensain xikkhonh mas sang cho yahge shvmanh dung dang gas nyeih nyenh nyah nvm mas nghuot bas jungh.
60 Yhensain ka Mangso nghuot las gohtoeu ma bos lo yvlyis nyeisjvng thoq mas dius dvnganh seq bas jungh.
61 Nyah dius jens namoq gas, Yhensain, yah Mangso lhyi vjangh lomluk bas jungh. Namoq gas khvnyhik chank kuot teh nyah tyingtoh dang yahge lyi cho mha vjangh domsyos gyo bas jungh, ge.
Yhenmuh Kyauh Dang
(2Ss 7:4-10)
62 Hauh thang lhyi hwankti yahge nyang yah dvgeh nghuot dah Israel jens dvnganh gas Yhensain xikkhonh mas lomhxangh tsain lainh.
63 Solomon gas Yhensain lhyi nyenstap jyungshuk xiklyis noeulu aiqmons aiq khyoengh, yvng dvsens aiq mon sat phudyei. Housoeh hwankti yahge Israel jens dvnganh gas Yhensain dah Yhenmuh kyauh pwe kuot.
64 Hauh nyeih lyis hwankti ka Yhensain dah Yhenmuh ganthoq, khyam gungs mas lhoqshang lha houmha ngheq phudyei, monh jyungshuk, nyenstap jyungshuk tsain phudyei. Khasoeh ge lyis, Yhensain xikkhonh mas dah thunk phon ka hau ngheq phudyei, monh jyungshuk yahge nyenstap jyungshuk coeu xiklyis nyo ngis.
65 Hauh thang lhyi Solomon yahge Israel dvnganh gas Yhensain, nyamoq dah Mangso xikkhonh mas Phunk pwe nyhet nyeih kuot. Hauh dius phung ka mautsung pheh Hamat langhwuq hweq masyah mautyi pheh Egutu maukyo hweq masyah zis nghuot.
66 Xet vnyeih lyis Solomon gas dius jens lyis nyamoq yhen pheh pont kat. Nyamoq dvnganh eq hwankti lhyi chungh las, Yhensain ka nyah jyeidwis Dawi yahge Israel jens lyis dyei dah shvmanh jyehjuh gvng mas gausyis zis yah tsain loh lo.