6
Solomon Yhenmuh Tsuk
Israel dius jens Egutu masyah thuq los thang lhyi 480 zvn, Solomon Israel jens lyis guon xi zis nyei vzvn, Ziv ge, lhamhmuh aiq vkhyvp lyis nyang Yhensain dah Yhenmuh lyis tsuk xi. Gvshih hwankti Solomon Yhensain xiklyis tsuk xi dah Yhenmuh ka xing choeu loqbon khyukci, lvm choeu loqbon aiqci, nyhang choeu loqbon somhci nghuot. Yhenmuh dah ganjangh yvp loqbon aiqci xing lha Yhenmuh dah lvm choeu xink bos, lvm choeu ka ganthoq masyah loqbon dvci nghuot. Nyang hauh yvp xiklyis khomhbaiq lhyoh tsain kat. Yhenmuh ganthung yahge yvmlhaink chank, Yhenmuh dah tyoyvm nghe pheh 3 tsank bos yhenlo cwih tsuk toh. O tsank lvm choeu oeng loqbon, vgungs tsank lvm choeu khyuk loqbon, Thoq tsank lvm choeu nyhet loqbon bos. Khasoeh ge lyis yhentsank jens gas yhen thyvbon khau mha ma wvng, tyoyvm dah nghe shot pheh vkeq kuot las kih doq loh.
Yhenmuh kuot lyis lukbat jang mas luk tsan goeus dah luk yah kuot yvmvyah, doeus thwe, wuzung thwe, thyeq kyahsoe thwe cha eq ma xauhgyo.
O tsank mas wvng loh dah cho ka Yhenmuh dah mautyi shot pheh nghuot. Vgungs tsank mas zvmlhangh yah doq las hou mhayah somh vtsank pheh doq loh. Housoeh nyang Yhenmuh tsuk las dye goeus. Hauh yvlyis arit thyeh yah mau toh. 10 Taiq kyoh goeus zis yah dvyhangteh Yhenmuh vyvm, somh shot chank yah 3 tsank bos dah yhen lo cwih lyis arit lyens yah Yhenmuh yvm mas goeng goeng tap toh. Hauh yhencwih dvtsank gas 7 pe dvkhyamh nyhang.
11 Hauh uhlyis Yhensain dah dang Solomon jyank mas jweh los zis gas, 12 Gvshih nvng tsuk toh dah yhen yah sen lha, Nvng ngah lyi dvnganh chank, ngah tyingtoh dang dvnganh chank kuot lyis gas ngos nah uwus Dawi lyis dangthoengh toh zis yah dvyhangteh, ngos nvng mas doengs nhang das. 13 Ngos gas Israel dius jens yah nyeis las ngah vnyau Israel lyis ma toh tyamp das, ge.
14 Housoeh Solomon Yhenmuh tsuk zis dye goeus.
Yhenmuh Vkhau pheh Shunk
(2Ss 3:8-14)
15 Yhenmuh vkhau nyhoeuh mas zis mau yvmas jweh shoq saiq lyis yhung toh. Nyang gas Yhenmuh vkhau shot pheh yvm zis mau zis arit thyeh yhung toh. Yhenmuh vkhau mha arit yah nyhoeuh toh. 16 Gyingshang Thank Joqyos - (Yhenmuh dah loh thank vyvm) xiklyis xing choeu, lvm choeu loqbon aiqci ci lvm dah yvp dvkoeuq kuot las nyhoeuh zis, vkhau pheh yvm mau zis lyis arit thyeh yah kuot toh.Ref 6.16: Dyu 26.33-34 17 Gyingshang Thank Joqyos yah tsoq las loqbon nyeici bos Yhenmuh yvpgungs joq. 18 Yhenmuh luk tyoyvm dvnganh dah thoq mas Arit thyeh yah doms yvm toh. Yhenmuh khau pheh, arit tyoyvm mas whom shih, banbuh tsain thwang tap toh.
19 Solomon gas Yhensain dah Thanghchvp Kwi toh das xiklyis Yhenmuh ganthung shot pheh yvp lhunk sont toh. 20 Hauh yvp lhunk gas xing choeu, lvm choeu, nyhang choeu loqbon aiqci ci tsain nghuot. Hauh yvp lhyi xing gyingh yah shauq toh. Nyang gas arit yah kuot toh dah phon lyis eq shauq.noteHebre mas dede ma nghuot. 21 Housoeh Solomon gas Yhenmuh vkhau pheh xing gyingh yah shauq. Gyingshang Thank Joqyos dah khomh xik mas xing jvngchoh yah twih toh. 22 Yhenmuh vkhau gonh xing yah shauq. Gyingshang Thank Joqyos mas joq dah phon gonh lyis eq xing yah shauq.Ref 6.22: Dyu 30.1-3
23 Gyingshang Thank Joqyos mas tsanlun saiq yah loqbon dvci ci nyhang Kherubim aiq yuk lyis eq kuot toh.Ref 6.23-28: Dyu 25.18-20 24 Kherubim dungs gas dvshot loq oeng bon, gohtoeu dvshot eq loq oeng bon nghuot. Hauh dungs dvshot vthyoh masyah gohtoeu dvshot vthyoh jweh shoq loqbon dvci nghuot. 25 Gohtoeu Kherub eq loqbon dvci nghuot. Kherubim aiq yuk yah dvyhangteh dvyih yih nghuot. 26 Kherub dvyuk dah nyhang choeu ka loqbon dvci nghuot las gohtoeu dvyuk teh hougus nghuot. 27 Housoeh nyang gas hau Kherubim lyis vtheh yvp mas toh. Nyamoq dah dungs gas lhywa toh las kherub dvyuk dah dungs thyoh dvshot tyoyvm mas, gohtoeu kherub dah dungs thyoh gas gohtoeu dvshot tyoyvm mas tanh las yvp vgungs mas nyamoq dah dungs thyoh tsain tanh goh joq. 28 Nyang gas Kherubim lyis eq xing shauq toh.
29 Yvpgungs yahge vtheh yvp dah tyoyvm mas Kherubim, dyoms zains, banbuh tsain thwang tap. 30 Aiq yvp gonh dah thyangh lyis xing yah shauq.
31 Vtheh yvp mas wvng das xiklyis tsanlun saiq yah khomh aiq khyamh kuot. Hauh khomh bungs dah vthyoh gas oeng shot bos las chuon. 32 Khomh aiq koeuq gas tsanlun saiq nghuot. Hauh khomh mas Kherubim, dyoms zains yahge banbuh thwang tap toh las xing shauq toh. 33 Housoeh yvpgungs dah khomh xiklyis nyei boms dvboms bos khomh zains lyis tsanlun saiq yah kuot. 34 Khomh dvkhyamh lyis pvtta aiq koeuq yah arit saiq yah yoh lomdain dah khomh aiq khyamh kuot. 35 Hauh yvmas Kherubim, dyoms zains yahge banbuh thwang toh. Hauh yvlyis xing shauq toh.
36 Yhenmuh dah ganthoq lyis khwih toh luk somh jens, arit lyens dvjens yah yvm las yvp kuot toh.
37 Solomon hwankti kuot zis nyei vzvn Ziv vkhyvp lyis Yhensain dah Yhenmuh vpom xi. 38 Solomon hwankti kuot zis dvci das vzvn Bul ge xet vkhyvp lyis toeuq vgus Yhenmuh dvnganh vthang sau. Yhenmuh tsuk zis nyhet zvn nyangh.