3
Solomon Joeui dung
(2Ss 1:3-12)
1 Solomon gas Egutu hwankti Pharao yah buisnoms kuot las Pharao dah lonyi yoeus. Nyah yhen, Yhenmuh yahge Yerusalem wusciank yvmlhaink ma dye ci dvchank nyang lyis Dawi dah wus mas shwih toh.
2 Hauh zaih lyis Yhensain dah nyings xiklyis yhen ma kuot shih las dius jens gas nyhang joqyos mas tsain phudyei.
3 Solomon gas Yhensain lhyi jyet las nyah uwus Dawi taiq toh dah dang lyis chank kuot. Nghuot laus eq nyang gas nyhang dah joqyos mas phudyei, xangh eq ngheq.
4 Gvshih hwankti ka phudyei das xiklyis Gibeon mas loh. Hauh yvmas nyhang dah phudyei joqyos zainsmuh joq. Solomon gas hauh phon mha ngheq phudyei jyungshuk dvkhyoengh phudyei.
5 Gibeon mas Yhensain Mangso ka nyenh lyis yhetmoq masyah Solomon jyank mas thuq xoeuq las taiq, Nvng cha o mes? Dung aq, ngos nvng lyis dyei das, ge.
6 Solomon taiq zis gas, Nah jyeidwis, ngah uwus Dawi gas nah xikkhonh mas jyoeng khyvlyis, dan cho mha ehnyet zungh zis yah suh e yvmvyah nvng nhaiqnyen cho chixoeuq goeus. Khvnyhik nghuot joq zis yah dvyhangteh, nyah hwankti tank mas yoh tsung das xiklyis lo dvyuk dyei zis gas nyah xiklyis jyehjuh zainsmuh nghuot.
7 Yhensain Mangso eh, gvshih nvng ngah uwus Dawi dah gungsthaiq ngos nah jyeidwis lyis hwankti toh. Nghuot laus eq ngos gas loshang nghuot las khasoeh guon das cho ma seq.
8 Ngos gas nvng khyen yoeus toh dius nyau, ma thoq suon lo shoq nyo dah dius zains nyau mas bos.
9 Housoeh yvmvyah nah jons gas nah dius jens lyis soe yoh tuon das xiklyis gis gang yoh gvn seq das joeui dyei aq. Hai nah dius zains nyau lyis dvyuk nyang bauh soe hank yoh tuon das lah, ge.
10 Hai Solomon dah dung dang lyis Yhensain nhaiqdoeus, Solomon joeui sang zis lyis eq gaus.
11 Mangso nyang lyis taiq, Nvng gas kang xing das cho, dis das cho ma dung, nah jeswus kang lhyi eq ma dung, soe yoh tuon das zis yahge yik das cho dvdung yvmvyah,
12 nah dang yah dvyhangteh ngos nvng lyis dyei das. Xikpheh nvng teh zis hank ma bos ku, thang pheh eq ma bos shoq yik cho yahge joeui ngos nvng lyis dyei das.
13 Nah zaih lyis nvng yah doeus dah hwankti dvyuk eq ma bos shoq nvng ma dung dah dis cho yahge nyoqnho ngelang eq ngos nvng lyis dyei das.
14 Nvng gas nah uwus Dawi kuot teh ngah cho chank suh las ngah lyi yahge ngah tyingtoh dang lyis chank lyis, ngos nah buisnyeis lyis chent kat dyei das, ge.
15 Solomon soh los lyis, houka yhetmoq nghuot yvlyis seq. Nyang Yerusalem mas loh las, Yhensain dah Thanghchvp Kwi xik mas yap zis yah ngheq dyei jyungshuk, nyenstap jyungshuk dyei. Nyah zau jens lyis eq pwe kuot dyei.
Solomon Soe yau tuon
16 Hauh thang dvyoq lyis nghe nyhiq aiq yuk nyah aiq yuk dah phyen-goh cho tamp dyei das xiklyis hwankti jyank mas los.
17 Vmesbih dvyuk taiq zis gas, Ngah yhensain eh, haih vmesbih yahge ngos gas dvyhen mha nyeis. Housoeh dvgeh nyeis uhlyis ngos gas loshang khoeu los.
18 Somh vnyeih lyis nyang eq loshang khoeu los. Housoeh ngah aiq yuk dvgeh nyeis. Hauh yhen mha gohyuk hank ma nyeis. Nyang yahge ngos aiq yuk kyingh dvnyeis.
19 Nghuot laus eq haih vmesbih gas nyenh lyis nyah lo lyis nhiq las nyah lo gas shei.
20 Housoeh gungsgvm lyis nyang toq las ngos yhet joq uhlyis ngah lo lyis yoeus las nyah sainhkhonh mas toh. Nyah lo shei lhyi ka ngah sainhkhonh mas los toh.
21 Nungsnvp lyis ngah lo lyis nauh gvmshuk bah oen lhyi nyang shei joq. Nghuot laus eq nyoq nyvng los lyis ngos vlhomuh yoeuh lyis nyang gas ngos khoeu dah lo ma nghuot, ge.
22 Gohtoeu dvyuk gas, Ma nghuot, dwis nyeis zis ngah lo, shei joq zis nah lo dvnghuot, ge.
Xik lyis dah vmesbih gas, Ma nghuot, shei joq zis nah lo, dwis nyeis zis ngah lo nghuot, ge.
Housoeh nyah aiq yuk hwankti xikkhonh mas phyen-goh nyeis.
23 Hwankti taiq zis gas, Dvyuk gas dwis zis ngah lo, shei zis nah lo, ge. Gohtoeu dvyuk eq, Ma nghuot, shei zis nah lo, dwis zis ngah lo, ge.
24 Housoeh hwankti ka, Sham yoeus los geh, ge. Housoeh las nyamoq gas hwankti xikkhonh mas sham chi los.
25 Hwankti taiq zis gas, Lo dwis yuk lyis aiq chink khyoq aq, dvyuk lyis dvchink, gohtoeu dvyuk lyis dvchink dyei aq, ge.
26 Lo dwis yoh dah ungwes gas lo lyis jyetdap sainhnos las hwankti lhyi, yhensain eh, dwis nyeis lo lyis vjenh sat, nyang lyis dyei aq, ge.
Nghuot laus eq gohtoeu dvyuk gas, Nah zis eq, ngah zis eq ma nghuot goeus jungh chink aq, ge.
27 Housoeh las hwankti phuk taiq zis gas, Lo dwis lyis vsat, xik lyis dah vmesbih lyis dyei aq, nyang nyah ungwes nghuot, ge.
28 Housoeh hwankti soetuon yvlyis Israel dvnganh xauhgyo. Soetuon cho mha dan khyvlyis yoh kuot shoq Mangso dah joeui nyah jyank mas bos zis nyamoq nyvng las hwankti lhyi gyukwoms.