20
Siria yah Jeszan Goh
1 Gvshih Siria hwankti Benhadad gas nyah jesphung dvnganh tsainh las, hwankti somhci aiq yuk yah dvgeh nyamoq nyang, jeslhyingh yah dvgeh jes toq las Samari wus lyis lhaink toh las zan xi.
2 Nyang gas loeuskyoh bang lyis wus vkhau mha Israel hwankti Ahab jyank mas nhang lha, Benhadad heisoeh ge:
3 Nah dah ngwis xing ngah zis nghuot; zes yungh dah nah yhensain nyhiq jens eq, nah lo jens eq ngah zis nghuot, ge.
4 Ahab phuk taiq zis gas, Ngah yhensain hwankti eh, nvng taiq zis yah dvyhangteh ngos eq, ngos yoh zis dvnganh eq nah zis nghuot, ge.
5 Loeuskyoh bang doms los las taiq zis gas, Benhadad heisoeh ge: Nah ngwis xing, nah yhensain nyhiq jens, nah lo jens lyis nvng ngah loq mas kyauh chah oen tying kat.
6 Nvpyo haih shvhoeu lhyi, ngos ngah zau jens lyis nhang kat las nah hwankti yhen, nah zau jens yhen lhyi khyang lha phauhdap zis dvnganh nyamoq yoeus loh das, ge.
7 Israel hwankti ka hauh mau mas dah logis jens dvnganh lyis khi lha taiq zis gas, Haih soeu ka kha iq jausxo mes yvlyis yoeuh geh. Ngah ngwis xing, yhensain nyhiq jens, lo jens lyis sang nhang kat yvlyis ngos ma ngoek, ge.
8 Logis jens dvnganh yahge dius jens dvnganh nyang lyis taiq zis gas, Nyah dang gohtoeu vgyo dyei lo, ge.
9 Housoeh las Ahab gas Benhadad dah loeuskyoh bang lyis taiq zis gas, Ngah yhensain hwankti lhyi taiq aq: ngos lyis cangxeih taiq kat zis ngos bauh goeus, nghuot laus eq haih aiq vlhain zis lyis ngos ma yoh kuot, ge.
Loeuskyoh bang eq thuq las nyang lyis loh taiq kyoh.
10 Hauh thang lhyi Benhadad ka Ahab lyis doms tying kat zis gas, Nah wus lyis mhont las hauh tsohmop lyis nyamoq loq yah dvyuk dvtsop dye tsop das nyhoq ngos dius jens shwih los das. Ngos housoeh ma kuot lyis gas, mangso jens ngos lyis hauh thoq lyis kuot bas jungh, ge.
11 Housoeh las Israel hwankti Ahab phuk taiq zis gas, Moengzan das xiklyis jesgungs chi toh shih dah jes thoeuqzoe dvyuk gas jeszan ung goeus dah jes thoeuqzoe teh ma gis moengs, oen loh taiq aq, ge.
12 Benhadad gas buisnoms zau jens yah dvgeh zvng mas shuk nyeis uhlyis hauh dang xauhgyo lyis, dius jens lyis cicont kuot geh, ge zis yah dvyhangteh, nyamoq gas wus lyis zan das zis cicont kuot.
13 Lvpe dvyuk Israel hwankti Ahab jyank mas los taiq zis gas, Yhensain heisoeh ge: Nvng haih jesphung kuh lyis nyvng las vgyuk. Khvnyhik ngos nvng lyis ung cho dyei das las ngos Yhensain nghuot yvlyis nvng seq das, ge.
14 Ahab nyei zis gas, Hank zan das lah, ge.
Lvpe toeuh zis gas, Yhensain heisoeh ge: Munghzau jens dah loyvm jeslo jens zan das, ge.
Jesdvp lyis hank vmingh dyei das lah, ge hwankti nyei.
Lvpe ka, Nvng, ge.
15 Housoeh las hwankti ka mungh zau jens dah loyvm jeslo jens lyis suon tsainh yoeuh lyis aiqxo somhci aiq yuk bos. Israel jens dvnganh lyis suon tsainh yoeuh lyis nyhet khyoengh bos.
16 Housoeh nyamoq gas nyeih gungs lyis jes tsain zan xi loh. Hauh uhlyis Benhadad yahge nyang lyis los bos pangh dah hwankti jens somhci aiq yuk moq gas nyamoq dah zvng mas shuk yet nyeis.
17 Munghzau jens dah jeslo loyvm jens shih cangxeih thuq loh. Benhadad eq dius nhang toh las nyamoq nyang lyis doms taiq kyoh zis gas, Jeslo dvphung Samari wus masyah thuq los goeus, ge.
18 Nyang vmingh dyei zis gas, Nyamoq nyenstap das xiklyis thuq los laus eq, jeszan das xiklyis thuq los laus eq nyhik toh geh, ge.
19 Munghzau jens dah jeslo loyvm jens gas nyamoq thang mha chank los dah Israel jesphung lyis uhshe lha wus masyah thuq los.
20 Nyamoq gas hank eq hank dah jes lyis tsain sat las Siria jens gas phang. Israel jens gas nyamoq lyis khoek khoek chank khat laus eq, Siria hwankti Benhadad gas jes nyang ji bang dvyhamh yah dvgeh nyang ji las yoh phang luiq loh.
21 Israel hwankti Ahab gas nyang yahge jes lhyingh lyis yoh zan yoeusnoteHebre: mhont las Siria jens lyis vboms vbeq sat.
22 Hauh thang lhyi Israel hwankti jyank mas lvpe pe soeu los taiq zis gas, Dvzvn gyo lyis Siria hwankti nvng lyis zan das zis doms los das gvng mas Yom nyhuk aq, khasoeh kuot das zis zaih lha nghamh yoeuh aq, ge.
Siria Bang Aiq Vlhain Zan
23 Siria hwankti dah zau jens nyang lyis taiq zis gas, Israel jens dah mangso jens gas boms mangso jens tsain nghuot. Housoeh las nyamoq gas yah thoq lyis yangh. Nghuot laus eq yang nyamoq lyis pa mha zan lyis gas, yang nyamoq lyis jyoengh ung das.
24 Haih zis kuot aq: hwankti jens lyis loh nhang tyamp las, nyamoq dah joqyos mas jeszau jens lyis toh aq.
25 Somh loh dah nyang dvp, lhyingh dvp iq tsainh toh aq. Housoeh pa mha zan lyis yang jyoengh Israel jens lyis ung das, ge.
Hwankti Benhadad eq nyamoq dah dang gyo las housoeh kuot.
26 Zvn wvng los lyis nyang gas Siria dius jens lyis suon lha Israel jens lyis jeszan das xiklyis Aphek pheh loh.
27 Israel jens gas dius suon, zokho sont las zan loh. Gvshih Israel jens gas Siria jens yah byi lyis shvbeq phung lo aiq phung nyhoq dvbos. Siria jens gas dvmau gonh dyingh joq.
28 Mangso dah dius dvyuk Israel hwankti jyank mas los taiq zis gas, Yhensain heisoeh ge: Khasoeh ge lyis Siria bang gas, Yhensain ka boms mas dah Mangso nghuot, nyang gas pa mha dah Mangso ma nghuot, ge. Housoeh yvmvyah haih moqjens ngos nah loq mas kyauh las ngos Yhensain nghuot zis nvng yahge nah dius jens yoh seq das, ge.
29 Nyamoq gas nyhet nyeih top dvyuk dvtvp dvp tsain thoeng nyeis. Nyhet vnyeih lyis jeszan las Israel jens gas dvnyeih dvm lyis khyei cho zan dah Siria jens dvsens sat.
30 Nyet bang gas Aphek wus khau mha phang wvng lyis ciank lains gyop las hauh bang aiqci nyhet khyoengh lyis nhiq.
Benhadad gas wus vkhau mha phang lha yvp lhunk mas tamh joq.
31 Benhadad dah zau jens nyang lyis taiq zis gas, Yoeuh aq, Israel dah hwankti jens gas nhaiq seq nyen dah hwankti jens tsain nghuot, ge zis ngamoq xauhgyo. Ngamoq lyis yanghthung dyi wuot, uhloms mas twih lyet las Israel hwankti jyank mas jenh thuq e nhang geh, nyang nah kang lhyi lhuiq kat mvbeh, ge.
32 Housoeh las nyamoq gas, yanghthung dyi wuot, uhloms mas twih lyet las Israel hwankti jyank mas los taiq zis gas, Nah jyeidwis Benhadad taiq zis gas, Ngos lyis kang jenh dwis nhang shih aq, ge.
Ahab toeuh zis gas, Nyang dwis nyeis shih lah? Gis goeus. Nyang ngah vmang teh nghuot, ge.
33 Nyamoq gas Ahab dah dang lyis vlhomuh gyo las lvnyap toeuh zis gas, Nghuot goeus, nah vmang Benhadad, ge.
Ahab gas, Nyang lyis ngah jyank mas shwih los geh, ge. Benhadad jweh los lyis, Ahab gas nyang lyis jeslhyingh dvgeh shwih tsung loh.
34 Benhadad nyang lyis taiq zis gas, Ngah uwus nah uwus jyank masyah yoeus toh dah wus jens ngos nvng lyis doms dyei das. Ngah uwus gas Samari mas kaih jang kuot teh nvng Damasku mas kaih jang kuot aq, ge.
Housoeh Ahab taiq zis gas, Ngos nvng yah haih buisnoms kuot zis yah nhang kat das, ge. Housoeh nyang yah buisnoms kuot lho lha nhang kat.
Ahab lyis Lvpe Yobos Huon
35 Lvpe jens mas dvyuk gas nyah lvpe changh dvyuk lyis, Yhensain dah dang yah dvyhangteh, ngos lyis jenh bat aq, ge. Hauh soeu ka ma gyo.
36 Nyang taiq zis gas, Nvng Yhensain dah dang lyis domsyos ma gyo yvmvyah, ngah jyank masyah loh lyis khangkhyi nvng lyis sat das, ge. Hauh soeu loh yah dvyih khangkhyi dvdoeu nyang lyis nyvng las sat.Ref 20.36: 1Hw 13.24
37 Tsai nyang gohtoeu dvyuk lyis nyvng las taiq zis gas, Ngos lyis jenh bat aq, ge. Housoeh las hauh soeu ka dvm bos shoq bat dyei.
38 Hauh lvpe ka nyang lyis ma seq yoeuh das xiklyis nyah nyoq lyis misseh yah thop las choyvm mas hwankti lhyi langh nyeis.
39 Gvshih hwankti suh los lyis, nyang hwankti lhyi kaiq las taiq zis gas, Hwankti eh, Ngos jeszan jang mas bos. Housoeh dius dvyuk gas gohtoeu dius dvyuk shwih los las ngos lyis, Haih dius yuk lyis zungh aq, dvja ja yah haih soeu dyuk loh lyis, nyah kang xiklyis nah kang dyei chah, nghuot ya nvng ngwis kyap dvkoeuq dyei chah, ge.
40 Nghuot laus eq ngos thyi lhyi hei lhyi muh nyo nyeis uhlyis nyang dyuk loh, ge.
Israel hwankti nyang lyis taiq zis gas, Nvng cu goeus, nvng nvnyang gungs soe tuon goeus, ge.
41 Housoeh nyang nyah nyoq mas dah misseh lvnyap yoeus tyamp. Housoeh Israel hwankti ka, nyang lvpe jens mas zis dvyuk nghuot yvlyis seq yoeuh.
42 Lvpe taiq zis gas, Yhensain heisoeh ge: Mhont chah oen ngos toeuq toh dah dius lyis nvng kat khyoq yvmvyah, nyah kang xiklyis nah kang, nyah dius jens xiklyis nah dius jens mhont zis xauh das, ge.
43 Israel hwankti ka ehnyet ma tap, ehnyet thank zis yah Samari wus nyah yhen pheh loh lo.