17
Eliya yahge Mau Kyuk
1 Gilead mau, Tishbe dius Eliya Ahab lyis taiq zis gas, ngos phuqsoe dah kang dwis Yhensain, Israel Mangso dah nyings yoeus las ngos taiq zis gas, Ngos mau wus das oen ma taiq dvchank jweh los das shishenh lyis mau ma wus das, jyweh ma gyoh das, ge.Ref 17.1: Yak 5.17
2 Tsai Yhensain dang nyah jyank jweh taiq zis gas,
3 Hei mhayah loh aq, buisthuq pheh loh las Yodan lvng mas yaus wvng dah Kherit lvng yvm mas loh tamh joq aq.
4 Nvng hauh jeislo lvng mas jeis shuk chah, houmha kvnhoq jens lyis nvng lyis tsoh das zis taiq toh, ge.
5 Housoeh Yhensain dah dang yah dvyhangteh nyang houmha loh las Yodan lvng mas yaus wvng dah Kherit lvng yvm mas nyeis.
6 Kvnhoq jens gas nvp lyis ohlhyoq yahge shoh, nyenh lyis ohlhyoq yahge shoh chi los dyei. Nyang hau jeislo lvng mas dah jeis shuk.
7 Hauh mau mas mau ma wus yvmvyah jeislo lvng gas kanh loh.
Eliya yahge Chauhmuh
8 Hauh thang lhyi Yhensain dah dang nyah jyank mas jweh taiq zis gas,
9 Toq aq, Sidon mau, Zarephat wus mas loh nyeis aq. Houmha nvng lyis nyhoeu das xiklyis chauhmuh dvyuk lyis ngos taiq toh, ge.Ref 17.9: Luk 4.25-26
10 Housoeh las nyang toq las Zarephat pheh loh. Nyang wus khomh mas jweh lyis, chauhmuh dvyuk thanghpop kui nyeis. Nyang lyis lui lholha taiq zis gas, Ngos lyis shuk jeis dvkom jenh chi los dyei aq, ge.
11 Nyang jeis yoeus das ge loh nyeis lyis Eliya gas nyang lyis doms lui las, Nah loq mas ohlhyoq eq dvkhyiq jenh chi los dyei aq, ge.
12 Vmesbih taiq zis gas, Ngos ohlhyoq ma yoh oen kang dwis Yhensain, nah Mangso nyings yoeus las maukhi, yam mas sunghso phih dvtsop, thuk mas coeu dvmhauh dvbos. Ngos gas hauh thang thank dah vngai ba das xiklyis thangh kyangh dvmhauh kui nyeis, hauh thang lhyi ka ngah lo eq ngos eq zo las shei das, ge.
13 Eliya nyang lyis taiq zis gas, Vgyuk, nvng taiq vgus loh kuot aq, nghuot laus eq ngos lyis shih dvlhyoq loh kuot chi los dyei aq; hauh thang lhyi nvng yahge nah lo xiklyis kuot aq.
14 Khasoeh ge lyis Yhensain, Israel Mangso heisoeh ge: Yhensain nyeisjvng mas mau wus nhang buisnyeis jweh shoq yam mas phih ma thank, thuk mas coeu eq ma kyuk loh das, ge.
15 Housoeh las Eliya dah dang yah dvyhangteh nyang loh kuot; housoeh nyang eq, lvpe eq, nyah yhenbang eq nyoshoq nyeih zo khoq.
16 Eliya lyis yah Yhensain taiq dah dang yah dvyhangteh, yam mas phih ma dye, thuk mas coeu eq ma kyuk loh.
17 Gvshih chauhmuh dah loloeu gas nos los. Nyah nos gvgis changh las soq ma bos lo.
18 Housoeh las nyang Eliya lyis taiq zis gas, Mangso dah dius eh, nvng ngos lyis cha kuot goeus lah? Ngah yaunos lyis soh nhang lha ngah lo lyis sat das zis nvng ngah jyank mas los nyvng, ge.
19 Eliya taiq zis gas, Nah lo ngos lyis dyei aq, ge las hauh lo lyis nyah loqyom masyah po yoeus las nyang yhet nyeis dah thoq yvp pheh po loh las nyah yhetyos mas toh.
20 Housoeh nyang Yhensain lhyi kaiq zis gas, Yhensain, ngah Mangso eh, ngos khau nyeis hai chauhmuh dah lo lyis sat zis yah nyah jyank mas kuk cho she los lhyeh, ge.
21 Nyang loshang dah thoq mas nyah gungs yah somh lhain nghop las Yhensain lhyi dung zis gas, Yhensain, ngah Mangso eh, haih loshang dah dyos nyah jyank mas doms wvng los nhang aq, ge.Ref 17.21: 2Hw 4.34-35
22 Housoeh Yhensain ka Eliya dah thwe xauhgyo las, loshang dah dyos nyah jyank mas doms wvng las nyang doeng los.
23 Eliya gas hauh loshang lhyi thoq yvp masyah shwih los las yhen khau mha nyah ungwes lyis kyauh zis gas, Yoeuh aq, nah lo dwis los, ge.
24 Hauh vmesbih Eliya lyis taiq zis gas, Nvng gas Mangso dah dius nghuot las, nah nhuot mas dah Yhensain dang gas jyoeng yvlyis ngos seq, ge.