11
Yoshua Yabin lyis Ung
Israel jens ung cho loeus Hazo hwankti Yabin xauhgyo lyis, nyang dang kyoh kat bang gas, Madon hwankti Yobab, Shimron hwankti, Akshap hwankti, mautsung pheh Boms mau, Galile thomhlo dah mautyi pheh Yodan langhkhau, janggyon, Dor wus nvm thomh yvm mha tsain nyeis dah hwankti jens tsain nghuot.note 11.2 Dor joqyos lyis top ma seq. Yodan lvng thyitvp haqtvp nyeis dah Khanan jens, boms mau mas tsain nyeis dah Amori, Hiti, Perizi, Yebusi jens, Mizpet mau Hermon boms khyei mha nyeis Hiwi jens lyis eq nghuot. Nyamoq gas thomh yvm mas dah sihsho nyhoq nyo dah jesphung yah thuq los. Nyamoq mas nyang eq, jeslhyingh eq nyoshoq bos. Haih hwankti jens dvnganhmoq gas dvgeh dvp xonh las Israel jens lyis zan das ge Merom jeislo lvng mas los thoeng toh.
Yhensain Yoshua lyis taiq zis gas, Nyamoq lyis vgyuk, Israel jens xiklyis nvpyo haih shishenh lyis ngos nyamoq dvnganh lyis sat das; nvng nyang dah khyei nos nhang las lhyingh lyis gas ngheq das, ge. Housoeh las Yoshua yahge nyah jesphung ka nyamoq lyis Merom jeislo lvng mas nyetlos nyettant loh zan. Yhensain ka Israel jens lyis nyamoq thoq mas ung nhang lha Israel jens gas nyamoq lyis zan zis mautsung pheh Misrephot Maim yahge Sidon wus jweh shoq, buisthuq shot pheh Mizpa langhkhau jweh shoq chank khat. Nyamoq tsoq las zan zis nyamoq dah jeswus dvyuk eq ma nyet lo shoq sat. Yoshua gas Yhensain tying toh zis yah dvyhangteh kuot las, nyang dah khyei tsain nos nhang lha jes lhyingh lyis gas tsain ngheq.
10 Hauh thang lhyi Yoshua tauh los las Hazo wus lyis zan yoeus las nyah hwankti lhyi sat. (Hauh yoq lyis Hazo wus hwankti ka munghdan dvnganh mas yomsoq bos thank soeu nghuot.) 11 Houmha bang dvnganh lyis sat las dvyuk eq ma nyet lo, wus lyis eq ngheq tyamp.
12  Yhensain dah jyeidwis Moshe taiq toh zis yah dvyhangteh, Yoshua gas hauh wus jens yahge nyah hwankti jens dvnganh lyis zan yoeus las yuk khanghmuh lyis sat. 13 Nghuot laus eq boms mas kuot toh dah wus jens mas Yoshua ngheq goeus dah Hazo mas lai las gohtoeu wus lyis gas Israel jens ma ngheq. 14 Houmha dah phauhdap vyhang yahge gaunyhauq dvnganh lyis gas Israel jens nyamoq xiklyis tsain yoeus. Nghuot laus eq dius yuk khanghmuh lyis gas sat las dvyuk eq ma nyet lo. 15  Yhensain ka nyah jyeidwis Moshe lhyi tyingtoh dang dyei toh las Moshe ka Yoshua lyis tyingtoh dang dyei toh vgus Yoshua domsyos gyo. Nyang gas Yhensain Moshe lhyi tying toh zis dvnganh kuot.
Yoshua dah Ung Cho Xom
16 Yoshua zan yoeus dah mau dvnganh gas mautsung yahge mautyi pheh dah boms mau, janggyon, Goshen mau dvnganh, mautyi pheh dah nyeis kyuk yos, Yodan langhkhau eq bos. 17-18 Mautyi pheh Edom wus nvm mas dah Halak boms masyah mautsung pheh Balgad wus, Hermon boms dah mautyi Lebanon langhkhau jweh shoq dvm. Yoshua gas hauh mau mas hwankti jens yah nyangh nyangh jeszan. Nghuot laus eq nyang dvnganh lyis zan yoeus las nyamoq lyis sat. 19 Hiwi dius dvkhamh nyeis dah Gibeon wus kyingh Israel jens yah nyenstap cho dvkuot. Gohtoeu dvnganh gas yoh zan yoeus zis dvnghuot. 20  Yhensain ka nyamoq Israel jens lyis womh zan das xiklyis ehnyet than nhang toh. Housoeh nyang nyamoq lyis nhaiq ma nyen lo shank shoq yoh mhont tyamp das. Heika Yhensain Moshe lhyi kuot nhang toh zis nghuot.Ref 11.20: Lyi 7.16
21 Hauh shishenh lyis Yoshua gas boms mau nghuot dah Hebron, Debi yahge Anab wus mas tsain nyeis dah Anakim ge dam dius nyau lyis mhont tyamp. Yuda yahge Israel boms mau lyis eq tomh tyamp. Yoshua gas nyamoq yahge nyamoq dah wus jens lyis shank shoq mhont. 22 Israel munghdan mas Anakim vhuh dvyuk eq ma nyet lo. Nghuot laus eq Gaza, Gat yahge Ashdod wus mas dvtsiq nyet joq shih.
23  Yhensain Moshe lhyi taiq toh vgus, Yoshua gas hau mau gonh zan yoeus. Yoshua gas Israel jens lyis vkoq khyvlyis vso maunyeis gvm dyei. Housoeh dius jens jeszan cho no goeus.