51
Babilon lyis Soe Tsoq Tuon
Yhensain taiq: Ngos Babilon yahge nyah dius jens lyis tyi lha mhont das lyeis she los. Ngos gas lvbaus nhang lha Babilon lyis, lyeis gas huhyau muot tangh loh teh mhont das. Hau dyoqbis buisnyeis jweh lyis nyamoq shot khanghmuh masyah zan las hauh mau vkom joq das. Nyah jeslo jens lyis nyamoq dah nyo baiq das shishenh, jesgungs shunk das shishenh vdyei. Loyvm jens lyis vnyhet toh! Jesdvp gonh lyis mhont geh. Nyamoq dvmdap las nyamoq dah wus talhoeu mha tsain shei das. Ngos Maukhung Jesphung Yhensain Mangso ka Yuda yahge Israel gas ngos Israel dah Gyingshang Soeu lhyi tyi lha yangh yaunos kuot goeus laus eq nyamoq lyis ma tyamp. Babilon masyah phang loh geh, namoq kang xiklyis phang geh. Babilon dah yaunos gvng mas vsat nhang goh. Ngos gvshih nyamoq mon-yih zis yah dvyhangteh nyamoq lyis lvto phuk las joeng nyeis. Babilon gas mungkvn gonh shuk yet dah ngah loq mas dah xing kom teh nghuot. Dius nyau jens gas Babilon dah zvbiq shuk las tsain huonh.Ref 51.7: Nyoq 17.2-4, 18.3 Babilon gas nyetlos nyettant gyoh las dyoqbis goeus. Nyah xiklyis kuk geh. Nyah dvm xiklyis mvcheih chi los geh, nyang lyis yoh yhoh mvbeh. Houmha nyeis dah lvbaus tsain taiq, Ngamoq Babilon lyis pangh yoeuh goeus, nghuot laus eq thang gyoh goeus. Gvshih toh khoq las yhen pheh tauh loh lo goh. Mangso ka Babilon lyis nyah yom dvnganh yah joeng las, hauh yvlyis shank shoq mhont tyamp goeus.Ref 51.9: Nyoq 18.5
10  Yhensain taiq, Ngah dius jens kaiq zis gas, Ngamoq gas jus cho mha nghuot joq yvlyis Yhensain chixoeuq goeus. Yhensain, ngamoq dah Mangso kuot goeus cho lhyi Yerusalem mas dah dius jens lyis loh taiq kyoh goh.
11  Yhensain ka Babilon lyis mhont das zis nghamh toh yvmvyah Mede hwankti jens lyis jaus jyonh goeus.
Houka nyang nyah Yhenmuh thyoq dah nyhenshang lvto khasoeh phuk das cho nghuot. Jeszan das zau jens vmingh dyei zis gas, Namoq dah nyo chuon geh, namoq dah gos cicont kuot geh. 12 Babilon wusciank lyis zan das vlho dyei geh. Zungh bang toenk toenk kuot las zungh yoeuh bang lyis nyamoq joqyos mas toh geh. Gauh zan das bang toh geh.
Yhensain ka Babilon bang lyis kuot das ge taiq toh zis dye shoq kuot das. 13 Hauh mau gas jeislvng nyoshoq bos las zisyos vboms vbeq yoh, nghuot laus eq shishenh jweh goeus, nyah kang twih gas thyet goeus.Ref 51.13: Nyoq 17.1 14 Maukhung Jesphung Yhensain ka nyah nyings mas maukhi lha, Babilon lyis zan das zis janghgyik wom teh dius nyoshoq shwih los das las nyamoq gas ung cho kaiq hoeu das, ge.
Chungh dah chunghthwe
15  Yhensain ka nyah yomsoq yah nyeisjvng lyis kuot toh.
Nyang nyah joeui yah mungkvn lyis gvnkhanh las
maukhung lhyi eq lhywa toh.
16 Nyang nyah vmingh yah maukhung vtoeu mha dah jeis nyings los.
Nyeisjvng vthang mhayah jyommauh she los.
Mauwus yvmas maunyoq nyik nhang,
nyah jyi mhayah lyeis nhang kat.
17 Haih yvlyis yoeuh las dius jens gas koh las cha ma soh lo.
Gungslho thwang bang eq nyamoq xoqphuh goeus,
khasoeh ge lyis nyamoq kuot dah mangso jens gas ma jus zis nghuot las houmha kang ma bos.
18 Hauh zis gas phauh ma dap, choqh phoh zis dvnghuot.
Yhensain los kuot lyis nyamoq gas dyoqbis tyamp das.
19 Yakop dah Mangso ka nyamoq teh ma nghuot.
Nyang gas vyhang dvnganh lyis kuot toh soeu nghuot las
nyah dius nyau duot das zis nyang Israel lyis khyen yoeus goeus.
Maukhung Jesphung Yhensain ge zis nyah nyings nghuot.
Mangso dah Doeus
20  Yhensain taiq,
Babilon eh, ngos jeszan yvmas nvng gas ngah doeus, ngah kyonhkhyi nghuot.
Dius nyau jens yahge munghdan jens lyis thungh thyi das yvmas ngos nvng lyis yhung.
21 Nyang jens yahge houmha ji bang lyis lhoq sanh das yvmas,
Jeslhyingh yahge hauh zis komp bang lhoq sanh yvmas,
22 vbusbih vmesbih lyis sat yvmas,
lokhoq jens yahge loyvm jens lyis jap sat das yvmas,
nyelo yukgis lo lyis sat das yvmas,
23 yvng yoeuh bang yahge nyamoq dah yvng phung lhyi sat das yvmas,
yos zwi bang yahge nyamoq nyang phung lhyi sat das yvmas,
guon bang yahge zau jens lyis thungh thyi das yvmas nvng lyis yhung goeus.
Babilon dah Joeng Cho
24  Yhensain taiq, Yerusalem lyis ma gis cho kuot dah xiklyis Babilon yahge nyah dius jens lyis ngos tauh dyei cho namoq nyvng das. 25 Babilon eh, nvng gas mungkvn gonh lyis thyoqpi dah boms teh nghuot laus eq ngos Yhensain ka nah jeswus nghuot. Nvng lyis nyhik las tsoh mas khyoq das las nyiyvp boms mas toh das. 26 Nah dah dyoqgyoh goeus yvmas dah luk dvlom eq yhen tsuk yvmas khanhamp eq ma doms yhung lo das. Nvng gas vcaiq vto sihyos duot das. Ngos, Yhensain taiq goeus.
27 Jeszan das zis vlho dyei geh. Dius nyau jens xauhgyo bas jungh lvbuh muot geh. Dius nyau jens eh, Babilon lyis zan das xiklyis sont geh. Ararat, Mini yahge Ashkena munghdan jens lyis jeszan das zis taiq kyoh geh. Jes shwih zan das zis jeszau toeuq toh geh. Nyang jens lyis janghgyik wom teh nhang geh. 28 Dius nyau jens eh, Babilon lyis jeszan das zis sont geh, Mede hwankti jens lyis nyamoq uhshe bang, zau jens yahge nyamoq joeu dah mau dvnganh mas dah jesphung yah dvgeh khi geh. 29  Yhensain ka Babilon lyis dius hank ma nyeis sihyos kuot das ge nghamh toeuq cho kuot los yvmvyah, nyeisjvng gas nvn zis yah nonh nyeis. 30 Babilon jeslo jens gas jeszan zis no las nyamoq thoenkgus jesdvp khau mha tsain lungh joq. Nyamoq womh cho ma bos lo, mvshoh jyen nghuot goeus. Wuskhomh thyoq khyoq goeus, Yhen eq nyi tsain ngheq kat goeus. 31 Loeus kyoh soeu dvyuk thang lhyi dvyuk wuih las Babilon hwankti lhyi, nyah wus gas shot khanghmuh masyah thyoq khyoq los goeus cho taiq kyoh. 32 Jeswus gas jeisgoeu joqyos lyis yoeus goeus, gyoplang lyis tsain ngheq goeus. Babilon jeslo jens gas svsoh gyuk nvn nyeis, ge. 33 Ma nyangh lyis jeswus gas nyamoq lyis jap khyoq las thanjang mas jyo lhyi nang teh nang das. Ngos, Maukhung Jesphung Yhensain, Israel Mangso taiq goeus.
34 Babilon hwankti Yerusalem lyis
jap chink las zo goeus.
Nyang hauh wus lyis yam lyis soeh nghat tyamp.
Nyang hauh yvlyis mvnjung soeh nyhau tyamp.
Nyang o zis yoeus las
nyet zis doeuh tyamp.
35 Zion mas bang gas,
ngamoq lyis thyoq zo goeus nyhenshang
gvshih Babilon bweh bas jungh, ge sang das.
Yerusalem bang gas,
Ngamoq xauh kham zo dah nyhenshang
gvshih Babilon bang joeng zis xauh kham bas jungh, ge taiq das.
Yhensain Israel lyis Pangh das
36 Housoeh las Yhensain Yerusalem bang lyis taiq. Ngos nah soe gos dyei las nah jeswus jens namoq lyis kuot goeus dah nyhenshang nyamoq lyis tauh dyei das. Ngos Babilon thomh lyis kyuk nhang lha nyah jeisthuq dwang kanh nhang das. 37 Hauh mau gas dyoq gyoh boms joq, ye gaunyhauq nyeis joqyos nghuot das. Houka gyukphoh joqyos, dius ma nyeis joqyos duot das, hauh yvlyis nyvng bang dvnganh dvn das. 38 Babilon bang dvnganh khangkhyi jens teh tsain nyings, khangkhyi lo jens teh tsain ching. 39 Nyamoq nyoqnoq lhyeh? Ngos nyamoq xiklyis zo shuk pwe sont dyei das, nyamoq shuk yet las pyo bas jungh. Nyamoq yhet loh las khanhamp eq ma soh los lo das. 40 Ngos nyamoq lyis sat das yvmas, yvnglo, shvbeq, yvnglus jens lyis she loh teh she loh das. Ngos, Yhensain taiq goeus.
Babilon dah Uhpui Loqkyoq
41  Yhensain Babilon cho taiq. Mungkvn gonh chungh dah wus gas yoeus loh goeus. Dius nyau jens dah nyoqlvtjvng mas Babilon gas gyukphoh bweh goeus nyvng! 42 Thomh gas Babilon thoq mas doeuh las nyings huomh toh dah jeisphauq yah nghop tyamp goeus. 43 Babilon mas dah wus jens gas gyukphoh tsain nghuot las jeis ma joq dah sihyos teh nghuot. Houmha hank eq ma nyeis, suh yangh hank ma suh lai. 44 Ngos Babilon mangso Bel lyis joeng das. Nyang khauh loh dah vyhang lhyi doms kyauh nhang das.
Dius nyau jens nyang lyis ma paiq lo das. Babilon wusciank gyoh goeus. 45 Israel dius jens eh, hou mhayah phang loh geh. Ngah nhaiqlom tsoeu mhayah namoq kang xiklyis phang geh. 46 Nvng xauhgyo dah loeus lamh gvng mas yom vgyau goh, vgyuk goh. Zvn yau zvn shaih dah loeus lamh hoeuh das. Mau mas thyoqzo cho yahge hwankti dvyuk gas gohtoeu dvyuk yah zan goh cho nghuot. 47 Housoeh las, Babilon mas dah phvra jens lyis ngos joeng das shishenh jweh los. Dvmau gonh xoqphuh das, nyah dius jens dvnganh eq sat zis xauh das. 48 Housoeh mautsung pheh yah los thyoqpi bang mas Babilon gyoh lyis maukhung yahge nyeisjvng mas zis dvnganh gas gauslaus kaiq das.Ref 51.48: Nyoq 18.20 49 Babilon gvng mas mungkvn dvkhauyah dius shei. Babilon gvng mas Israel jens nyoshoq shei. Housoeh las Babilon gyoh chah.Ref 51.49: Nyoq 18.24
Babilon mas Israel xiklyis Yhensain Loeus
50  Yhensain ka Babilon mas nyah dius jens lyis taiq: Shei mhayah luiq bang eh, gvshih loh geh, vlangh nyeis lo! Namoq yhen mhayah we joq laus eq ngos, namoq Yhensain lhyi soh las Yerusalem lyis nghamh geh. 51 Namoq taiq: Ngamoq nyoqnho ngelang gyoh las xoqphuh nhang, ma phauh gis kuot zis xauh. Khasoeh ge lyis lvbaus gas Yhensain dah Yhenmuh khau gyingshang joqyos mas wvng loh goeus. 52 Housoeh las ngos taiq, Ngos Babilon phvra jens lyis joeng das shishenh jweh los las nyah dvmau gonh mas dvmdap bang noskyingh das. 53 Babilon gas maukhung mha yoh doq las, houmha goeng dah thoenkgus jesdvp kuot toh lyis yangh ngos dius nhang shih las hauh yvlyis mhont das. Ngos, Yhensain taiq goeus.
Babilon mas Tsoq Mhont
54  Yhensain taiq,
Babilon masyah ngaus thwe,
hauh mau mas dyoqbis gvng mas kuk ngaus thwe lhyi gyo geh.
55 Ngos Babilon lyis mhont las
jyamhjyuklhyuk mus nhang.
Jesphung duon wvng los zis gas jeisphauq nyings teh,
kaiq hoeu zis yah zan.
56 Nyamoq Babilon lyis mhont das zis los goeus.
Nyah jeslo jens lyis nyhik goeus las nyamoq dah
lyei khyauh zis tsain xauh goeus.
Ngos gas ma gis yvlyis joeng dah Mangso nghuot las
Babilon gas joeng das zis mon-yih vgus kuot das.
57 Ngos gas nyah guon bang,
joeui bos bang, uhshe bang yahge
jeslo jens lyis yhei yet nhang das.
Nyamoq yhet loh las khanhamp eq ma soh los lo das.
Ngos, Hwankti taiq goeus.
Ngos, Maukhung Jesphung Yhensain nghuot.
58 Yombos Babilon dah wusciank tsoh mas doeuh khyoq das,
nyhang dah wus khomh jens lyis ngheq khyoq das.
Dius nyau jens dah muh vkom dvnghuot lo.
Nyamoq yomkat zis nyilhyam yah ngeh tyamp goeus.
Ngos, Maukhung Jesphung Yhensain taiq goeus.
Loeus Babilon pheh Huon
59 Hwankti Zedekia lyis phuqsoe soeu ka Maseia dah nyeilo, Neria lo Seraia nghuot. Zedekia Yuda hwankti kuot zis nyei vzvn lyis Seraia gas hwankti yah dvgeh Babilon pheh loh uhlyis ngos nyang lyis shet cho dvkhamh dyei toh. 60 Ngos Babilon mas jweh los das dyoqbis cho dvnganh yah sen lha maussauh buk mas lhaih toh, haih gohtoeu Babilon dah cho eq lhaih toh. 61 Ngos Seraia lyis taiq zis gas, Nvng Babilon mas jweh lyis heimha lhaih toh zis dvnganh, dius jens lyis kaiq nghap kyoh das zis soh soh mus aq. 62 Hauh thang lhyi shvmanh dung aq, Yhensain eh, nvng haih joqyos lyis mhont das ge taiq goeus. Housoeh las houmha dwis ya dwis zis, dius laus eq, gaunyhauq laus eq ma nyeis lo das ge goeus las houka sihyos teh vcaiq vto joq das, oen aq. 63 Seraia eh, nvng dius jens lyis haih maussauh dye nghap kyoh thang lhyi, hauh yvlyis luk dvlom mas twih tap las Uphrat lvng mas doeuh khyoq zoh lyis,Ref 51.63-64: Nyoq 18.21 64 taiq aq, Heika Babilon mas bweh das cho nghuot. Houka nyop las khanhamp eq ma toq lo das. Khasoeh ge lyis Yhensain ka hau dyoqbis cho nyah thoq mas she kat das, oen aq, ge.
Yeremia dah dang heimha dye.