50
Babilon lyis Xauh Nyhik
Heika Babilon wus yahge nyah dius jens cho Yhensain ngos lyis dyei dah loeus nghuot.Ref 50.1—51.64: Esa 13.1—14.23, 47.1-15
Dius nyau jens mas loeus kyoh geh,
hauh zis taiq hoeuh geh.
Vlho dyei las loeus taiq hoeuh geh! Vzauh toh goh,
Babilon gas gyoh goeus.
Nyah mangso Merodak gas vdyis vmons mus goeus.
Babilon phvra Bel jens gas xoqphuh goeus.
Nyah choqh phoh gungslho jens thungh thyi zis xauh goeus.
Mautsung pheh dah Dius dvnyau Babilon lyis los zan las hauh yvlyis sihyos kuot das. Dius jens yahge gaunyhauq jens phang loh das las houmha hank ma nyeis das.
Israel jens Tauh los
Yhensain taiq, Hauh shishenh jweh lyis Israel eq Yuda eq ngaus zis yah ngos nyamoq dah Mangso lhyi los xo das. Nyamoq gas Zion pheh loh cho nyei las houpheh xoeu lha loh das. Nyamoq gas ngos yah vcaiq vto thanghchvp toh las hauh yvlyis khanhamp eq ma thyoq das.
Ngah dius jens gas, yvng yoeuh soeu boms mas chithyuk dah, yvng jens teh nghuot. Nyamoq gas, yvng jens dvboms masyah dvboms loh las nyamoq dah yhen khamha nghuot zis tohnyhik tyamp teh, chowhang whang loh. Nyamoq gas nyamoq lyis xo nyvng bang dvnganh yah zan zis xauh. Nyamoq dah jeswus jens taiq zis gas, Nyamoq gas Yhensain lhyi tyi lha yaunos kuot las ngamoq kuot zis ma shuot. Nyamoq dah phauh thyeih moq Yhensain lhyi loms las nyamoq gas tsoq las nyang lyis lomluk chah, ge.
Israel jens eh, Babilon masyah phang geh, hauh mau masyah thuq loh geh. Yvng phung lhyi choshe dah beqlus jens teh duot geh. Ngos mautsung pheh yombos dius nyau jens lyis jausjyonh das las Babilon lyis zan nhang das. Nyamoq gas hauh mau lyis lhaink yap zis yah jeszan las ung das. Nyamoq gas lyes dah shoh khat bang nghuot. Nyamoq baiq dah nyo gas toeuq yvmas yah khanhamp eq ma i. 10 Babilon gas lvnyhvp duot das, hau thyoq bang eq nyamoq o zis dvnganh yoeus loh das. Ngos, Yhensain taiq goeus.
Babilon Gyoh
11  Yhensain taiq, Babilon dius jens eh, namoq ngah dius nyau lyis shwih jons loh. Namoq gas pyo lha gaus zis yah guk nang noeupon teh loh, nyang teh tsain nyings. 12 Nghuot laus eq nvnyang dah kuhxing wus gas nyhen mha gyoh las xoqphuh goeus. Babilon gas dius nyau dvnganh mas nain thank yhaugyen dius nyau nghuot das. Houka kyuk las jeis ma joq dah sihyos bweh los das. 13 Ngos nhaiqyo gvng mas, Babilon mas hank eq ma nyeis das. Houka dyoq gyoh joq das las suh lai bang yuk khanghmuh dvn las mauh das.
14 Lyei baiq bang eh, Babilon yahge yvmlhaink mas tyi lha jeszan das zis yap geh, namoq dah nyo dvnganh Babilon lyis baiq geh. Khasoeh ge lyis houka ngos Yhensain lhyi tyi lha yaunos kuot goeus. 15 Wus yvmlhaink yah jeszan hoeu cho kaiq geh. Gvshih Babilon gas vsomh kham goeus. Nyah wusciank gas thyoq khyoq goeus. Ngos Babilon bang lyis lvto phuk nyeis. Housoeh las namoq nyamoq thoq mas lvto phuk geh, nyamoq gohyhamh lyis kuot teh nyamoq lyis kuot geh. 16 Hauh mau mas jyo vkhyoq nhang goh, jyo eq vyhomh nhang goh. Houmha nyeis dah lvbaus khanghmuh eq jes jens zan das zis gyuk las yhen pheh tauh loh das.
Israel jens Tauh los
17  Yhensain taiq, Israel jens gas Khangkhyi yah khat sanh tyamp dah yvng teh nghuot. Cangxeih lyis Asiria hwankti zainsmuh yah zan zis xauh. Thang lhyi Babilon hwankti Nebukhaneza gas nyamoq shohyau lyis thungh thyi goeus. 18 Haih gvng mas ngos, Maukhung Jesphung Yhensain, Israel Mangso ka hwankti Nebukhaneza yahge nyah mau lyis Asiria hwankti zainsmuh lhyi joeng teh joeng das. 19 Ngos Israel jens lyis nyamoq dah mau mas doms toh das. Nyamoq gas Khame boms yahge Bashan janggyon mas yuk dah zonoms zo das. Ephraim yahge Gilead mau mas yuk dah jyo jo shoq zo das. 20 Hauh shishenh jweh lyis Israel mas yaunos ma nyvng lo, Yuda mas lhung cho ma bos lo das. Khasoeh ge lyis ngos kang lhuiq kat toh bang lyis yobos khyuot dyei das. Ngos, Yhensain taiq goeus.
Yhensain Babilon lyis Soetuon
21  Yhensain taiq, Merathaim bang yahge Pekod bang lyis zan geh. Nyamoq lyis sat zis yah mhont geh. Ngos namoq lyis taiq toh zis dvnganh kuot geh. Ngos, Yhensain taiq goeus. 22 Hauh mau mas jeszan thwe xauhgyo, houmha dyoqbis zainsmuh nghuot. 23 Babilon gas mungkvn gonh lyis bat thyi goeus. Gvshih hauh doeus gas gyau loh goeus. Dius nyau dvnganh gas hauh mau mas bweh goeus cho lhyi dvn. 24 Babilon eh, nvng ngos lyis tyi lha zan goeus. Ngos nah xiklyis lhyik thung toh zis nvng ma seq shih lyis nyih goeus. 25 Ngos ngah kyonhkhyi toh dah joqyos phank kat goeus. Ngos nhaiqyo zis yah hauh zis lap thuq goeus. Khasoeh ge lyis ngos, Yomzains Mangso, Maukhung Jesphung Yhensain ka Babilon mas muh kuot dais bos. 26 Shot khanghmuh masyah zan geh, nyamoq dah jyo toh dah jyi thyoq phank geh. Lvnyhvp lyis jyo boms teh zungs toh geh, hauh mau lyis mhont geh, cha eq vnyhet toh lo. 27 Nyamoq dah jeslo jens dvnganh lyis sat geh. Nyamoq lyis jap khyoq geh. Babilon jens jom goeus. Nyamoq lyis joeng das shishenh jweh goeus.
28 Babilon masyah phang luiq los dah jesphang phang bang Yerusalem mas jweh los las, Yhensain, ngamoq dah Mangso, Babilon bang nyah Yhenmuh lyis kuot gvng mas lvto khasoeh phuk cho taiq kyoh.
29 Babilon lyis zan das zis Lyei baiq bang lyis taiq geh. Lyei yahge nyo khasoeh yhung zis seq bang lyis nhang kat geh. Wus lyis lhaink toh geh, hank lyis eq vphang luiq loh nhang goh. Nyang kuot goeus zis dvnganh tauh dyei geh. Nyang gohyuk lyis kuot teh nyang lyis kuot geh. Khasoeh ge lyis nyang gas ngos, Israel dah Gyingshang Soeu lhyi tyi lha khwank zis yah kuot goeus.Ref 50.29: Nyoq 18.6 30 Housoeh las nyah loyvm jens gas wus talhoeu mha sat xauh das, hauh nyeih lyis nyah jeslo jens monh tyamp das. Ngos, Yhensain taiq goeus.
31 Babilon eh, nvng gas khwank cho yah dyingh joq, housoeh las ngos, Yomzains, Maukhung Jesphung Yhensain nvng lyis tyi. Ngos nvng lyis joeng das zis ngah xiklyis shishenh jweh joq. 32 Khwank dah nah dius nyau gas thungh lains las nvng lyis hank ma bos toeu toq das. Ngos nah wus jens lyis nyi ngheq kat das las vyvm vwi mas zis dvnganh dyoqbis das.
33 Maukhung Jesphung Yhensain taiq, Israel yahge Yuda dius jens gas zaiq zis xauh goeus. Nyamoq lyis nyhik loh bang dvnganh gas nyamoq lyis vlhomuh zungh las ma loh nhang das. 34 Nghuot laus eq nyamoq lyis khomp das soeu ka yombos. Nyah nyings Maukhung Jesphung Yhensain nghuot. Nyang gas nyamoq dah soe lhyi khomp dyei las nyamoq mau mas nyenstap cho she los das laus eq Babilon bang lyis gas yau cho she los das.
35  Yhensain taiq,
Shei cho ka Babilon mas,
nyah dius jens mas,
nyah dah guon bang yahge nyah joeui bos bang jyank mas jweh das.
36 Shei cho ka lvpe hwah jens mas jweh das las,
nyamoq koh das.
Shei cho ka nyah jeslo jens jyank mas jweh das.
Houka svsoh gyukphoh nghuot!
37 Nyah nyang jens, jeslhyingh jens dyoqbis das!
Shei cho ka nyah jes uhkung jens mas jweh das,
nyamoq kha iq yomnhuk!
Nyah zisyos dyoqbis las
lvnyhvp duot loh das.
38 Nyah mau mas jeislvng gas tsain kanh las
kyuk tyamp das.
Babilon gas gyukphoh phvra jens yah dius jens lyis
koh nhang dah mau nghuot.
39 Housoeh las Babilon gas yius yahge sidyosnote 50.39 Yius yahge sidyos, nghuot ya gyungs yahge ye khuih nyeis joqyos, ma lhoq ma shang nghoq nyeis joqyos nghuot das. Houmha dius hank eq ma doms nyeis das.Ref 50.39: Nyoq 18.2 40 Ngos Sodom Gomora yahge vyvm vwi wus jens lyis mhont uhlyis bweh yhangteh Babilon wus lyis bweh nhang das. Houmha hank khanhamp eq ma doms nyeis lo das. Ngos, Yhensain taiq goeus.Ref 50.40: Vpm 19.24-25
41 We dah mautsung mau pheh yah dius jens los nyeis.
Nyamoq gas yombos dah dius nyau nghuot.
Hwankti nyoshoq eq jeszan das zis sont nyeis.
42 Nyamoq gas nyamoq dah lyei yahge
moengsa yoeus chi goeus.
Nyamoq gas lhoeng lha nhaiq ma seq nyen bang nghuot.
Nyamoq nyang ji los dah thwe ka thomh teh nyings huomh toh.
Nyamoq gas Babilon lyis jeszan das zis cicont nghuot.
43 Babilon hwankti ka hauh loeus xauhgyo las
nyah loq gyoh lhangh loh.
Nyang gas lokhoeu nos nos dah vmesbih teh
shanghsenh zis yah zaiq toh.
 
44 Yodan lvng yvm chank mhanhgyomh masyah thuq los las nyaus dah katjang mas doq loh dah khangkhyi teh, ngos Yhensain los las Babilon bang nyetlos nyettant nyamoq wus masyah phang loh nhang das. Hauh thang lhyi ngos khyen toh dah uhshe soeu hauh dius nyau lyis guon das. Ngos yah hank yoh byi das? Ngos lyis loqyom hank womh tyonh das? Ngos lyis khah guon soeu yoh thoenk yap das lah? 45 Housoeh las ngos Babilon wus lyis tyi lha kuot das cvvq cho yahge nyah dius jens lyis kuot das toeuq cho lhyi gyo geh. Nyamoq dah loshang jens lyis yangh langshe loh das. Yuk khanghmuh gyuk dvn das. 46 Babilon gyoh lyis thwe thuq los das las hauh gvng mas nyeisjvng gonh nonh das, hauh dvn ngaus thwe ka gohtoeu dius nyau jens xauhgyo das.