46
Egutu lyis Soetuon
1 Yhensain ka dius nyau jens dah cho ngos lyis taiq.
2 Egutu dius nyau yah xi. Heika Egutu mas hwankti Neko dah jesphung cho taiq. Yosia lo Yehoiakim Yuda hwankti kuot zis nyei vzvn lyis, Khakhemi joqyos Uphrat lvng nvm mas Babilon hwankti Nebukhaneza yah ung tyamp dah Egutu yah sen cho nghuot.Ref 46.2-26: Esa 19.1-25; Ezk 29.1—32.32
3 Egutu zau jens kaiq,
Namoq dah gos cicont kuot las
jeszan das zis jens loh geh!
4 Nyang lyis tsain shauq las ji thuq loh geh,
jes uhkyop kyop las yap geh.
Namoq dah lham swih geh,
5 Nghuot laus eq ngos cha nyvng ge Yhensain nyei.
Nyamoq gas gyuk zis yah tauh los.
Nyamoq dah jeslo jens gas somh loh las
gyuk zis yah nyamoq yoh wuih nyhoq lvnyap phang lha
nungs pheh ma lhain yoeuh lo.
6 Wuih zis nyap bang ma yoh phang loh;
jeslo jens eq ma yoh phang luiq.
Mautsung shot Uphrat lvng nvm mas
nyamoq thungh lains las gyoh goeus.
7 Nile lvng teh je doq los nyeis zis hank nghuot?
Jeislvng nesbaus than teh los zis hank?
8 Nile lvng je teh doq los zis Egutu bang nghuot.
Nesbaus than dah jeislvng teh nghuot.
Egutu bang taiq, Ngos toq las mungkvn lyis nghop bah.
Ngos wus jens yahge houmha nyeis bang lyis mhont das.
9 Nyang jens lyis, Loh geh,
jeslhyingh jens lyis, Lang geh oen tying geh!
Jeslo jens lyis nhang kat geh.
Ethiopia yahge Libya mas dah gos chi bang,
Lidia mas dah lyei baiq lyes bang lyis nhang kat geh.
10 Heika Yomzains, Maukhung Jesphung Yhensain, dah buisnyeis nghuot.
Khvnyhik nyang lvto phuk das,
khvnyhik nyang nyah jeswus lyis joeng das.
Nyah sham ka nyamoq lyis jo shoq zo das
nyamoq suih lyis nhaiqtap shoq shuk das.
Khvnyhik Maukhung Jesphung Yhensain ka nyang yoeus das bang lyis
mautsung shot Uphrat lvng yvm mas lomhxangh lainh das.
11 Egutu dius jens eh, Gilead mau mas
mvcheih loh xo geh.
Namoq dah mvcheih dvnganh gas namoq lyis cha ma yoh yhoh,
yhung pvjus cho kyink thuq kat goeus.
12 Nvng xoqphuh cho dius nyau jens xauhgyo goeus,
nvng kaiq ngaus zis yuk khanghmuh xauhgyo goeus.
Jeslo dvyuk gas gohtoeu dvyuk yah thunghgoh las
aiq yuk yah tsoh mas lains loh.
Nebukhaneza los
13 Babilon hwankti Nebukhaneza Egutu mau lyis los zan lyis Yhensain ngos lyis jis. Nyang taiq zis gas,Ref 46.13: Yer 43.10-13
14 Egutu wus jens nghuot dah
Migdol, Memphi yahge Tapanhe wus mas tsain taiq hoeuh geh.
Namoq nyang khomp zo das zis cicont kuot geh;
Namoq yoh zis dvnganh jes mas monh das.
15 Nah dah yomzains mangso Api chamus lains?
Yhensain ka nyang lyis zan lhain.
16 Nah jeslo jens gas thungh lains goeus.
Dvyuk gas gohtoeu dvyuk lyis,
Lvnyap mus aq, jeswus moengsa mhayah phang luiq las
yhen pheh yah dius jyank mas loh goh, ge.
17 Egutu hwankti lhyi nyings saiq dyei -
nyah toeuh chithyuk soeu thwe lvm nhuot, ge.
18 Ngos, Maukhung Jesphung Yhensain ka hwankti nghuot.
Ngos dwis nyeis Mangso nghuot.
Tabor boms gas gohtoeu boms jens thoq lyis zes teh,
Khame boms gas thomh toeu mha joq teh,
nvng lyis zan soeu ka yombos.
19 Egutu dius jens eh,
jonsdoeus loh das xiklyis cicont kuot aq.
Memphi wus gas dyoq gyoh las dius hank ma nyeis,
sihyos kuot tyamp das.
20 Egutu gas noeu yungh pon teh nghuot laus eq,
mautsung pheh dah nyen bos mhoq yah nyang lyis los zan.
21 Nyang nghoh dah jeslo jens yangh noeupon lo jens teh
mvshohjyen nghuot.
Nyamoq ma thoenk zan,
dvnganhmoq nungs phuk las phang goeus.
Nyamoq dyoqbis das buisnyeis jweh los.
Nyamoq joeng zis xauh bah ge.
22 Egutu bang gas nyamoq dah jeswus jesphung jweh los nyeis lyis
lhangnyis nyings teh tsain du phang.
Jeswus eq wuzung yah zan zis
saiq thyet bang saiq thoeuq lhain lha,
23 saiqnoq khyam lhyi mhont tyamp teh nghuot.
Nyamoq dah jeslo jens janghgyik jens thoq lyis nyo,
nyamoq sunk nyo las ma thoq suon lo.
24 Egutu dius jens gas xoqphuh.
Nyamoq lyis mautsung pheh bang yah ung tyamp das.
Ngos Yhensain taiq goeus.
25 Maukhung Jesphung Yhensain, Israel Mangso taiq, Ngos Thebe mangso Amon yah dvgeh Egutu yahge nyah mangso jens, nyah hwankti jens lyis joeng das. Ngos Egutu hwankti yahge nyang lyis khau bang dvnganh lyis yoeus das.
26 Ngos nyamoq lyis nyamoq dah kang lhyi xo bang ge, Babilon hwankti Nebukhaneza yahge nyah jesphung loq mas kyauh das. Nghuot laus eq thang lhyi ka xikpheh teh dius jens Egutu mas doms nyeis das. Ngos, Yhensain taiq goeus.
Yhensain Khyuot yoeus das
27 Ngah dius jens eh, Vgyuk goh;
Israel jens eh, vdvn goh:Ref 46.27-28: Yer 30.10-11
ngos namoq lyis hau we mau masyah,
namoq jonsdoeus nyeis masyah khyuot das.
Namoq yhen mha tauh los las nyenstap zis yah nyeis das.
Nvng gau yvmas nyeis las hank eq nvng lyis ma kyuk das.
28 Ngos nvng yah nghuot yvmvyah vgyuk.
Ngos nvng lyis sanh tyamp dah dius nyau lyis mhont das laus eq,
nvng lyis gas ma mhont das.
Ngos nvng lyis ma joeng ma toh das,
nghuot laus eq ngos nvng lyis joeng lyis lyi bos khyvlyis kuot das.
Ngos, Yhensain taiq goeus.